1Akali Patasipi mana setapae masingi akali mendapuapi Jetusaleme katao epeamino dupame Jisasa kateamo dokonya kambu piami-pyaa.
2Dopa petala baanya disaipele dupanya mendapuame kingi kaimala pipaeme mee nee neamino kandeami-pyaa. Dopa piamino dokome disaipele dupame kingi kaimbu pyala nayao mee nee nelyamino lao panea-pyaa.
3Doko, Patasipi dee Juta endakali dupa pitakapimi nyakamanya yumbangenya mana dupa watao nee nalanya kingi kaimbupyaokondape petala nee nengema-pyaa.
4Dupame kamapisa pao ipupala kaimbu pyala naelyamino doko mee nee nala naengema-pyaa. Dee dupame yumbangenya mana longo mendapua nyiamino dupa watao minao kapo pengepi, endaki pengepi, disa kapaeme wasepaepi dupa kaimbu pingima-pyaa.
5Patasi dupapi mana setapae masingi akali dupapimi Jisasa pisoo, “Embanya disaipele dupa kingi kaimbu pyala nayao mee nee nelyamino doko, mana wambatae naimanya yumbangeme seteamino dupa dupame aipuma watao minala naelyamipi?” leami-pyaa.
6Dopa leaminopa baame dokaita lamaiyoo, “Wamba potopesa Aisayame nyakama minakasingima akali dupa makande pyokondape pyoo dapa lea pyaa: ‘Endakali tata dakeme kambumi namba lalyingimaka doko, nyakamanya moname namba-pipa kopala naengema.
7Dupame endakalinya mana setapae dupa mana lao pituu, “Dake Gotenya mana setapaena,” lengema. Dopa latala dupame namba mee ambe tama pingimana,’ lapae silyamo.
8Nyakamame Gotenya mana setapae dupa nepatala endakalinya mana dupa watao minao kalyaminona,” Jisasame lea-pyaa.
9Dee baame dokaita lamaiyoo, “Nyakamame nyakama tangenya mana dupa watao minamana latala Gotenya mana setapae dupa waa katao angoelyamino.
10Moseseme lao pituu, ‘Embanya endangi takangepa dolapo andanda semaiyoo katape.’ Dee, ‘Endakali mendeme baanya endangi tamopi takange tamopi mende kandao pii koo latamo doko baa kumina lao pyao kumasepengena,’ lea-pyaa.
11Dopaka doko, endakali mendeme baanya endangi takangepi mende kandao, ‘Wamba nambame emba nisoo oapi dioliaka doko, indupa nambame Gote maitapuna,’ latamopa nyakamame baanya endangi takangepi mende nisala naena lao daa lengema.
13Nyakamame nyakamanya mana wambatae dupa watao mana lapimino dokome Gotenya pii doko mee injisingima. Dee nyakamame mana opale longo minilyaminoakana,” Jisasame lea-pyaa.
14Dokopa Jisasame endakali kambu piamino dupa baa kateamo dokonya dee epena latala lamaiyoo, “Nyakama pitakame pii nambame lelyo dake sepala masokondape pyepape!
15Opale kamanda silya mende endakali mende-kisa landa pilya dokome kapa pao baa minao koyasala naenge. Endakali mende-kisa opale koko palelya mende kamanda epelya dokome baa minao koyasingi.
16Nyakama kalekaita singi tamo kandao doko, pii doko salapapena!” Jisasame lea-pyaa.
17Jisasame endakali kambu doko yakinatala andaka kolandeamo dokopa baanya disaipele dupame pii kongali leamo dokonya baa tipa piami-pyaa.
18Dopa piaminopa baame dokaita lamaiyoo, “Nyakamame apata masala naengemakape? Opale kamanda singi doko pitaka endakali mende-kisa landa pyatala endakali doko kapa pao koyasala naenge doko nyakamame masala naelyamipi?
19Doko, mona koko landa pyala naenya, inginya landa pyatala ii anda dokonya pengena,” lea-pyaa. (Dopa leamo dokome nee tata dutupa pitaka auu pisoo lea-pyaa.)
20Dopa latala dee baame lao pituu, “Opale endakali koko paliuu kamanda epenge dokome endakali doko koyasingi.
21Endakali dupanya monanya paliuu masingi koo datupa kamanda epenge: endakalipi nyele-nyele paengepi, pake nengepi, endakali pyao kumasingipi, kepo kolengepi, oapi nyipu laka lao masingipi, koo pingipi, minakasingipi, luiyawaka paengepi, opale lengeme kandatala putiti kaengepi, lamba lengepi, alyasale joo kalyo lao masingipi, kyakaenge mana miningipi koo dutupa pitaka monanya paliuu kamanda ipupala endakali dupa koyasingina,” Jisasame lea-pyaa.
24Dopa latala baame yuu doko yakinatala yuu taono Taya dokonya yuu siamo dupanya pea-pyaa. Pupala baa anda mendenya kolandatala endakali mendeme baa nakandamili lao masia-pyaa. Dopa lao masiamoaka doko, baa kapa pao yalo pipenge nanjia-pyaa.
25Dokopa enda mendeme Jisasa dokonya pelyamo leamino sepala yapa anda dokonya kolandatala baanya moko siamo dosa tombauli sia-pyaa. Enda dokonya wanenge doko-kisa enjele koo mende palenge-pyaa.
26Enda doko Gitiki pii lenge Pinisia enda Sitia tange mende-pyaa. Enda dokome baanya wanenge-kisa enjele koo palenge doko Jisasame watao pyakamaina lea-pyaa.
27Dopa leamopa Jisasame enda doko lamaiyoo, “Naimame wanenya nee dupa nyepala pyale lao yana dupa maitamanopa auu napitana wambao wane dupa nee nao tiaka kayatena kaya,” lea-pyaa.
28Enda dokome yanu pyao baa lamaiyoo, “Akali Andake, embame kini leeno. Dopaka doko, wane dupame nee nao katai pyao nepelyamino dupa yana toko pundipundi kalyami dupame nyoo nengemakana,” lea-pyaa.
29Dokopa Jisasame enda doko lamaiyoo, “Embame dopa lao pii leeno ongonya enjele koo dokome embanya wanenge doko yakinatala patelyamona emba andaka puu,” lea-pyaa.
30Enda dokome andaka pupala baanya wanenge doko tokonya paliuu siamo kandea-pyaa. Enjele koo dokome wanaku doko yakinatala patea-pyaa.
31Dee baa yuu taono Taya dokonya yuu siamo dupa yakinatala Saitonepa Dekapolisapa yuu dolaponya-kaita pao endaki Galili pete dokonya pilyia-pyaa.
32Dokopa endakali mendapuame akali kembau mumaa mende baa kateamo dokonya laminao ipupala baame kingimi minina leami-pyaa.
33Dopa piaminopa Jisasame endakali kambu doko yakinatala akali doko iki laminao umbisale pupala baanya kingi kondenge dolapo akali dokonya kale kaita pyandakamaiya-pyaa. Dopa petala sopokali tasoo nepatala kekenya watandakamaiya-pyaa.
34Dopa petala kaiti-kisa kandalyetae katao mona ŋee latala, “Epata,” lea-pyaa. Epata doko kapilyoo lumba lea-pyaa.
35Dopa leamopa akali dokonya kalekaita dolapo lumbapa keke doko lee mendai tolata piamopa baame pii tolao lea-pyaa.
36Dopa piamo doko endakali dupame endakali mendaipi mende lamaiya naena lao baame kyoto joo daa lea-pyaa. Dopa leamoaka doko, dupame lamaima-lamaima pyoo lamaiyoo tayami-pyaa.
37Endakali dupame walu lao mona andapala lao pituu, “Baame dupa pitaka auu pyoo pilyamo. Kale kembau dupame pii sina latala dee mumaa dupame pii lena lelyamona,” leami-pyaa.
