ROMANOS 8:5-24

⁵Nu loꞌo cuaꞌni na ñiꞌya̱ nu nduꞌni ñati̱ chalyuu ti, la cuiꞌ chaꞌ cuxi nu ntsuꞌu jiꞌi̱ ñati̱ biꞌ, biꞌ laca loo neꞌ cresiya jiꞌna liꞌ; pana si Xtyiꞌi ycuiꞌ Ndyosi laca loo jiꞌna loꞌo ndiꞌi̱ na chalyuu, liꞌ taca taquiyaꞌ na jiꞌi̱ lcaa chaꞌ nu nchcuiꞌ ycuiꞌ Ndyosi.

⁶Chcunaꞌ chalyuu jiꞌna, si xcuiꞌ cuaꞌni na chaꞌ cuxi nu ntsuꞌu nde chalyuu ti; pana caja chalyuu cucui jiꞌna chaꞌ ti̱ ti tyiꞌi̱ tyiquee na, si taquiyaꞌ na jiꞌi̱ lcaa chaꞌ nu nchcuiꞌ ycuiꞌ Ndyosi.

⁷Tyaꞌa cusu̱u̱ ycuiꞌ Ndyosi laca na, si ñaꞌa̱ ti nduꞌni na chaꞌ cuxi ñiꞌya̱ nu nduꞌni ñati̱ chalyuu ti; ná nchca jiꞌna tsiyaꞌ ti taquiyaꞌ na jiꞌi̱ chaꞌ nu nda ycuiꞌ Ni loꞌo na, si ñaꞌa̱ ti tya ntiꞌ na cuaꞌni na chaꞌ cuxi.

⁸Biꞌ chaꞌ ná taca jiꞌna cuaꞌni na cña nu ntiꞌ ycuiꞌ Ni chaꞌ cuaꞌni na, si tiji̱ꞌ tsa tiꞌ na jiꞌi̱ chaꞌ cuxi nu ntsuꞌu chalyuu.

⁹Ngaꞌaa siꞌi juaꞌa̱ ndiꞌi̱ ma̱ juani, ngaꞌaa nchca tiji̱ꞌ tiꞌ ma̱ jiꞌi̱ chaꞌ cuxi nu ntsuꞌu nde chalyuu; stuꞌba ntsuꞌu chaꞌ jiꞌi̱ ma̱ loꞌo ycuiꞌ Ndyosi juani, chaꞌ cua nda ycuiꞌ Ndyosi Xtyiꞌi Ni chaꞌ tyanu neꞌ cresiya jiꞌi̱ ma̱. Loꞌo juaꞌa̱ ná ntsuꞌu chaꞌ jiꞌna loꞌo Cristo tsiyaꞌ ti, si bilya tyanu Xtyiꞌi ycuiꞌ Ni neꞌ cresiya jiꞌna, la cuiꞌ Xtyiꞌi nu ndyuꞌu jiꞌi̱ Cristo.

¹⁰Masi nguaꞌni nu cuxi nu ntsuꞌu chalyuu chaꞌ chcunaꞌ chalyuu jiꞌi̱ ma̱, pana tya luꞌú ma̱ juani, xquiꞌya chaꞌ luꞌú Xtyiꞌi ycuiꞌ Ni neꞌ cresiya jiꞌi̱ ma̱ si ntsuꞌu chaꞌ jiꞌi̱ ma̱ loꞌo Cristo. Ndyanu Xtyiꞌi ycuiꞌ Ni loꞌo ma̱ nu loꞌo ngua tsoꞌo cresiya jiꞌi̱ ma̱ cuentya jiꞌi̱ ycuiꞌ Ndyosi chacuayáꞌ jiꞌi̱ Jesús.

¹¹La cuiꞌ Xtyiꞌi ycuiꞌ Ndyosi laca biꞌ, la cuiꞌ laca nu ngulo jiꞌi̱ jyoꞌo Jesús ca su ntsiya nguatsiꞌ, ndyuꞌú yu chaca quiyaꞌ liꞌ. Loꞌo juaꞌa̱ cua nda ycuiꞌ Ndyosi Xtyiꞌi ycuiꞌ Ni chaꞌ tyanu neꞌ cresiya jiꞌi̱ ma̱, chaꞌ nu loꞌo cajaa ma̱, liꞌ cuaꞌni Ni chaꞌ tyuꞌú ma̱ chaca quiyaꞌ xquiꞌya Xtyiꞌi ycuiꞌ Ni.

¹²Cuꞌma̱ nguꞌ tyaꞌa ntsuꞌu chaꞌ jiꞌna loꞌo Cristo, juani ngaꞌaa caca jiꞌi̱ ñati̱ culo nguꞌ cña jiꞌna, chaꞌ cuaꞌni na chaꞌ cuxi ñiꞌya̱ nduꞌni ñati̱ chalyuu ti.

¹³Chcunaꞌ chalyuu jiꞌi̱ ma̱ si xcuiꞌ culana ma̱ jiꞌi̱ chaꞌ cuxi loꞌo ndiꞌi̱ ma̱ chalyuu; pana chacuayáꞌ jiꞌi̱ Xtyiꞌi ycuiꞌ Ni taca tyiji̱loo ma̱ jiꞌi̱ chaꞌ cuxi nu ntsuꞌu jiꞌi̱ ma̱, chaꞌ ngaꞌaa cuaꞌni la ma̱ jiꞌi̱. Caja chalyuu nu ná ngaꞌa̱ chaꞌ tye jiꞌi̱ ma̱ liꞌ.

¹⁴Cua ñaꞌa̱ ca na, cua laca na sñiꞌ ycuiꞌ Ndyosi si nduꞌni na cua ñaꞌa̱ ca cña nu nclyo Xtyiꞌi ycuiꞌ Ndyosi jiꞌna.

¹⁵Na cua nda ycuiꞌ Ndyosi Xtyiꞌi Ni jiꞌi̱ ma̱, chaꞌ nduꞌni Xtyiꞌi Ni chaꞌ caca ma̱ sñiꞌ ycuiꞌ Ndyosi; nduꞌni biꞌ chaꞌ ndiꞌya̱ taca chcuiꞌ na loꞌo ycuiꞌ Ndyosi: “Sti ya”, ñacui̱ na jiꞌi̱ Ni. Siꞌi chaꞌ cuxi nduꞌni Xtyiꞌi Ni nu loꞌo nclyo biꞌ cña jiꞌi̱ ma̱, siꞌi chaꞌ xcutsi̱i̱ jiꞌi̱ ma̱ ñiꞌya̱ nu ntsi̱i̱ ma̱ cua saꞌni la, siꞌi juaꞌa̱ cña nduꞌni nu biꞌ.

¹⁶Chaꞌ nu ntsuꞌu neꞌ cresiya jiꞌna ni, stuꞌba nchcuiꞌ chaꞌ biꞌ loꞌo chaꞌ nu nda Xtyiꞌi Ni loꞌo na, chaꞌ cua laca na sñiꞌ ycuiꞌ Ni.

¹⁷Nu loꞌo cua laca na sñiꞌ ycuiꞌ Ni, loꞌo jiꞌna tyacua lcaa chaꞌ tsoꞌo nu ta Ni liꞌ, lcaa ñaꞌa̱ chaꞌ nu cua nda Ni jiꞌi̱ Cristo; pana si cua ntiꞌ na chaꞌ stuꞌba ti tyiꞌi̱ na loꞌo Cristo ca su tlyu ca su ntucua Ni, liꞌ ntsuꞌu chaꞌ talo na loꞌo ndyuꞌni lyaꞌ tiꞌ nguꞌ jiꞌna nde chalyuu ti, ñiꞌya̱ ndalo ycuiꞌ Cristo loꞌo nguaꞌni lyaꞌ tiꞌ nguꞌ jiꞌi̱ yu.

¹⁸Ntsuꞌu quiyaꞌ ndyiji xi chaꞌ tiꞌí jiꞌna laja loꞌo ndiꞌi̱ ti na nde chalyuu; pana xca ti chaꞌ laca chaꞌ biꞌ, ná stuꞌba laca chaꞌ tiꞌí biꞌ loꞌo chaꞌ tsoꞌo nu caja jiꞌna ca nde loo la, ntiꞌ naꞌ. Loꞌo juaꞌa̱ tya lyiji culuꞌu Ni lcaa chaꞌ jiꞌna, ñiꞌya̱ caca chaꞌ tsoꞌo biꞌ nde loo la.

¹⁹Lcaa ca na luꞌú nu cua ngüiñá ycuiꞌ Ndyosi nde chalyuu ni, ntajatya tsa na biꞌ jiꞌi̱ ycuiꞌ Ndyosi, ni jacuaꞌ culuꞌu Ni jiꞌi̱ ñati̱ chalyuu tilaca nu chañi chaꞌ laca nguꞌ sñiꞌ ycuiꞌ Ni.

²⁰Cua ngunuꞌu̱ lcaa chalyuu; lcaa lo na nu ntsuꞌu nde chalyuu ni, ná lcaa na biꞌ ngua ñiꞌya̱ nu ngua tiꞌ ycuiꞌ Ndyosi chaꞌ caca chaꞌ biꞌ loꞌo ngüiñá Ni jiꞌi̱. Cua nguxtyanu Ni chalyuu chaꞌ tyanu juaꞌa̱ ti, masi siꞌi juaꞌa̱ ndiya tiꞌ lcaa lo na nu ntsuꞌu chalyuu biꞌ. Pana ná ngaꞌa̱ chaꞌ tyanu chaꞌ juaꞌa̱ tyucui tyempo;

²¹cua tyalaa ti sca tsa̱ nu tye lcaa chaꞌ cuxi nu nduꞌni chaꞌ quiñuꞌu̱ chalyuu, lcaa chaꞌ cuxi nu laca loo jiꞌna. Loꞌo liꞌ tsoꞌo tsa caca lcaa lo na nu ngüiñá Ni nde chalyuu, chaꞌ stuꞌba ti cuaꞌni lyaá Ni jiꞌi̱ nu na biꞌ loꞌo jiꞌna nu laca na sñiꞌ ycuiꞌ Ni.

²²Tya lyiji caca chaꞌ tlyu biꞌ, pana jlo tiꞌ na chaꞌ ntsuꞌu tsa chaꞌ tiꞌí, ntsuꞌu tsa chaꞌ quicha tiꞌ jiꞌi̱ lcaa na nu ngüiñá ycuiꞌ Ndyosi nde chalyuu. Ñiꞌya̱ loꞌo lijya̱ tiꞌí jiꞌi̱ sca nu cunaꞌa̱ chaꞌ cua cala ti sñiꞌ, juaꞌa̱ ntsuꞌu chaꞌ tiꞌí chalyuu juani.

²³La cuiꞌ juaꞌa̱ loꞌo lcaa tyaꞌa na nu ntsuꞌu Xtyiꞌi ycuiꞌ Ndyosi jiꞌna, nxiꞌya na ndiꞌi̱ na chaꞌ ntsuꞌu tsa chaꞌ tiꞌí jiꞌna juani. Na cua nda Ni Xtyiꞌi ycuiꞌ Ni jiꞌna loꞌo ndiꞌi̱ na nde chalyuu, sca chaꞌ tsoꞌo nu nda Ni jiꞌna yala la laca. Laja liꞌ ntajatya tsa na jiꞌi̱ tsa̱ tlyu biꞌ, chaꞌ cuaꞌni lyaá lyiji Ni jiꞌna, chaꞌ xcutsaꞌa̱ Ni jiꞌi̱ tyucui ñaꞌa̱ na liꞌ. Loꞌo liꞌ ta Ni su tyiꞌi̱ na slo Ni, chaꞌ cua laca na sñiꞌ ycuiꞌ Ni.

²⁴Jlya tiꞌ na chaꞌ nguaꞌni lyaá Ni jiꞌna, masi ngaꞌa̱ chaꞌ jatya na jiꞌi̱ tsa̱ tlyu biꞌ, chaꞌ cuaꞌni tye Ni cña nu ndyuꞌni Ni. Sca na nu ntajatya na jiꞌi̱ ni, loꞌo cua naꞌa̱ na jiꞌi̱, chaꞌ nduꞌu tucua chaꞌ biꞌ, ngaꞌaa ntiꞌ chaꞌ jatya la na jiꞌi̱ liꞌ; siꞌi na tya ntajatya na jiꞌi̱, na cua naꞌa̱ na jiꞌi̱ liꞌ.