Men Rom 8:5-24

⁵Pwe me kijan pali uduk, kin lamelame duen inon en uduk, a me kijan pali Nen, kin lamelame duen inon en Nen.

⁶Pwe tiak en uduk iei mela, a tiak en Nen maur o popol.

⁷Pweki tiak en uduk kin palian Kot, pwe a jota kin duki on kapun en Kot, pwe a pil jota kak on.

⁸A me kijan pali uduk, jota kak konekon ren Kot.

⁹A komail kaidin kijan pali uduk, pwe kijan pali Nen, ma Nen en Kot kotikot lol omail. A me jota aneki Nen en Krijtuj, i kaidin japwilim a.

¹⁰A ma Krijtuj kotikot lol omail, war mekilar dip, a nen memaureki pun.

¹¹A ma Nen o, me kaiajadar Iejuj jan ren me melar akan, kotikot lol omail, nan i me kaiajadar Krijtuj jan ren me melar akan, pil pan kamaureda war omail mela ki Nen e, me kotikot lol omail.

¹²Ari ri ai kan, kitail jolar pwaipwand on pali uduk, pwen kapwaiada inon en uduk,

¹³Pwe ma komail memaureki uduk, komail pan mela, a ma komail pan kamela wiawia en pali war ki Nen, komail pan memaureta.

¹⁴Pwe karoj me weweideki Nen en Kot, nan irail jeri en Kot akan.

¹⁵Pwe kaidin nen en ladu, me komail aleer, pwen pur on majak, a Nen en jeri, me komail aleer, me kitail kin eker kida: Apa, Jam!

¹⁶Pein nen o kotin ian nen atail kadedeki, me kitail jeri en Kot akan.

¹⁷A ma kitail jeri kan, nan kitail pil jeri en jojo, jeri en jojo en Kot o kijan toun jojo en Krijtuj, ma kitail ian kamekam, kitail pil pan ian linanla.

¹⁸Pwe i ajaer, me kamekam en anjau et jota mau on en kaparoki on linan kokodo, me pan kajanjaledan kitail,

¹⁹Pwe audepan jappa poden anane kaualap papajan en jeri en Kot ar pan maioda.

²⁰Pwe audepan jappa o panalan mela, kaidin pweki pein injen arail, a pweki i, me pan ir alan kaporopor.

²¹Pwe audepan o pil pan maioda jan ni a lidulidui on tiak en joredi, on maio en linan en jeri en Kot akan.

²²Pwe kitail ajaer, me audepan jappa karoj kin janejanlol o mimi pan wairok en naitik lao lel met.

²³A kaidin irail eta, pwe kitail pil ian, me mejenin Nen, pil pein kitail kin janejan, auiaui lao anjau en pali war atail ar kawilikapada.

²⁴Pwe kitail kamaurelaner kaporopor. A kaporopor me janjal, i kaidin kaporopor; pwe me amen kin ududial, menda en kaporoporeki?