Make 16

1

2

3

4

5

6

7

8

9

10

11

12

13

14

15

16

¹Sambasa gii doko pateamopa Matia Makatala tange dokopi, Matia Jemesa endangi dokopi, enda Salomipi dutupame Jisasa kai pyala mona latala welepi opale tunduma pingi mendapua sambeami-pyaa.

²Sandeenya yongama wamba niki pyakaya-kaita malu dokonya peami-pyaa.

³Dupame pao pituu, “Malu kambu dokonya kana piti petae doko apimi kapilya mina-mina pyoo nyakata laape?” lao mende lamai lamai pyoo peami-pyaa.

⁴Pupala kandeaminopa kana doko nyoo kapya latae sia-pyaa. Kana doko etete andake mende-pyaa.

⁵Enda dupame malu dokonya kolandatala akali yonge pee londe kyoo lapae pingi mende kingi tolae-kaita pilya siasa kandatala mona andao walu leami-pyaa.

⁶Dopa piaminopa baame enda dutupa lamaiyoo, “Nyakama mona andao walu nalalapape. Jisasa Nasatete tange ita pokonya pyao yukuiyamino doko nyakamame kutilyamino. Baa sakatatalame lamo. Angenya nasilyamo. Baa seteamino panda dake kanjepa.

⁷Nyakamame pupala baanya disaipele dupapi Pitapi lamaiyoo, ‘Baa wambao Galili yuu dokonya pelyamo. Wamba baame nyakama langiamoli pyoo nyakamame baa Galili yuu dokonya kandatamina,’ lamaiyepape,” lea-pyaa.

⁸Enda dupame kamanda pyakalyetala malu doko yakinatala mona andao walu lao paka peami-pyaa. Dupame paka kayamino dokome endakali mende lamaiya nayami-pyaa.

⁹Sandee gii dokonya yongama wamba Jisasa sakatatala Matia Makatala tange dokome wambao kandena lao panea-pyaa. Wamba enda doko-kisa enjele koo kalange paleamopa Jisasame watao pyakamaiya-pyaa.

¹⁰Jisasa-pipa awapa kateamino endakali dupa ee lao yamataka lao peteaminopa, enda dokome pupala dokaita lamaiyoo, “Jisasa lenge tao katamupa nambame kanjona,” lea-pyaa. Dopa leamopa dokaitame sepala pii doko kiningina lao masala nayami-pyaa.

¹²Maitakao disaipele dupanya lapoma yuu taono doko yakinatala peambinopa dolapome kandena lao Jisasa waka joo peambino dokonya pea-pyaa.

¹³Dolapome pupala disaipele yangi dupa lamaiyambinopa dolapome kiningi lelyambinona lao dupame masala nayamiaka-pyaa.

¹⁴Maitakao akali kingi ita mende-kisa dee mendai dutupa nee nao peteaminopa Jisasa baa dokaitame kandena lao ipao panea-pyaa. Dopa petala baa sakatatala paneamopa kandeamino endakali dupame kiningi lelyaminona lao masala nayamino dokonya dokaita pyalanya lao, “Nyakamame kiningina lao masala naenya, tuu pyoo mona pyakilyoo kalyaminona,” lea-pyaa.

¹⁵Dopa latala baame dokaita lamaiyoo, “Nyakamame yuu dupa pitakanya pupala Wai Pii Epe doko endakali dupa pitaka lamaiyepape.

¹⁶Masoo minao kaimbu nyetamo endakali doko Goteme pyoo nyeta. Masoo minala nayatamo endakali doko daa latala watao pyata.

¹⁷Masoo minatamino endakali dupame kongali datupa pitami. Dupame nambanya kenge doko lao enjele koo dupa watao pyatami. Dee pii tata waka dupa latamiaka.

¹⁸Kanopato salenda dupa kingimi minatala koyala nayatami. Tomakai dupa napala kumala nayatami. Endakali yaina pyapae dupa kingimi minataminopa yaina dupa mee jetamina,” lea-pyaa.

¹⁹Kamongo Jisasame pii dutupa lamaitiamopa Goteme baa kaiti-kisa lanyia-pyaa. Dopa piamopa baa Gotenya kingi tolae-kaita kalyamo.

²⁰Disaipele dupame yuu dupa pitakanya pupala pii doko lamaiyami-pyaa. Dopa piaminopa Kamongo dokome nyakama-pipa kalai awapa pyoo kongali piamino dupanya baame pii doko angi injisia-pyaa.