ሮሚያ 8:5-24

⁵ባሬንቱ ኣሳቴꬃይ ኮዪያዋዳን ዴዒያዋንቱ ባሬንቱ ኣሳቴꬃባ ቆፒኖ፤ ሺን ጌሻ ኣያናይ ኮዪያዋዳን ዴዒያዋንቱ ጌሻ ኣያናባ ቆፒኖ።

⁶ኣሳቴꬃባ ቆፑሳይ ሃይቁዋ ኣሄ፤ ሺን ጌሻ ኣያናባ ቆፑሳይ ዴዑዋኔ ሳሮቴꬃ ኣሄ።

⁷ኣሳቴꬃባ ቆፑሳይ ፆሳው ኢፆ፤ ኣያው ጎፔ፥ ኣሳቴꬃይ ፆሳ ሂጌው ኤኖ ጌና፤ ቃሲ ኤኖ ጋናዉካ ኣው ዳንዳዬቴና።

⁸ባሬንቱ ኣሳቴꬃው ኤኖ ጊያዋንቱ ፆሳ ናሼቻናው ዳንዳይኪኖ።

⁹ሺን ፆሳ ኣያናይ ሂንቴንቱን ዴዖፔ፥ ጌሻ ኣያናይ ጊያዋዳን ዴዒታፔ ኣቲን፥ ሂንቴ ኣሳቴꬃይ ኮዪያዋዳን ዴዒኪታ። ሺን ኦኒኔ ኪሪስቶሳ ኣያናይ ባይናዋ ጊዶፔ፥ ሄ ኡራይ ኪሪስቶሳዋ ጊዴና።

¹⁰ሺን ኪሪስቶሲ ሂንቴንቱን ዴዖፔ፥ ሂንቴ ኣሳቴꬃይ ናጋራ ጋሱዋን ሃይቄዳዋ፤ ሺን ሂንቴ ኣያናይ ፂሎቴꬃ ጋሱዋን ሂንቴንቱን ፓፃ ዴዔ።

¹¹ሺን ዬሱሳ ሃይቁዋፔ ዴንꬄዳ ፆሳ ኣያናይ ሂንቴ ጊዶን ዴዖፔ፥ ሃይቁዋፔ ኪሪስቶሳ ዴንꬄዳ ፆሳይ ቃሲ ሂንቴንቱን ዴዒያ ባሬ ጌሻ ኣያናን፥ ሃይቂያ ሂንቴ ኣሳቴꬃዉካ ዴዑዋ ኢማና።

¹²ሲሚ ታናዳን ኣማኒያዋንቶ፥ ኑኒ ኣጩዋና ዴዔቶ፤ ኑ ኣሳቴꬃይ ኮዪያዋዳን ዴዓናው ኑሲ ቤሴና።

¹³ኣዪሲ ጎፔ፥ ሂንቴ ሂንቴ ኣሳቴꬃይ ጊያዋዳን ዴዖፔ፥ ሂንቴ ሃይቃና፤ ሺን ሂንቴ ሂንቴ ናጋራ ኦሱዋ ጌሻ ኣያናን ዎꬎፔ፥ ፓፃ ዴዓና።

¹⁴ፆሳ ኣያናይ ካሌꬂያ ኡባቱ ፆሳ ናና።

¹⁵ኣዪሲ ጎፔ፥ ኑኒ ኑ ኮሻ ꬎቁ ኦꬂዴ፥ «ኣባ! ታ ኣቦ» ያጊዴ ፄሲያ፥ ኑና ፆሳ ናና ኬሲያ ጌሻ ኣያና ፆሳፔ ኣኬዶፔ ኣቲን፥ ላዔꬁዋ ያያናው ኣይሌ ኬሲያ ኣያና ኣኪቤይኮ።

¹⁶ፆሳ ኣያናይ ባሬ ሁጴው ኑ ኣያናና ጊዲዴ፥ ኑኒ ፆሳ ናና ጊዲያዋ ማርካቴ።

¹⁷ኑኒ ኣ ናና ጊዶፔ፥ ኢ ባሬ ኣሳው ሚንጄዳ ኣንጁዋ ላታና፤ ቃሲ ኑኒ ፆሳይ ኪሪስቶሳው ሚንጄዳዋካ ኣናና ላታና፤ ኑኒ ኪሪስቶሳ ዋዪያ ኣናና ሻኮፔ፥ ኣ ቦንቹዋካ ኣናና ሻካና።

¹⁸ኣዪሲ ጎፔ፥ ኑኒ ሃዒ ዋዬቲያ ዋዪያ ኑሲ ሲንꬃፔ ቆንጫና ቦንቹዋና ጋꬃናው፥ ኡባካ ዳንዳዬቴና ጋዴ ታኒ ቆፓይ።

¹⁹ፆሳይ ሜꬌዳ ሜꬌታ ኡባይ ፆሳ ናናይ ቆንጫናዋ ሎይꬂ ላሞቲ ኡቴዳ።

²⁰ኣዪሲ ጎፔ፥ ሜꬌታ ኡባይ ማዱ ባይናባ ጊዳናዳን፥ ፆሳይ ኣ ቦላ ፒርዴዳ፤ ሲንꬃፔ ዴማና ጊዴ ናሼቻን ናጊ ኡታናዳን ኡዴዳ ፆሳይ ኮዬዳ ዲራው ሃኔዳፔ ኣቲን፥ ሜꬌታ ኡባይ ባሬ ሁጴው ኮዬዳዋን ጊዴና።

²¹ሜꬌታ ኡባይ ባሬ ሁጴው ባሻ ኣይሌቴꬃፔ ኢቲ ጋላሲ ኬሳናዋ፤ ቃሲ ሄ ሜꬌታቱ ፆሳ ናናይ ኣይሌቴꬃፔ ኬሴዳ ቦንቾ ኬሳ ሻካና።

²²ኣዪሲ ጎፔ፥ ሜꬌታ ኡባይ ኢቲፔ ሃዋ ጋካናው፥ ማጫ ኣሳ ዬሉ ኦይቂና ኦሊያዋዳን፥ ሳኩዋን ኦሊያዋ ኑኒ ኤሬቶ።

²³ቃሲ ሄዋ ፃላላ ጊዴና፤ ኑኒ፥ ጌሻ ኣያና ፆሳ ባይራ ኢሞታዳን ኡዲዴ ኣኬዳዋንቱ፥ ኑ ሁጴው ቃሲ ፆሳይ ኑና ባሬ ናና ኦꬃናዳኒኔ ኑ ኩሜንꬃ ኣሳቴꬃ ዎዛናዳን ናጊዴ፥ ኑ ጊዶን ኦሌቶ።

²⁴ኣዪሲ ጎፔ፥ ኑኒ ፆሳይ ኢማና ጌዳዋን ኣቴዶ። ሺን ኑኒ ፆሳይ ኢማና ጌዳዋ ቤዖፔ፥ ያቲና፥ ሄዌ ናሼቻን ናጊያዋ ጊዴና፤ ኣዪሲ ጎፔ፥ ባሬ ቤዒያዋ ዴማና ጊዴ፥ ናሼቻን ናጊያዌ ኦኔ?