Make 3

1

2

3

4

5

6

7

8

9

10

11

12

13

14

15

16

¹Yuu mende Jisasa baa Jutamanya losuu anda dokonya deaka peamopa akali kingi kumapae mende dokonya petea-pyaa.

²Endakali mendapuame baa kosimi lamana latala baame akali doko Sambasa gii dokonya mee injisilyape lao isokondape pyoo peteami-pyaa.

³Jisasame akali kingi kumapae doko lamaiyoo, “Emba sakatatala kaina angenya ipao kata,” lea-pyaa.

⁴Dopa latala baame endakali dupa lamaiyoo, “Sambasa gii dokonya koo pipenge doko kapa pelyape, pande epe pipenge doko kapa pelyape? Dee endakali pyao kumasepenge doko kapa pelyape, pande pyoo nyepenge doko kapa pelyape? lea-pyaa. Dopaka doko, dokaita ema napiami-pyaa.

⁵Baame dokaita kandayoko lao kandatala imbu kaya-pyaa. Dokaitame nyakamanya mona kana jiaminosa baame dokaita kandao mona kenda kaya-pyaa. Dopa petala akali kingi kumapae doko lamaiyoo, “Embanya kingi tinoka,” lea-pyaa. Baanya kingi doko tinokateamopa dee auu pia-pyaa.

⁶Dopa piamopa Patasi dupame pupae kamanda pupala Kiŋi Etote tata dupa-pipa Jisasa aipa petala pyao kumasemape lao kambuiyami-pyaa.

⁷Jisasapi baanya disaipele dupapi endaki pete dokonya peami-pyaa. Galili tange kambu longo mendeme baa watao peami-pyaa. Dee Jutia tangepi, Jetusaleme tangepi, Itumia tangepi, endaki Jotane yangitena tangepi, Taya tangepi, Saitone tangepi dupame baame pilyamo lapae dupa sepala baa kateamo dokonya kambu longo dupa epeami-pyaa.

⁹Dopa piaminosa endakali kambu dokome baa katao tambukinatamini latala sipi yakane mende baanya disaipele dupame depa lanya setekena lea-pyaa.

¹⁰Baame endakali yaina pyapae longo mee injisiamo dokonya endakali yaina pyapae dupa pitakame baa watandamana latala tuu tuu lao epeaminosa lea-pyaa.

¹¹Enjele koo dupame baa kandatala, baa kateamo dosa tombauli sepala puu lao ae lao, “Emba Gote Ikiningina,” lata piami-pyaa.

¹²Dokopa baame kyoto joo dokaita lamaiyoo, “Nyakamame namba lao panala nayalapape eteteaka daana,” lea-pyaa.

¹³Jisasa baa yuu manda mendenya pea-pyaa. Pupala akali mendapua baame yapao nyotoo lao masiamo dupa epena leamopa dupa baa kateamo dokonya epeami-pyaa.

¹⁴Epeaminopa baame akali kingi ita mende-kisa dee lapoma baa-pipa tole katamana lao makande pia-pyaa. Dee akali dutupame pii lamaiya pena latona lao makande pia-pyaa.

¹⁵Baame dupa pupu lapae maitopa enjele koo dupa watao pyatamina lao masetala dopa pia-pyaa.

¹⁶Baame akali kingi ita mende-kisa dee lapoma dutupa makande petala Saimone kandao kenge Pita lea-pyaa.

¹⁷Dee baame Sepete ikiningi Jemesapa Jonepa dolapo kandao kenge Boanesisa lea-pyaa. Dokonya tenge doko dolapo kaiti toka lelyamo dokonya ikiningi.

¹⁸Baame Endutupi, Pilipapi, Batolomyupi, Matyupi, Tomasapi, Aopiasa ikiningi Jemesa dokopi, Tatiasapi, Saimonekenge mende Kenanayosa lengema dokopi, Jisasa enge nyiamo akali Jutasa Isaketiote dokopi dutupa makande pia-pyaa.

²⁰Dopa petala Jisasa baa andaka epea-pyaa. Dokopa endakali kambu mende deaka ipao kambu piaminosa Jisasa baa baanya disaipele dupa-pipa nee napenge nanjia-pyaa.

²¹Dopa pilyamo lapae doko baanya palu dupame sepala baa kii minao nyala epeami-pyaa. Doko, endakali dupame, “Baa kyekelyamona,” leaminosa dopa piami-pyaa.

²²Mana setapae masingi akali Jetusaleme katao lanao epeamino dupame lao pituu, “Belesapulu doko baa-kisa palelyamo. Dee enjele koo dupa isingi doko mambele baame enjele koo dupa watao pilyamona,” leami-pyaa.

²³Dopa leaminopa baame dokaita epena latala kongali mendapua dapa lamaiya-pyaa. “Sataneme Satane tange aipa petala kapa pao watao pyatape?

²⁴Yuu dupanya kiŋi mendeme isingi tata mende wakale pyoloo petala yanda pitambino kandao doko, tata doko kapa pao auu pyoo nakatata.

²⁵Anda mendenya palu dupa wakale pyoloo petala yanda pitamino kandao doko, anda doko kapa pao auu pyoo nakatata.

²⁶Dee Satane dokome baa tangeaka wakale pyoloo petala yanda pitamo kandao doko, baa kapa pao kalya nayata. Daa, baa etata.

²⁷“Dopaka doko, endakali mendeme akali pupu lapae dokonya andaka kolandatala baanya pinju dupa kapa pao pyao nanyeta. Dopa pyaanya tamo kandao doko, wambao akali pupu lapae doko kendeme yaki pinya setapala dokopa baanya andaka pinju setamo dupa pyao nyeta.

²⁸Kiningi nambame nyakama langilyona, endakali dupanya koo dupa pitakapi Gote kandao lamba lenge dupa pitakapi dupa Goteme kunanya nepakamaita.

²⁹Dopaka doko, endakali mendeme Oli Sipitisa kandao lamba latamo kandao doko, tendapi baanya koo doko baa-kisa etete seta. Baanya koo doko tenda tendapi soaka patana,” lea-pyaa.

³⁰Baa-kisa enjele koo mende palelyamona leamino dokonya baame dopa lea-pyaa.

³¹Jisasanya endangi kaiminingipi dupa ipao kamanda katapala baa kamanda epena lao mendapuame lanyala pena leami-pyaa.

³²Endakali baa kakopao peteamino dupame Jisasa lamaiyoo, “Yaa, embanya endangi kaiminingipi dupa ipao kamanda katapala emba kutilyaminona,” leami-pyaa.

³³Jisasame yanu pyao, “Nambanya endangi doko apipi? Nambanya kaiminingi dupa apitupape?” lea-pyaa.

³⁴Jisasame baa kakopao peteamino dupa kandayoko lao kandatala, “Datupa nambanya endangipi kaiminingipina, kanjepape.

³⁵Goteme masingili pingima endakali dupa nambanya kaiminingipi, pimalengepi, endangipina,” lea-pyaa.