ROMANOS 8:5-24

⁵Na' nanee no nonle' na' le' mèn co' ante nzi tee ban li xalque' nac con' ye'rsin' co' ndli ndyub yo'f lezo' mèn ndli mèn, con'a nacpe' co' ndli mèn xal ndryo' ndlyen' lezo' mèn. Per mèn co' ndoo lezo' nzi tee ban xal ñibe' Xpii Natú' loo mèn, mèna ndlipe' ante con' co' ñibe' Xpii Natú' loo mèn li mèn.

⁶Tac chele' mèn más ye'th lezo' li mèn con' ndyub yo'f lezo' mèn co' nac cón che'n xab izlyo', con'a càb loo mèn par tith co' xà' Diox mèn loo Diox co'se' yilo gath mèn. Per chele' mèn más ye'th lezo' li mèn xal ñibe' Xpii Natú' loo mèn par li mèn, le' sya, con'a li càb loo mèn le' mèn yòo ban no Diox thidtene co'se gath mèn no càba loo mèn, ne, cue ban mèn rye nda mèn no rye ndye'th mèn làth xtàa mèn no càba loo mèn yu' yàl lezo' mèn loo Diox.

⁷Mèn co' ante ndoo lezo' li mèn con' co' ndyub yo'f lezo' mèn li mèn co' nac cón che'n xab izlyo', mèna nac ngolo ngola's che'n Diox. No ndxòo xyàn lezo' mèna ñèe mèna cón che'n Diox co'se' ndxòn mèna cón che'n Diox. Tac ne' ne' indlya's mèna tyal mèna tyubdi's mèna loo Diox. No ne' ne' gác mèna ta' mèna lugar ñibe' Diox loo mèna.

⁸Cona, ngue niin loo gu': Mèn co' más nda' gust lezo' co'se' ndli mèn con' co' ndyub yo'f lezo' mèn co' nac cón che'n xab izlyo', mèna ne'gácte li con' ndac co' li par yòo lezo' Diox ñèe Diox mèn.

⁹Per nalle', gu' ya inzi tee ban lide xal nac con' co' nac cón che'n xab izlyo' co' ndli par ndyub yo'f lezo' gu' par li gu' chol con' ye'rsin'. Ndxe'leque', nzi tee ban gu' xalque' nac co' ñibe' Xpii Natú' loo gu' por mda' gu' lugar no mdyal gu' nzo Xpii Natú' che'n Diox loo gu' nalle'. Na nii loo gu': Loo mèn co' inzode Xpii Natú' che'n Crist, mèna inacte che'npe' Crist.

¹⁰Chele' Crist nzoque' loo gu' por cón che'n Xpii Natú', lìcpe' ba'i, mastale' nquin gath bél'yòo ladpe' gu' por cón che'n xquin no xtol co' ngòo loo ryete mèn, thidteneque' yòo ban xpii gu' no alm gu' loo Diox tac Diox mdyal no mda' Diox lugar ngòo gu' loo cón che'n Diox. No nac gu' mèn nalì no mèn nambìi loo Diox.

¹¹Chele' Xpii Natú' che'n Diox co' mblo xban Jesús làth mèn nguth nzo loo gu' par ñibe' Xpii Natú' loo gu', le' sya, yub Diox co' mblo xban Crist Jesús làth mèn nguth, Diox li par ryo xban bél'yòo ladpe' gu' co' non gu' gathque'. Li Diox gàc con'a loo gu' por cón che'n Xpii Natú' che'n Diox co' naban le'n lezo' gu'.

¹²Per nalle', ngue niin loo gu', mèn huesen por cón che'n Jesucrist: Nzo thìb con' co' anze'f nquin li na'. Con'a nee di's: Ne'tolode que tee ban na' par tyub yo'f lezo' na' loo cón che'n co' nac xab izlyo'.

¹³Tac chele' gu' be' nzi tee ban li xalque' nac cón che'n co' nac xab izlyo' co' ndyub yo'f lezo' gu', sya, tith co' xà' Diox gu' loo Diox co'se' gath gu'. Per ndxe'leque', chele' gu' li ante co' ñibe' Xpii Natú' loo gu' par ne'tyubte yo'f lezo' gu' loo cón che'n co' nac xab izlyo', sya, yòo ban noque' gu' Diox thidtene.

¹⁴Ryete mèn co' nzi tee ban lique' xal ñibe'pe' Xpii Natú' che'n Diox loo mèn par li mèn, mèna nac xin'pe' Diox.

¹⁵Xpii Natú' co' ngulàale' loo gu'a, ne'nglide Xpii Natú' par tolo zyeb gu' le' Diox tetìi gu' yiloa xal mbli chol xpii ye'rsin' loo gu' par mzyeb gu' ndoore' yila's gu' loo cón che'n Diox. Ndxe'leque', Xpii Natú' co' ngulàale' loo gu'a mbli le' gu' nac xin'pe' Diox. No por cón che'n Xpii Natú'a, mbez na' loo Diox: Pay, co'se' mbez na' Diox.

¹⁶Leque yub Xpii Natú' ndlu' loo na' no nda' Xpii Natú' cuent loo na' cón che'n leque con' co' nden' na' le'n lezo' na' le' na' nac xin'pe' Diox.

¹⁷Por nac na' xin'pe' Diox, gàc che'npe' na' ryethe con' co' mxèn' Diox no ryethe con' co' nac che'npe' Diox, con' co' mcàbgòn Diox gàc che'npe' na'. Thidte gàc che'npe' na' con yub Tad Crist ryethe con' co' mxèn' Diox no co' nac che'npe' Diox. Chele' loo na' gàc ngòc nguàal con' por cón che'n Crist nalle' xal mbli mèn ngòc nguàal con' loo Crist, loo na', ne, gàc con' roo con' xèn yiloa xal ndxàc con' roo con' xèn loo Crist nalle'.

¹⁸Per nalle', ndyaquen le' cón che'n con' co' ndyactìi na' le'n tiemp ndxè' ne' por chu'th ne'ta'de co' ndyactìi na' por con' roo con' xèn co' yú' loo na' yiloa no co' gàc loo na' yiloa.

¹⁹Ryete con' co' mxèn' Diox loo izlyo' nzi bed no nzi quee lezo' axta co'se' zin huiz no zin ze lu' Diox mèn co' nac xin' Diox loo taamas mèn, lìcque', nac mèna xin'pe' Diox.

²⁰Tac ryete con' co' mxèn' Diox mquedèe Diox no ngoza' con' mblec Diox no ngòc con' co' mblec Diox thìb con' co' yende cón ntac. Per ne'ngàcte con'a loo con' co' mxèn' Diox xal con' co' angngòc. Ndxe'leque', ngòc con'a loo con' co' mxèn' Diox xal mnibe'pe' lezo' Diox. Per mastale' tataa mbli Diox ngòc con'a loo con' mblec Diox, Diox mbli le' mèn ngure quee lezo' bere gàc con' ndac loo ryethe con' co' mxèn' Diox yiloa.

²¹Diox mxèn' ryethe con' no mblec Diox ryethe con'. Per zin thìb huiz no zin thìb ze li Diox par lyá' ryethe con' mblec Diox loo con' co' nac con' xin no con' co' nac con' cap no con' co' nac con' ye'rsin' co' ndli xol no co' nteza' loo con' co' mxèn' Diox no co' mblec Diox loo izlyo'. Syare', gàc con' roo no con' xèn loo con' mxèn' Diox tac tiempa ya ne'tolode gàc más con' ye'rsin' no ya ne'tolode tyactìi con' co' mxèn' Diox. Gàc con'a loo con' mxèn' Diox no loo con' mblec Diox xalque' gàc con' roo no con' xèn loo mèn co'se' yende chó con' ye'rsin' nzo co' li par cua'n mèn xquin mèn no xtol mèn, mèn co' nac xin'pe' Diox, co'se' gàc huiza no tiempa.

²²Na' nanee no non na' axta nalle' be' ndyactìi rye loothe con' co' mblec Diox no co' mxèn' Diox xal ndxàca loo thìb xa'got co' nden' yalnè co'se' ndub tan xin' xa'got.

²³Iante ndxàca ndyactìi rye loothe con' co' mxèn' Diox xal ndxàc loo thìb xa'got co' ndub tan xin'. Ndxe'leque', nden' na' ndxàca tataa loo na', ne, ¿lé'?, mastale' nzo Xpii Natú' loo na'. Mastale' nac Xpii Natú' nerleque' thìb con' co' làa Diox loo na', yiloa tolo ta' Diox más con' ndac loo na' por cón che'n Xpii Natú'. Per nalle', nden' na' thìb yalnè axta le'n lezo' na' cón che'n yaltìi co' ndxàc loo na'. Per mastale' ndxàc con'a loo na', nzi quee lezo' na' axta co'se' gàc hor hui' ñaa mèn loo na', lìcque', nac na' xin'pe' Diox. Axta syare', gàc tiemp co'se' zye' loo loo bél'yòo ladpe' na' par ya ne'tolode tyactìi na' no ya ne'tolode gàc yalnè loo na' no ya ne'tolode gàc yalquìi loo na'.

²⁴Tac co'se' ngolo ngola's na' loo Crist no loo cón che'n Crist, mcàba loo na' ngure quee lezo' na' le' na' lyá' loo rye yaltìi no yalquìi no yalnè co' ndxàc loo na' nalle'. Per chele' mèn ngüi'pe' loo con' co' nzi quee lezo' mèn, le' sya, ya inzi queede lezo' mèn más loo con' co' nzi quee lezo' mèn. Tac co'se' ngüi' mèn loo con' co' mbez mèn nzi quee lezo' mèn, ya ne'tolode cue quee lezo' mèn loo con'a, ¿lé'?