RUUMIYA 8:5-24

⁵Haali/ uni gwansan kun ’ko ’ko’d e buŋgwar is mo tani dhuna dum buni ki to gi buŋgwar is mo. Hili uni gwansan kun ’ko ’ko’d e Shi/in mo tani dhuna dum buni ki to gi Shi/in mo be.

⁶Mmodhuwa du ’ko’di buŋgwar is mo tani ta mowu mo be. Hili mmodhuwa du ’ko’di Shi/in mo tani a’di ita mondiki/e mo dhali moŋḵu’th is mo be.

⁷Haala du c̱aan jin karu ’ko’d e buŋgwar is mo tani a’di ta ’kup̱ ka Arumgimis mo. A’di diki gam me’d ki gwoŋḵan ma Arumgimis jin c̱inu mo. Ka jiŋ gana/ a’di moli mii mo be.

⁸Dhali uni gwansan kun ’kon e buŋgwar is mo tani uni molona Arumgimis ’bor bwa i is mo be.

⁹Hili um ’koki ’ko e shuman gi buŋgwar is mo. Um ’kon e Shi/in mo be waḵki/ Shi/in ma Arumgimis ka jiŋ gana/ di’d e um mo. Wathi/ jin dara’d gi Shi/in ma Ḵrisṯẖos mo tani a’di diki ta jim piti mo be.

¹⁰Hili waḵka Ḵrisṯẖos di’d e um mo tani ba buŋgwar is bum wukin mo gom miinthus mo tani shi/in bum ’kon ki e gom mo ma ḵar/e mo be.

¹¹Waḵki/ Shi/in gi a’di jin ’de’kki’da Yesus ’peni mowu di’d e um mo tani a’di jin ’de’kki’da Ḵrisṯẖos jin ta’da Yesus ’peni mowu mo tani midi c̱i mondiki/e mo ki buŋgwar is bum kun mishi wu si’da/ mo ki Shi/in piti jin di’d e um mo be.

¹²Dhali wakan mo, iwaḵa, ana ’kon ma mure/ m’ba/ mo, yisa gom buŋgwar is yisa mmobaṯẖa ana buŋgwar is yan mo be.

¹³Haali/ waḵki/ um ’ko ’ko’d e buŋgwar is mo tani um mini wu mo be. Dhali hili waḵki/ ki Shi/in mo tani um ki ’kosh mii gi buŋgwar is jwa mo a’di imina umi ’ko e mo.

¹⁴Haala ris uni gun shuna Shi/in ma Arumgimis bway mo tani uni ita iya/ ma Arumgimis mo be.

¹⁵Haali/ um ’koki bu’th shi/in mmota c̱iŋkina/ doḵ/e mmobiṯ mo e mo ma ḵo/ is mo. Hili um bu’thki shi/in mmota iya/ mo. Me’d jin gwokina ana mo ki: Abba Ababa.

¹⁶A’di ta Shi/in ki is piti jin oki gwo nyaḵki shi/in bana ki ana tana uc̱i ma Arumgimis mo be.

¹⁷Dhali waḵki/ ana tana uc̱i kan mo tani ana tana imanḵal mal mo, imanḵal mal ma Arumgimis mo dhali imannyaḵ mal ḵal ka Ḵrisṯẖos waḵki/ ana mina isi ’kosh ka nyor nyaḵki a’di mo ki ana minu nyaḵ dhu ki ca ki a’di mo.

¹⁸Aha/ ṯosha ki mo gi isa nyor jin di’d shwane/ diki ha me’d mmodhu ka p̱ar ’ban ki monyca jin minu ṯor ana eya tente/ yilaŋ kamu/ mo.

¹⁹Haali/ to kun uḵu mo tani uni c̱orkina c̱or ki mo/o bwa ki ’bi’th gom mo jin minu ṯor uc̱i ma Arumgimis eya tente/ mo be.

²⁰Haala ris to kun uḵu ’kon mmogam me’d mo mmowar mmop̱u/ mo be. Uni yisa ki bwam buniŋ gana/ yisa, hili ki bwa gi a’di jin dhu uni ki mo ma ’teŋ kap̱e/ mo.

²¹Haali/ to gun uḵu uni, ki is buni minu ’cuḵ mo ’peni mondeḵ buni gi momp̱u/ mo dhali bu’th mo jin dhunuwa dhu ki ’kus mo gi monyca gi uc̱i ma Arumgimis mo be.

²²Ana misha ki aris to gun uḵu oḵonkin mo ki isa nyor ma dho’th imonṯal ’de/ mo ntagi shwane/ mo be.

²³Dhali yisa jasi to gun uḵu uni ’cena, hili ana ki is bana mo, ana gun takina maman gi Shi/in nṯwaa/a/ mo oḵonkina isi bwaman mo me’d jin c̱orkina ana ac̱or gom mo jin budhuwa bu’th ka bas gi iya/ mo jin ta mo gi wanu buŋgwar is bana ’ba/ mo be.

²⁴Haali/ e mo ma ’teŋ kap̱e/ yan mo tani ana takunu is ki me’d mo be. Hili mo ma ’teŋ kap̱e/ jin mishu mo tani a’di diki ta a’teŋ kap̱e/ ’te/ mo. Haali/ a’dija jin ta’d ga ’teŋ kap̱e/ gom to jin misha a’di mo?