Rom 8:5-24

⁵La ning la mur a turai a lalaun, a nuknukinla otleng i kes ka ana utna ning a turai a lalaun i mang suri. Ika, la ning la mur a nuknuk ana Talngan Tabu, a nuknukinla i kes ana utna ning a Talngan Tabu i mang suri.

⁶Esining a nuknukna i mur ka a turai a lalaun ir mat. Ika, esining a nuknukna i kes nahai a Talngan Tabu, ir laun pa ir kilang a bal molmol.

⁷Esining a nuknukna i mur a turai a lalaun, i a hirua ane God. Anasa esining a nuknukna i manglarning, bel i anatarna pasi nahai a Warkuraila ane God, pa bel ir tolsot pasi.

⁸Pa la ning la kes nahai a turai a lalaun, bel lar agasgas lar pas e God.

⁹Ika mulo, bel mulo kes nahai a turai a lalaun. Ning a Inguna e God i laun ting o mulo, mulo kes nahai a Talngan Tabu. Ika, ning tik, a Inguna e Karisito bel i laun ono, i bel ane Karisito.

¹⁰Ning e Karisito i laun ting o mulo, a palaomulo ir mat, anasa ana toltol laulau, ika a ingumulo ir laun, anasa mulo tostos namatana.

¹¹A Inguna e God, ning i akamtur pas e Iesu kusun a minat, i laun ting o mulo. Pa esaning i akamtur ulak pas e Karisito kusun a minat, ir saran a lalaun ting na palaomulo ning i sira mat. Ir sarani ana titol ana Inguna ning i laun ting o mulo.

¹²I maining a tastasikla, dala na tena titol. Ika bel dala na tena titol ana turai a lalaun, sur dalar muri.

¹³Anasa ning mulo mur a turai a lalaun, mulor mat. Ika ning ana rakrakai ana Talngan Tabu mulo umkol a toltol laulau ana palaomulo, mulor laun.

¹⁴Anasa la ning a Inguna e God i nigon la, la na natnat e God.

¹⁵Anasa a Talngan Tabu ning mulo kibasi, bel ulak ma sur mulo na tena titol oros ana matmataut. A Talngan Tabu ning mulo kibasi sur mulo na natnat e God, ning i ras pas mulo. Pa ana rakrakai ane God dala sira atongi mang, “Aba, Tata.”

¹⁶Pa a Talngan Tabu i warwara talapor te na ingundala mang dala na natnat e God.

¹⁷Pa ning dala na natnatnala, dalar kibas a ututnala ning e God ka lele tar ono. Dalar kibasi taum o e Karisito. Ning dala kilang a mamahat taum o e Karisito, lamur dalar kes taum onoi ting na nuna matatar.

¹⁸A tasmani mang a wakak a matatar ning lamur e God ir apuasai tetek dala, ir itna kol tana mamahatla ning onone dala barati.

¹⁹A kidol a akakes rop i harnanai pa i mang kol sur a pukakiar ning e God ir apuasa na natnatnala.

²⁰Anasa a akakesla rop la kes ana dodot na minat pa la utna oros ka. Bel a nuknuk anuna akakesla, a nuknuk e God ot sur lar harnanai sur a pukakiar,

²¹ning e God ir paksen la kusun a dodot na marase pa minat. Ir alangolango dala na natnatnala kusun a minat, pa a akakesla lar kes taum ondala ting na wakak a matatar.

²²Dala tasmani mang tuk onone a kidol a akakes la harnanai taum ana tinangis, arlar ana hane ning i pele ana kankan sur ir agon.

²³Pa bel a akakesla ka, dala otleng, ning e God ka saran tar a ningnigo na artabar tetek dala, a Talngan Tabu, dala otleng dala harnanai taum ana tinangis te na balandala, pa dala mang kol sur a pukakiar ning e God ir apuasa i mang dala na natnatnala, pa ir alangolango a palaondala.

²⁴E God ka alaun pas dala, pa onone dala harnanai ana tortorot sur a ngas a lalaun ning ir sarani tan dala lamur. Ning tik ir harnanai sur ta utna, ning ka kibas pasi, bel ir harnanai ulak suri. Esi ir harnanai sur ta utna ning ka kibas pasi?