1Paa mendepa deaka Jisasame endaki pete singi dosa endakali dupa mana lamaiyoo katea-pyaa. Endakali eteteaka longo mendapua ipao baa kateamo dosa kambu piami-pyaa. Dopa piaminosa baa sipi mendenya pyakalyetala ongonya peteamopa sipi doko endakinya sia-pyaa. Dopa piamopa endakali doko pitaka endaki pete lemba dokonya kateami-pyaa.
2Dokopa baame kongali lao endakali dupa mana longo lao dapa lamaiya-pyaa:
3“Nyakamame salapape! Akali mendeme ee wai lyandala pea-pyaa.
4Pupala lyandeamopa yangi kaitininya pea-pyaa. Peamo dupa yaka dupame ipupala nao eteami-pyaa.
5Yangi kana-kisa yuu epao napalengenya pea-pyaa. Yuu epao napalenge dokonyana wai dupa pupae langa lea-pyaa.
6Langa leamoaka doko, niki teamo dokome pyao nea-pyaa. Dupa pingi pyalakao napiamosa sapuiya-pyaa.
7Yangi lyiki tenge palengenya pea-pyaa. Lyiki dupa andapala ee wai dupa kuii pyambea-pyaa. Dopa piamopa dii namandea-pyaa.
8Dopaka doko, yangi lyandeamo dupa yuu epenya pupala langa lao andapala dii mandea-pyaa. Yangimi kingi ita tepoma, yangimi kingi ita tokange, yangimi andate mendai lao mandea-pyaana,” lea-pyaa.
9Dopa latala baame dokaita lamaiyoo, “Nyakama kalekaita singi dupame pii doko salapapena!” lea-pyaa.
10Maitakao Jisasa baa iki kateamopa akali kingi ita-kisa dee lapoma dupapi dee endakali baa-pipa tole kateamino dupapimi kongali pii dupanya baa pisiami-pyaa.
11Dokopa baame dokaita lamaiyoo, “Goteme baanya isingi dokonya yalo petae doko nyakama laitaka petelyamo. Dopaka doko, netesa endakali dupame dupa pitaka kongaliaka silyamino.
12Dupame kandokondape pitamiaka doko, angi doko nakandena lawapi, dupame sokondape pitamiaka doko, angi doko masala naena lawapi, dupame mona kapilyetaminopa Goteme nyakamanya koo pingi dupa kunanya nepakamaitone latala dopa pilyamona,” lea-pyaa.
13Jisasame dokaita lamaiyoo, “Nyakamame kongali pii dake masala naelyamino doko, aipa petala kongali pii waka dupa pitaka masetamipi?
14Ee wai lyandala peamo akali dokome Gotenya pii doko lyandelyamo.
15Endakali mendapua wai yangi kaitininya peamo dopalema. Endakali dopale dupame pii doko sepelyamino gii dokopaka Sataneme ipupala pii nyakama-kisa ee wai joo lyandatae silyamo doko nyoo nepenge.
16Dopaka pyoo endakali yangi dupa ee wai kana palenge yuunya peamo dopalema. Dupame pii doko sepala mona yaepao lee mendai nyingima.
17Dopaka doko, dupame moname auu pyoo masala nayao gii kuki iki katengema. Dupame pii doko watao minilyaminosa, dupa minao kenda pisowapi watao pyawapi pingima. Dopa pilyaminopa yapa yakinengema.
18Dee endakali yangi mendapua ee wai lyiki tenge palengenya peamo dopalema dupame pii doko singima.
19Singimaka doko, isa yuunya auu pyoo katapu laka lao nea kaenge dupapi, munipi oapi dupa auu kaengepi, dee opale waka nyipu laka lao masingi dupapi dupame pii doko pyalya minilyamo dokopa endakali dupame kapa pao dii namandengema.
20Dopaka doko, endakali yangi dupa ee wai yuu epenya peamo dopalema. Dupame pii doko sepala nyoo minatala dii mandengema. Yangimi kingi ita tepoma, yangimi kingi ita tokange, yangimi andate mendai lao mandengemana,” Jisasame dopa lea-pyaa.
21Dopa latala baame dokaita lamaiyoo, “Endakali mendeme lama kaiyepae mende titopene penge kokopi palenge toko pundipundipi dupanya setalanya minao epengepe? Daa, setapenge panda dokonya setalanya minao epenge.
22Doko, opale yalo petae silyamo dupa panatae seta. Opale sanga pyatae silyamo dupa lopalyetae seta.
23Nyakama kalekaita singi tamo kandao doko, pii doko salapapena!” lea-pyaa.
24Dopa latala dee baame dokaita lamaiyoo, “Nyakamame pii silyamino doko masokondape pyepape. Nyakamame endakali mende-kisa mana minataminoli pyoaka Goteme nyakama-kisa minata. Dee mana mendapua baame waipa soo minataka.
25Opale singi endakali doko konda pyoo maita. Opale nasingi endakali doko-kisa setamo dolapo nyokonyetana,” lea-pyaa.
26Dopa latala dee baame dapa lea-pyaa: “Goteme isingi doko akali mendeme ee wai yuunya lyandenge dopale.
27Baame lyandatala kuka luu palipa yuu yongelyamopa sakatata pilyamopa ee wai doko langa latala andenge. Dopa pilyamopa baame aipa petala langa lao andelyape lao nakandenge.
28Wambao yoko pingi. Dopa petala mange pyakalyingi. Mange ongonya dii lyoo wambu pingi.
29Wambu petala napenge gii doko epelyamopa akali dokome uaa pepo dokome lyingina,” lea-pyaa.
30Jisasame dokaita dapa lao pisia-pyaa. “Naimame Goteme isingi doko aipalena lamape? Aki mendepa makande pyoo kongali lamape?
31Doko masetedii dopale. Endakali mendeme masete wai doko yuunya lyandenge. Isa yuu dakenya ee wai waka dupa pitakame ita minao masete dii doko etete yakane mende.
32Dii doko lyandataesa langa latala andao ee wai waka eenya pokatae dupa pitaka ita miningi. Dokonya wangya dupa andake jilyamopa luu lelya dupanya yaka dupame kapa pao anda pingimana,” lea-pyaa.
33Baame kongali pii dopale dupa longo lao endakali dupame sepenge jiali pyoo lamaiyoo katea-pyaa.
34Baame pii mende mee lamaiya nayao kongali lawaka lamaiya-pyaa. Dopa petala baanya disaipele dupa iki kateamino dokopa kongali dupa pitakanya tenge dupa lamaita pia-pyaa.
35Gii dokondinaka alemandi Jisasame baanya disaipele dupa lamaiyoo, “Naima endaki pete dakenya omotena muaa,” lea-pyaa.
36Dopa leamopa dupame endakali kambu doko yakinatala Jisasa sipi peteamo dokonya peteta laminao peami-pyaa. Dee sipi waka mendatupa apata tole peamiaka-pyaa.
37Peaminopa poo andake mende leamopa endaki buli piamo dokome tandyuu sipi dokonya kolandea-pyaa. Dopa petala sipi doko endakimi tumbalanya pia-pyaa.
38Jisasa baa sipi ongonya maitakaita sanda mendenya aiyomba setapala palipia-pyaa. Palipiamopa dupame baa pyale tatala, “Mana Lenge Akali, naima kumalanya pilyamano doko embame angi mende daana lao masilipi?” leami-pyaa.
39Dokopa baame sakatatala poo doko kaena lea-pyaa. Endaki pete doko lamaiyoo, “Emba yatu laa! Ema napinya mee saa!” lea-pyaa. Dokopa poo doko yatu leamopa endaki kuki emapi mende napia-pyaa.
40Dokopa baame dokaita lamaiyoo, “Aipuma nyakama paka kaelyamipi? Nyakamame masoo minatala naelyamipi?” lea-pyaa.
41Akali dupa etete paka kayapala nyakamalapo lao pituu, “Poopa endakipa dolapome pii sakamaingimba lamo doko akali dake api laa kanjemape?” leami-pyaa.
