Roma 8:5-24

⁵Riy maka kmori-kdari rlernohora yehwa rimormiorni de, de nwaror mamain to'a yehwa rimormiorni maka yotyotni-yatyatni maka ka'hira la ralma-riorni. Mere riy maka kmori-kdar lia Uplerlawna Nhiw Lululli wniayownohorni, de nwaror nana mamainia hya' ed maka Uplerlawna Nhiwni Ha Nwayow nohora.

⁶La la'pa ralma-riormi de nden rer mamain la yehwa rimormiormi mak kod miy lia do'a-hala, de hota mlier la matmiati-molmuolu plalahwa. Mere la'pa ralma-riormi nden rer mamain la Uplerlawna Nhiwni wniayownohorni de miy ihrami ralamni hota namtiertiernu, me hota mmiormiori pa nodi liarni.

⁷Riy maka ralma-riorni nden rer lia ralma-rior rimormiorni mak kodi do'a-hal de, de riy de hota nora Uplerlawna ra'ara yoma riy de edonna nru'u-ntowar la Uplerlawna deullu-tatarni. La'pa niwra nlernohora deulu-tatra de nek de ta'en niana.

⁸Riy mak kmori-kdari rlernohora yehwa rimormiorni, ta'eni nhi' nana hya' ed mak kla' nana Uplerlawna ralam kalwiedni.

⁹Mere miy edonna mmiormiori pa mliernohora yehwa rimormiormi mak kodi miy lia do'a-hala. Miy e mliernohora Uplerlawna Nhiw Lululli yala'ani, yoma Uplerlawna Nhiwni ed mak kagengen lia miy inonmi. Mpiahniorta! Riy mak kakleha Yesus Kristus Nhiwni de, riy de, Yesus Kristus gahani atia' e'a.

¹⁰Hota miy inonmi nmati yoma la' do'a-hala mere la'pa Yesus Kristus etla miy ralammi de hota miy mliernan mormiori plalahwa pa nodi liarni. Hota mliernan mormior die, yoma Uplerlawna Net olek la de mlier wut lia mak kaplol la E yamkekni pa mior E' pa mkialwied owa'ana.

¹¹Uplerlawna Nhiwni, mak kamori-kalewna Yesus la matmiatni ralamni, etla miy ihrami ralamni, pa hota Uplerlawna mak kamori-kalewna Yesus Kristus la matmiatni de, hota ed maka kamori-kalewan walia miy inonmi mak kler la matmiati ralamni. Hota Enhi' nana de yoma Nhiwni mak kmormior lia miy inonmi de.

¹²La' hade pede, ina-nara ama-hyali, itlernana Uplerlawna Nhiwni mak khopna pa itsi'a-tyapia samomuou. Mere edonna Nhopn it pa totpena itlernohor it yehwani rimormiorni mak kodi it la do'a-hala ralamni.

¹³Yoma hota la'pa miy e mliernohora yehwa rimormiorni de hota mlier la matmiati-molmuolu plalahwa. Mere la'pa mdien rer lia Uplerlawna Nhiwni de, totpa la talan emkade pede miy edon mliernohor owa'ana nhiolmi-lietmi maka khi' do'a-hal de, de hota mlier la mormiori plalahwa.

¹⁴Riy maka Uplerlawna Nhiwni Nodia de Uplerlawna upni-a'nani irhatta.

¹⁵Itamkek memna hadi yoma Uplerlawna Nhiwni maka Enala mai it de, hota edonna Nhi' it pa tamta'ata pa emeknekama upa-matroma mak khi' atni pa namta'ata. Rwaldioinia de, Uplerlawna Nhiw Lululli Nhi' itla' Uplerlawna upni-a'nani. Pa hota la' Nhiw de hihi'ini de, pede itpolga Uplerlawna la it Amni maka Nsayni ita.

¹⁶Uplerlawna Nhiwni orgahani ed mak kar lia ita ralma-riorni pa Nakot nohora it di de Uplerlawna upni-a'nani ita.

¹⁷Ne la' it de E a'nani ita, de hota it er maka klernana ra'ani-pallu pripanni-fa'anni la E'a pa emeka re'a-tniaru maka ina-ama rhi'taru la'a upni-a'nani. Hota itlernan hya' ed maka Uplerlawna Nhi'targa la'a Yesus Kristus. Itora Yesus Kristus rewre'wa pa itler la kropna-krieutu yawuhi-yawe'eta pede hota it mana tler walia ya'uli-yawedi pa emekwalia E'a.

¹⁸Ina-nara ama-hyali, mormiori-dardiari maka khita-krepra klipa-ka'ma maka hota Uplerlawna Nala de, hota narehi lawlawan meman la'a lui-nuhru polpuolu-wakwaka honona maka itlernan olek la' lera-mela ri. Pede la' a wniaro'ru de la'pa itwaror nohora hare honona mak hota Uplerlawna Nala de, de it luini-nuhranu ri edon rrekan nan wali.

¹⁹Hya'-hya' honona maka Uplerlawna Nakoki-nayap niana la noheri woru-lyanti nayanni mana rwewiei-rnarnara la'a hya' ler ed maka Uplerlawna hota Ntutga de upni-a'nani ita.

²⁰Yoma noh di nor mniotni e rolin doini oleka pa hota edon nlernan samomuounu maka Uplerlawna Nwaror nan ulga pa noh di nlernana. Mere emeknekama noh di mniotni edonna nodia ralma-rior wamueheni mere onnila Uplerlawna ed maka kolin doini nohkeran di pa emkade. Mere la'pa emkade ho'mana emeknekama maka Ha Nakoki-nayap niana re nhia'argenni eda di,

²¹de totpa hota Uplerlawna Nollia noh di mniotni pa edonna rler owa'an la wnieyata-wnianiawu, matmiati-molmuolu, gehpa-ta'la totpa hota ror wutga Uplerlawna upni-a'nani rler la ha samomuou meman de.

²²Ita tatga de, la' ululu memna la'pa ntutu-nte'ewa la dodo'ondi mana, ora-au, nhiuri-wnia'ana la'pa hare honona maka Uplerlawna Nakoki-nayap niana emeknekama e rkoko'a-rherera yoma e ramehra, pa hota emeknekama patke'a ida mak kamehra-kamau niohora nayoria a'nani.

²³Ne edon riwra hare to'a mere makpesiay it hononit mana it ihranu ralamni e nko'a-nkakur wali. Yoma itlernan oleka Uplerlawna Nhiwni maka Uplerlawna Nala mai ita pa emeka ra'ani-pallu mak kala' ulu, mere ita twewiei-tnarnar ma'ta ler maka Uplerlawna Nala ra'ani-pallu korni maka Uplerlawna Nano'targa la E a'nani ita, de hota itlernan inon warwuaru mak hota edon kmati owa'ana.

²⁴Yoma mulaliaini la' ler maka itpesiay de it tsa'ar it aranni la' hota itlernan hya' ed maka Uplerlawna Nano'taru de mai ita. Mere la'pa hya' ed mak it tsa'ar it aranni de, itlernan oleka wa, de it edon twaror owa'ana hade. Yoma riy edonna rha'ar aranni la hya' maka ha rlernana oleka hade wa.