Odommu 8:5-24

⁵Wèè tũ̀ nho mɔ́mmuɔ nkó mɛyɛ̀mmɛ̀ ò dɔ̀ɔ̀ri tikɔ̃̀ntì kpɛrɛ ndɛ, kɛ̀ wèè yie mMuyɑɑ́nsɑ̀ɑ̀mù kpɛti kòò dɔ̀ɔ̀ri mù dɔ́ dɛ̀.

⁶Kɑ̀ɑ tũ̀ nhɑ mɔ́mmuɔ nkó mɛyɛ̀mmɛ̀ dɛ̀ dɑ kɔrinɛ̀ mukṹṹ mborɛ̀ ndɛ, kɑ̀ɑ yie mMuyɑɑ́nsɑ̀ɑ̀mù kpɛti ɑ pɛ́tɛ́ mufòmmu nɛ̀ diwɛ̀ì.

⁷Bɛ̀ɛ̀ tũ̀ mbɛ mɔ́mmɔmbɛ kó mɛyɛ̀mmɛ̀ bɛ̀ tú Kuyie nkpɑntídɛ̀ntɔbɛ̀ mbɛ, kɛ yɛ̃́ onìtì kó mɛyɛ̀mmɛ̀ í tũmmɛ̀ Kuyie nkó ikuɔ́, mɛ̀ ketɛ́ kɛ bɑ́ɑ́ nɑ kɛ́ ì tũ̀nnɛ.

⁸Bɛ̀ɛ̀ dɔ̀ɔ̀ri bɛ yɛ̀mmɛ̀ dɔ́mɛ̀ Kuyie mbɑ́ɑ́ bɛ̀ pɛ́nsìrì.

⁹Díndi tɛ̃́nkɛ í tũ ndi kɔ̃̀ǹtì kó mɛyɛ̀mmɛ̀, di tũ mMuyɑɑ́nsɑ̀ɑ̀mù kpɛti nti mùù bo di miɛkɛ. Kòò mɔù í mɔkɛ Muyɑɑ́nsɑ̀ɑ̀mù Kirisi duɔ̀ mmù ò í tú Kirisi kou.

¹⁰Bɑ́ di kɔ̃̀ntì mɛ ntúmɛ̀ tìì yóó kú diyiè mɑrì, kɛ̀ Kirisi bo di miɛkɛ Kuyie ndi wénkùmmu, kɛ̀ Muyɑɑ́nsɑ̀ɑ̀mù di duɔ́ mufòmmu pɑ̀mmù mùù bo sɑ̃́ɑ̃̀.

¹¹Kɛ̀ Muyɑɑ́nsɑ̀ɑ̀mù mùù te kɛ̀ Yesu yɑ̃̀ńtɛ́ kɛ̀ mù bo di miɛkɛ, mummu mùù te kɛ̀ Kirisi yɑ̃̀ńtɛ́ mù bo duɔ́ nkɛ̀ di kɔ̃̀ntìi foutɛ.

¹²N kɔbɛ kɛ̀ dɛ̀ dò mmɛmmɛ di tɛ̃́nkɛ í dò nkɛ́ndɔɔri di kɔ̃̀ǹtì dɔ́ dɛ̀.

¹³Kɛ̀ di dɔɔri di yɛ̀mmɛ̀ dɔ́mɛ̀ di wɛ̃rɛ̀ bo kú, kɛ̀ di mɛ nyóu kɛ Muyɑɑ́nsɑ̀ɑ̀mù kùɔ di mɔ́mmɔmbɛ kó mɛyɛ̀mmɛ̀, di bo nfòù sɑ̃́ɑ̃̀.

¹⁴Muyɑɑ́nsɑ̀ɑ̀mù ni bɛ̀ɛ̀ kó dimɑ̀ɑ̀ bɛɛ̀ tu Kuyie mbí.

¹⁵Kuyie nti duɔ́ mmùù Yɑɑ́ nyí ti dɔɔri tidɑɑtì, kɛ ti ɑ̃ɑ̃̀ kufɔ̃wɑɑ́, mmù ti dɔɔri Kuyie mbí nyí, kɛ te kɛ̀ ti kù yu kɛ tú ti cicɛ.

¹⁶Muyɑɑ́nsɑ̀ɑ̀mù mmuù ti nɑ́ɑ́ nti yɛ̀mmɛ̀ miɛkɛ ti túmɛ̀ Kuyie mbí.

¹⁷Kɛ̀ ti tú Kuyie mbí kɛ wɛ̃nnɛ́nɛ̀ Kirisi kɛ fɛ̃̀ṹtɛ́ ti bo tiekɛ Kuyie mmɔ̀kɛ dɛ̀, kɛ́wɛ̃nnɛ́nɛ̀ Kirisi kɛ́di tikpɑ̀tì.

¹⁸N yɛ̃́mu kɛ dò nKuyie nti bɑɑnɛ̀ tìì kpɑ̀tì dɛumu kɛ pɛ̃ɛ̃tɛ́ ti mɛ nfɛ̃́ũ̀rì mɛ̀ɛ̀ fɛ̃́ṹtímɛ̀.

¹⁹Kuyie ndɔ̀ɔ̀ dɛ̀ kó dimɑ̀ɑ̀ bɑ̀ɑmu Kuyie mbo dɛ̀ bɛnkɛmɛ̀ ku bí kó tikpɑ̀tì.

²⁰Kuyie ndɔ̀ɔ̀ dɛ̀ tɑ mɛ̀ɛ̀ fɛ̃́ṹtímɛ̀ dɛtetìrɛ̀ kɔ̃mɛ dɛ̀ í tú dɛɛ̀ mɛ̀ dɔ́ Kuyie nkuù yɛ̃ ndɛ̀ mmɛ dò.

²¹Kuyie ndɔ̀ɔ̀ dɛ̀ bɑ̀ɑmu bɛ̀ bo dɛ̀ dɛɛtɛ́nɛ̀mɛ̀ mɛfɛ̃́ṹtímɛ̀ kɛ̀ dɛ̀ɛ yɛ̀ mɛ kó tidɑɑtì kɛ́wɛ̃nnɛ́nɛ̀ Kuyie nkó ibí mɛom̀pùmɛ̀.

²²Ti yɛ̃́mu kɛ do nnɛ̀ dimɔ̀nnìní Kuyie ndɔ̀ɔ̀ dɛ̀ dɛmɔu yo mmɛsémmɛ̀, kɛ fɛ̃́ũ̀rì onitipòkù ɔ̃ mpɛí kɛ fɛ̃́ṹrì mɛ̀ɛ̀ botí.

²³Dɛ̀ í tú Kuyie ndɔ̀ɔ̀ dɛ̀ dɛɛ̀ mɑ́ɑ̀ fɛ̃́ũ̀rì, tínti bɛ̀ɛ̀ niitɛ́ kɛ mɔ̀ɔ̀tɛ Kuyie mpɑ̃nnì Muyɑɑ́nsɑ̀ɑ̀mù, ti múnkɛ fɛ̃́ũ̀rìmu kɛ bɑɑ Kuyie mbo dɛɛtɛ́ dìì yiè ti kɔ̃̀ntì pɑ́íí, kɛ ti túótɛ́ kɛ́dɔɔ̀ ku bí.

²⁴Yíe nti cootɛ́mu kɛ̀ ti cootímɛ̀ mɔ́mmɔmmɛ nɛ́ kpɑɑní kɛ̀ ti mɛ̀ bɑ̀ɑ. Kɑ̀ɑ yɑ̀ dɛ̀mɑrɛ̀ ɑ tɛ̃́nkɛ ɔ̃ɔ̃ í ndɛ̀ bɑ̀ɑ.