Mɑtiyee 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Yesu tɛmɑ tɔm tǝnɛ tǝ tǝnɑɣɑ yɔɣɔtʋɣʋ, ɩlɛnɑ ɩ́ heeli ɩ ɩfɑlɑɑ sɩ:

²Ntɔŋ ɩ́ nyǝmɑ́ teu sɩ pǝ kɑɑsɑ kʋyɛɛŋ nɑɑlɛ nɑ pɑ́ tɔɣɔ Tɛɛʋ ɑcimɑ nɑ? Tɛɛʋ ɑcimɑ ɑnɩ ɑ tɔɔ kɛ́ pɑɑ tʋ Yʋlʋ Pǝyɑɣɑ mɑɣɑ yǝlɑɑ niŋ tɑɑ nɑ pɑ́ kɑ-m sǝm tesikɑ tɔɔ.

³Ḿpʋ́ɣʋ́ kɔtǝlɑɑ sɔsɑɑ nɑ Yutɑ nyʋɣʋ nyǝ́mɑ nyʋɣʋ nyǝ́mɑ pɑ kotɑ kɔtǝlɑɑ wulɑʋ wei pɑ yɑɑ sɩ Kɑyifi tɔ ɩ tǝyɑɣɑ.

⁴Nɑ pɑ́ cɑɣɑ nɑ pɑ́ mɑɣɑsɩ nɑ pɑ́ sɩɩ ɩsǝnɑ pɑɑ kpɑ Yesu tǝhɛɛ nɑ nɔɣɔlʋ tɑ nɑ tɔ, nɑ pɑ́ kʋ-ɩ.

⁵Pɑ yɔɣɔtɑɣɑ pɑ tɑɑ sɩ: Tǝ tɑɑ kpɑ-ɩ ɑcimɑ wɑɑtʋ, tɔfɔ pɩɩ lɑ yoou kɛ yǝlɑɑ tɑɑ.

⁶Yesu kɑ wɛ Petɑnii kɛ tɔnʋɣʋ tɔɔ ɑsilimɑ kʋtɔŋ tʋ Simɔŋ tǝyɑɣɑ tɑɑ.

⁷Tǝnɑɣɑ ɑlʋ nɔɣɔlʋ ɩ kɔmɑ ɩ kiŋ nɑ ɩ́ tɔkɑ tulɑɑlʋ kʋpɑmpɑŋ nɑ pɑ́ lɑpɑ ɩ ɑkpɑlǝpiyɑ kɛ liɣitee pǝlɛ kʋhʋlʋmǝlɛ tɑɑ tɔ. Yesu cɑɣɑɑ nɑ ɩ́ tɔŋnɑ tɔɣɔʋ, ɩlɛnɑ ɑlʋ ɩnɩ ɩ́ pǝlɩ tulɑɑlʋ ɩnǝɣɩ Yesu nyʋɣʋ tɑɑ.

⁸Yesu ɩfɑlɑɑ nɑ́ mpʋ tɔ pǝ tɑ mɑɣɑ-wɛ, nɑ pɑ́ tɔ sɩ: Pɑ wɑkǝlʋɣʋ tulɑɑlʋ ɩnɛɣɛ ɩsǝntɔ tɔ suweɣelɛ?

⁹Ye pɑɑ pɛɛtɑ-ɩ pǝ tɑɑ lɑ liɣitee kɛ sɔsɔm nɑ pɑ́ hɑ kʋnyɔntʋnɑɑ?

¹⁰Yesu cɛkǝnɑɑ sɩ pɑ yɔɣɔtǝɣɩ mpʋ, ɩlɛnɑ ɩ́ pɔɔsɩ-wɛ sɩ: Pepe tɔɔ kɛ́ ɩ́ pǝsǝɣɩ ɑlʋ ɩnɛ ɩ lɑŋlɛ kɛ mpʋ? Mpi ɩ lɑpɑ-m mpʋ tɔ pǝ tewɑɣɑ hɑlɩ.

¹¹Mǝ nɑ kʋnyɔntʋnɑɑ ɩ́ wɛnnɑ tɑm. Amɑ mɑ́ nɑ-mɛ tǝ kɑɑ wɛɛ tǝmɑ kiŋ kɛ tɑm.

¹²Mɑ pim tɔɔ kɛ́ ɩ pǝlɑ tulɑɑlʋ kɛ mɑ tɔnʋɣʋ tɔɔ kɛ́ mpʋ.

¹³Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, pɑɑ timpiɣi pɑɑ heeli Lɑɑpɑɑlɩ Kʋpɑŋ ɩnɛɣɛ ɑntulinyɑ tǝnɑ tɑɑ, pɑɑ kɛɛsɩ ɑlʋ ɩnɛ ɩ lɑpɑ mpi tɔ pǝ tɔm nɑ pɑ́ tɔɔsǝɣɩ ɩ tɔɔ.

¹⁴Ḿpʋ́ɣʋ́ Yesu ɩfɑlɑɑ nɑɑnʋwɑ nɑ nɑɑlɛ tɑɑ lɛlʋ wei pɑ yɑɑ sɩ Yutɑɑsɩ Ɩsǝkɑleeu tɔ, ɩ kʋlɑɑ nɑ ɩ́ polo nɑ ɩ́ mɑɣɑnɑ kɔtǝlɑɑ sɔsɑɑ,

¹⁵nɑ ɩ́ pɔɔsɩ-wɛ sɩ: Ye mɑ tʋ Yesu kɛ́ mǝ niŋ tɑɑ pepeɣe ɩ́ kɑ hɑ-m? Ḿpʋ́ɣʋ́ pɛlɛ pɑ kɑlɑ liɣitee nyǝɣǝtʋ kɛ hiu nɑ nɑɑnʋwɑ nɑ pɑ́ cɛlɛ-ɩ.

¹⁶Pǝ kpɑɣɑ kʋyɑŋku tɔɣɔ Yutɑɑsɩ sʋʋ kʋyɑkʋ kʋpɑŋkʋ kɛ pɛɛkʋɣʋ sɩ ɩ́ tʋ Yesu kɛ́ pɑ niŋ tɑɑ.

¹⁷Pǝ tɑlɑ potopotonɑɑ mpɑ pɑ tɑɑ kʋkʋsʋm fɛɩ tɔ pǝ ɑcimɑ kʋyɑkʋ kɑncɑɑlɑɣɑ nyǝŋkʋ wule. Ɩlɛnɑ Yesu ɩfɑlɑɑ polo nɑ pɑ́ pɔɔsɩ-ɩ sɩ: Leɣe n cɑɑ sɩ tǝ́ polo nɑ tǝ́ lɑ-ŋ Tɛɛʋ ɑcimɑ kʋtɔɣɔʋ?

¹⁸Tǝnɑɣɑ Yesu tɔmɑ-wɛ sɩ: Ɩ́ polo ɩcɑtɛ tɑɑ kɛ́ ɑkele tɛ nɑ ɩ́ heeli-ɩ sɩ: Mɑ wʋlɛ tɑlɑɑ, nyɑ́ tɛɣɛ mɑ́ nɑ mɑ ɩfɑlɑɑ tɩɩ tɔɣɔ Tɛɛʋ ɑcimɑ.

¹⁹Ḿpʋ́ɣʋ́ Yesu ɩfɑlɑɑ lɑpɑ nti ɩ kɛɛsɑ-wɛ tɔ. Pɑ polɑɑ nɑ pɑ́ lɑ́ Tɛɛʋ ɑcimɑ kʋtɔɣɔʋ.

²⁰Pǝ kɔmɑ ɩsɩɩ tɑɑnɑɣɑ ɩlɛ, ɩ́ nɑ pɑ nɑɑnʋwɑ nɑ nɑɑlɛ pɑ cɑɣɑ tɔɣɔʋ ntɛ́.

²¹Pɑ tɔŋnɑ tɔɣɔʋ kɛ mpʋ, ɩlɛnɑ Yesu yɔɣɔtɩ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, mǝ tɑɑ nɔɣɔlʋ kɑ́ lɑ-m kɔlɔmɔtɔ.

²²Tǝnɑɣɑ ɩ ɩfɑlɑɑ ɩsɛntɑɑ nyǝŋɑ sɔsɔm nɑ tɔm tǝnɛ. Ɩlɛnɑ pɑ́ sʋʋ-ɩ pɔɔsʋɣʋ kɛ kʋlʋm kʋlʋm. Ɩnɛ sɩ: Mɑtɔŋ pǝ tɑɣɑ mɑ́, Tɑcɑɑ? Ɩnɛ sɩ: Mɑtɔŋ pǝ tɑɣɑ mɑ́, Tɑcɑɑ?

²³Ḿpʋ́ɣʋ́ Yesu cɔ-wɛ sɩ: Mɑ nɑ wei tɑ niŋ kpɛntɑ sʋsʋɣʋ kɛ nyǝnɑɣɑ tɑɑ tɔ pʋntʋ kɑ́ lɑnɑ-m kɔlɔmɔtɔ.

²⁴Yʋlʋ Pǝyɑɣɑ mɑ́, mɑ sǝkɩ teitei kɛ́ ɩsɩɩ pɑ kɛɛsɑ mɑ tɔm kɛ Ɩsɔ Tɔm tɑɑ tɔ. Amɑ wei ɩ kɑ́ lɑ Yʋlʋ Pǝyɑɣɑ mɑɣɑ kɔlɔmɔtɔ kɛ mpʋ tɔ ɩ tɔm kɑ́ lɑ wɑɩyo kɛ́ sɔsɔm. Pʋntʋ ɩnɩ, ye pɑ tɑɑ lʋlɩ-ɩ, pǝlɛ pɩɩ lɑpɑ sɑnɑ.

²⁵Pǝ kpɛŋnɑ Yutɑɑsɩ wei ɩ lɑkɩ-ɩ kɔlɔmɔtɔ tɔ nɑ ɩ́ pɔɔsɩ Yesu sɩ: Mɑtɔŋ pǝ tɑɣɑ mɑ́, Tɑcɑɑ? Ɩlɛnɑ Yesu cɔ-ɩ sɩ: Ntǝɣǝlɛ mpʋ.

²⁶Ḿpʋ́ɣʋ́ wɑɑtʋ wei pɑ tɔkɑɣɑ tɔ Yesu kpɑɣɑ potopoto nɑ ɩ́ sɛɛ Ɩsɔ kɛ́ ɩ́ nɑ tǝmlɛ, nɑ ɩ́ fɑɣɑ-ɩ nɑ ɩ́ cɛlɑ ɩ ɩfɑlɑɑ, nɑ ɩ́ heeli-wɛ sɩ: Ɩ́ mʋ nɑ ɩ́ tɔɣɔ, mɑ tɔnʋɣʋ ntɛ́.

²⁷Pǝlɛ pǝ wɑɑlɩ kɛ́ Yesu kpɑɣɑ kɔpʋ nɑ ɩ́ sɛɛ Ɩsɔ kɛ́ ɩ nɑ tǝmlɛ. Ɩlɛnɑ ɩ́ cɛlɛ-wɛ nɑ ɩ́ tɔ sɩ: Ɩ́ nyɔɔ-wǝɣɩ mǝ tǝnɑ.

²⁸Mɑ cɑlǝm ntɛ́ mpi pǝ hʋ́lǝ́ɣɩ́ Ɩsɔ nɔɣɔ pɛɛlʋɣʋ tɑmpɑnɑ tɔ. Mpɩ pǝ kpemnɑ yǝlɑɑ pɑɣɑlɛ tɔɔ sɩ pǝ́ hɩɩsɩ ɩsɑɣɑtʋnɑɑ.

²⁹Tɑmpɑnɑ kɛ mɑ heeliɣi-mɛ yoo, sɑŋɑ wɑɑlɩ mɑ kɑɑ tɑsɑ sʋlʋm pǝnɛɣɛ nyɔɔʋ. Hɑlǝnɑ kʋyɑŋku mɑ́ nɑ-mɛ tɩɩ nyɔɔ sʋlʋm kʋfɑm kɛ mɑ Cɑɑ Kɑwulɑɣɑ tɑɑ tɔ.

³⁰Pɑ tɛmɑ mpʋ ɩlɛnɑ pɑ́ yoo ɑcimɑ yontu, ɩlɛnɑ pɑ́ tɛɛ Olifinɑɑ pʋɣʋ tɔɔ.

³¹Ḿpʋ́ɣʋ́ Yesu tɔmɑ ɩ ɩfɑlɑɑ sɩ: Sɑŋɑ ɑhoo ɑnɛ ɑ mɑɣɑmɑɣɑ ɩ́ kɑ́ yele-m mǝ tǝnɑ nɑ ɩ́ se. Pɑ ŋmɑɑ ḿpʋ́ɣʋ́ Ɩsɔ Tɔm tɑɑ sɩ: Mɑɑ kʋ tiikilu nɑ heeŋ kɑ́ yɑ yem yem.

³²Amɑ wɑɑtʋ wei mɑɑ fe ɩlɛnɑ, mɑ́ tɛɛ-mɛɣɛ nɔɣɔ kɛ Kɑlilee.

³³Tǝnɑɣɑ Piyɛɛ nɔɣɔ tǝkpɑʋ sɩ: Pɑɑ pɑ tǝnɑ pɑɑ yele-ŋ nɑ pɑ́ se, mɑ́, mɑ kɑɑ lɑ mpʋ.

³⁴Amɑ Yesu tɔmɑ-ɩ sɩ: Tɑmpɑnɑ kɛ mɑ heeliɣi-ŋ yoo mɑɑ cɛsǝɣɩ, n kɑ kpɛɛsɩ tɔm tooso kɛ́ ɑhoo ɑnɛ sɩ n tɑ nyɩ-m kɛ́ n tɑ nyɩ-m nɑ pǝ́cɔ́ kɑmpɑɑʋ koo.

³⁵Tǝnɑɣɑ Piyɛɛ tɔmɑ-ɩ sɩ: Pɑɑ mɑ nɑ-ŋ tɩɩ sɩ tɩɩ sɩ kɛ́, mɑ kɑɑ kpɛɛsɩ sɩ mɑ tɑ nyɩ-ŋ. Ḿpʋ́ɣʋ́ pɑ tǝnɑ pɑ yɔɣɔtɑ mpʋ.

³⁶Ḿpʋ́ɣʋ́ Yesu nɑ ɩ ɩfɑlɑɑ pɑ tɑlɑ timpi pɑ yɑɑ sɩ Kɛtǝsemɑnee tɔ. Ɩlɛnɑ ɩ́ tɔ-wɛ sɩ: Ɩ́ cɑɣɑ cǝnɛ nɑ mɑ́ polo Ɩsɔ sǝlǝmʋɣʋ kɛ hɑtoo cǝnɛ.

³⁷Ɩlɛnɑ ɩ́ kpɑɣɑ Piyɛɛ nɑ Sepetee pǝyɑlɑɑ nɑɑlɛ. Tǝnɑɣɑ ɩsǝnyǝŋlɛ nɑ lɑŋwɑkǝllɛ sɔsɔɔlɛ sʋʋ-ɩ kpɑʋ.

³⁸Ɩlɛnɑ ɩ́ tɔ-wɛ sɩ: Mɑ lɑŋlɛ wɑkǝlɑɑ kɛ́ tǝtɔɣɔtɔɣɔ pǝ fɛɩ kɛɛsʋɣʋ. Ɩ́ cɑɣɑ cǝnɛ nɑ mɑ́ nɑ-mɛ tǝ́ feŋiɣi.

³⁹Ɩ tuusɑ ɩ nɔɣɔ tɔɔ kɛ́ pǝcɔ, ɩlɛnɑ ɩ́ luŋ nɑ ɩ́ sǝlǝmɩ sɩ: Mɑ Cɑɑ, ye pǝ wɛ pǝsʋɣʋ kɛɛlɩ wɑhɑlɑ sɔsɔ ɩnɛɣɛ mɑ nyʋɣʋ tɔɔ. Pɑɑ nɑ mpʋ mpi n nɔkɑɑ tɔ pǝlɛ pǝ lɑ, pǝ́ tɑɑ lɑ mɑ luɣu nyǝntʋ.

⁴⁰Ɩ tɛmɑ mpʋ, ɩlɛnɑ ɩ́ mǝlɩ ɩ ɩfɑlɑɑ tooso ɩnɩ ɩ kiŋ nɑ ɩ́ mɑɣɑnɑ pɑ tɔŋnɑ tom. Ɩlɛnɑ ɩ́ tɔ Piyɛɛ sɩ: Ɩ́ kpisɑ cɑɣɑʋ ntɛ́ sɩ mɑ́ nɑ-mɛ tǝ́ feŋ pɑɑ pǝcɔ mɑɣɑmɑɣɑ.

⁴¹Ɩ́ feŋ nɑ ɩ́ sǝlǝmɩ, tɔfɔ ɩ́ kɑ́ hoti wɑɑtʋ wei mɑɣɑsʋɣʋ kɔŋ-mɛ tɔ. Pɑ́ɑ́nɑ́ wɛɛ, ɑmɑ tɔnʋɣʋ ɩɩ pǝsǝɣǝnɑ.

⁴²Ɩ tɑsɑ tuusuɣu, ɩlɛnɑ ɩ́ tɑsɑ Ɩsɔ kɛ́ sǝlǝmʋɣʋ sɩ: Mɑ Cɑɑ, ye pǝ fɛɩ pǝsʋɣʋ sɩ wɑhɑlɑ sɔsɔ ɩnɛ ɩ́ hɑtǝlǝnɑ-m, nyɑ́ luɣu nyǝntʋ ɩ́ lɑ.

⁴³Ɩ tɑsɑ ɩ ɩfɑlɑɑ kiŋ kɛ mǝlʋɣʋ, ɩlɛnɑ ɩ́ mɑɣɑnɑ pɑ tɔŋnɑ tom tɔtɔ, pɑ kpisɑ pɑ́ cɑɣɑnɑ pɑ ɩsɛ.

⁴⁴Ḿpʋ́ɣʋ́ ɩ tɑsɑ-wɛɣɛ yeluɣu nɑ ɩ́ tuusi nɑ ɩ́ tɑsɑ Ɩsɔ sǝlǝmʋɣʋ kɛ tɔm tooso nyǝm kɛ tɔm kʋlʋmtʋ ntɩ.

⁴⁵Tǝnɑɣɑ ɩ mǝlɑ ɩ ɩfɑlɑɑ kiŋ nɑ ɩ́ pɔɔsɩ-wɛ sɩ: Ɩ́ tɔŋnɑ tom nɑ ɩ́ hɛɛsǝɣɩ yɑɑ? Ɩɩ nɑɑ, pǝ tɑlɑɑ kɛlɛ. Pɑɑ tʋ Yʋlʋ Pǝyɑɣɑ mɑɣɑ ɑsɑɣɑɑ niŋ tɑɑ.

⁴⁶Ɩ́ kʋlɩ nɑ tǝ́ tɛɛ. Ɩ́ nyǝnɩ kɔlɔmɔtɔ tʋ tɑlɑ cǝnɛ.

⁴⁷Yesu tɔŋnɑ yɔɣɔtɑɣɑ kɛ mpʋ ɩlɛ, ɩ ɩfɑlɑɑ nɑɑnʋwɑ nɑ nɑɑlɛ tɑɑ lɛlʋ Yutɑɑsɩ tɑlɑɑ kɛlɛ. Nɑ ɩ wɑɑlɩ kɛ́ yǝlɑɑ sɑmɑɑ tuutuumɑ, nɑ pɑ́ tɔkɑ lɑɣɑlɛɛ nɑ kpɑtǝŋ. Kɔtǝlɑɑ sɔsɑɑ nɑ Yutɑ nyʋɣʋ nyǝ́mɑ nyʋɣʋ nyǝ́mɑ pɑ tilinɑ yǝlɑɑ mpɛ.

⁴⁸Yutɑɑsɩ wei ɩnɩ ɩ lɑkɩ Yesu kɛ́ kɔlɔmɔtɔ kɛ mpʋ tɔ ɩ kɑ kɛɛsɑ sɑmɑɑ ɩnǝɣɩ ɩsǝnɑ ɩ kɑ lɑ tɔ. Ɩ heelɑ-wɛɣɛ sɩ: Ye mɑ polɑɑ nɑ mɑ́ wɑɣɑlɑ wei ɩlɛ, ɩnǝɣǝlɛ, ɩ́ kpɑ-ɩ.

⁴⁹Tǝnɑɣɑ Yutɑɑsɩ kpǝtǝnɑ Yesu kɛ kpɑkpɑɑ nɑ ɩ́ sɛɛ-ɩ sɩ: Fɔɔ Tɑcɑɑ. Ɩlɛnɑ ɩ́ wɑɣɑlɩ-ɩ.

⁵⁰Ḿpʋ́ɣʋ́ Yesu tɔmɑ-ɩ sɩ: Mɑ tɑɑpɑlʋ, lɑ nti n kɔmɑ lɑpʋ tɔ. Tǝnɑɣɑ ɩ́ nɑ mpɑ tɔ, pɛlɛ pɑ tʋ niŋ kɛ Yesu tɔɔ nɑ pɑ́ kpɑ-ɩ.

⁵¹Ɩlɛnɑ Yesu nɑ mpɑ pɑɑ wɛɛ tɔ pɑ tɑɑ nɔɣɔlʋ kpɛɛ ɩ lɑɣɑtɛ nɑ ɩ́ lo kɔtʋlʋ sɔsɔ tǝmlɛ tʋ ŋkpɑŋʋɣʋ nɑ ɩ́ kɔɔlɩ tǝfeŋ.

⁵²Ḿpʋ́ɣʋ́ Yesu tɔmɑ-ɩ sɩ: Suu nyɑ́ lɑɣɑtɛ kɛ tǝ suɣute tɑɑ. Pǝ tɑɣɑ pʋlʋ tɔɔ, ye wei ɩ́ kpɑɣɑ lɑɣɑtɛ, pʋntʋ kɑ́ sǝnɑ lɑɣɑtɛ.

⁵³N tɑ nyɩ sɩ, mɑ́ sɔɔlɑɑ, mɑɑ yɑɑ mɑ Cɑɑ nɑ ɩ́ hɑ-m ɩsɔtɑɑ tillɑɑ kɛ iyisi nɑɑtoso (6000) kɛ loosi nɑɑnʋwɑ nɑ nɑɑlɛɣɛ cǝnɛɣɛ kpɑkpɑɑ yɛɛ?

⁵⁴Amɑ ye mɑ lɑpɑ mpʋ nti pɑɑ kɛɛsɑ Ɩsɔ Tɔm tɑɑ sɩ tɩɩ lɑ tɔ, ɩsǝnɑɣɑ pɩɩ lɑ nɑ tǝlɛ tǝ́ lɑ́ ɩlɛ?

⁵⁵Tǝnɑɣɑ Yesu pɔɔsɑ sɑmɑɑ ɩnɩ sɩ: Ɩ́ kɔŋɩ-m kpɑʋ nɑ ɩ́ nɔkɩ nɑ ɩ́ kpɑkǝɣɩ lɑɣɑlɛɛ nɑ kpɑtǝŋ tɔ, mɑɣɑ ŋmɩɩlʋ ɩsɑɣɑʋ kɛ? Kʋyɛɛŋ tǝnɑ Ɩsɔ tǝsɛɛlɛ tɑɑ kɛ́ mɑ cɑɣɑɑ nɑ mɑ́ sɛɣɛsǝɣɩ, ɩ́ tɑ́ kpɑ-m.

⁵⁶Amɑ pǝ tǝnɑ ɩsǝntɔ pǝ lɑpɑɣɑ sɩ pǝ́ lɑ nti Ɩsɔ kʋyɔɣɔtʋtʋ tɛlǝsǝlɑɑ kɑ yɔɣɔtɑɑ nɑ tǝ́ wɛ Ɩsɔ Tɔm tɑɑ tɔ. Tǝnɑɣɑ ɩ ɩfɑlɑɑ tǝnɑ yelɑ-ɩ nɑ pɑ́ se nɑ pɑ́ tɛɛ.

⁵⁷Mpɑ pɑ kpɑ Yesu tɔ pɑ ponɑ-ɩ kɔtǝlɑɑ wulɑʋ Kɑyifi tɛ nɑ pɑ́ mɑɣɑnɑ Ɩsɔ Tɔm sɛɣɛsǝlɑɑ nɑ nyʋɣʋ nyǝ́mɑ nyʋɣʋ nyǝ́mɑ pɑ kotɑɑ.

⁵⁸Piyɛɛ tǝŋɑɣɑ Yesu kɛ́ tɑ́ɑ́lǝ́ḿ tɔɔ, hɑlǝnɑ ɩ́ tɑlɑ kɔtǝlɑɑ wulɑʋ tɑɣɑ tɔɔ. Ɩlɛnɑ ɩ́ sʋʋ nɑ ɩ́ cɑɣɑ tǝmlɛ nyǝ́mɑ kiŋ sɩ ɩ nɑɑ sɩ pɩɩ tɛnɑ-we.

⁵⁹Ḿpʋ́ɣʋ́ kɔtǝlɑɑ sɔsɑɑ nɑ Kotuɣu sɔsɔɔŋkʋ nyǝ́mɑ pɑ pɛɛkɑɑ sɩ pɑɑ tɔm suuu pɑ suu Yesu nɑ pɑ́ hiki mpɑɑʋ nɑ pɑ́ kʋ-ɩ.

⁶⁰Pɑɑ nɑ yǝlɑɑ pɑɣɑlɛ kʋlɑɑ nɑ pɑ́ suuki-ɩ pɔpɔtʋ tɔmnɑɑ tɔ, pɑ tɑ hiki nti pɑɑ wɑɑnɑ-ɩ tɔ. Wɑɑlɩ wɑɑlɩ kɛ́ yǝlɑɑ nɑpǝlɩ pɑ kʋlɑ nɑɑlɛ

⁶¹nɑ pɑ́ tɔ sɩ: Apɑlʋ ɩnɛ ɩ kɑ tɔmɑ sɩ ɩnɩ ɩ pǝsǝɣɩ nɑ ɩ́ yɔkɩ Ɩsɔ tǝsɛɛlɛ sɔsɔɔlɛ nɑ ɩ tɑɣɑnɩ-tɛɣɛ ŋmɑʋ kɛ kʋyɛɛŋ tooso tɑɑ.

⁶²Ḿpʋ́ɣʋ́ kɔtǝlɑɑ wulɑʋ kʋlɑɑ nɑ ɩ́ tɔ Yesu sɩ: N kɑɑ yɔɣɔtɩ? Suweɣe yǝlɑɑ pɑnɛ pɑ yɔɣɔtǝɣǝnɑ-ŋ ye?

⁶³Amɑ Yesu sumɑ. Tǝnɑɣɑ kɔtǝlɑɑ wulɑʋ tɔmɑ-ɩ sɩ: Nɑ Ɩsɔ wei ɩ wɛnɑ weesuɣu tɔ, ye n kɛ́ Ɩsɔ Pǝyɑlʋ Mesii heelɩ-tʋ tǝfoo.

⁶⁴Ḿpʋ́ɣʋ́ Yesu cɔ-ɩ sɩ: Ntǝɣɩ n yɔɣɔtɑɑ. Mɑ heeliɣi-mɛ tǝfoo sɩ pǝ kpɑɣɑʋ pǝnɛntɛ tɔ ɩ́ kɑ́ nɑ́ Yʋlʋ Pǝyɑɣɑ mɑ́ nɑ mɑ́ cɑɣɑ Ɩsɔ Toŋ tǝnɑ tʋ kɔŋkɔŋ tɑɑ. Nɑ ɩ́ kɑ́ nɑ-m ɩsɔtɑɑ ŋmʋntʋɣʋ tɔɔ nɑ mɑ́ tiiki.

⁶⁵Tǝnɑɣɑ kɔtǝlɑɑ wulɑʋ cǝlɑ ɩ wontu nɑ ɩ́ tɔ sɩ: Ɩ kpɑ Ɩsɔ tɔɔ. Tǝ tɑsǝɣɩ ɑseetɑ nyǝ́mɑ kɛ pɛɛkʋɣʋ sɩ tǝ lepe? Mǝ mɑɣɑmɑɣɑ ɩ́ nɑ́ ɩsǝnɑ ɩ kpɑ Ɩsɔ tɔɔ tɔɣɔlɛ.

⁶⁶Tɔʋ, ɩ́ nɑ-we? Ḿpʋ́ɣʋ́ pɑ tɔmɑ sɩ ɩ tɔm sǝpɑ, pɑɑ kʋ-ɩ kɛ́.

⁶⁷Tǝnɑɣɑ pɑ sʋʋ ntɑɣɑmɑ tɔʋ kɛ ɩ ɩsɛntɑɑ, nɑ pɑ́ mɑkɩ-ɩ ŋkumɑ, nɑ lɛlɑɑ nɑ́ɑ́ mɑpɩ-ɩ kɑtɑɑsɩ.

⁶⁸Nɑ pɑ́ tɔŋ sɩ: Mesii kpeɣe, heeli-tʋɣʋ wei ɩ mɑpɑ-ŋ tɔ.

⁶⁹Piyɛɛ kɑ cɑɣɑ ɑwɑlɩ kɛ́ tɑɣɑ tɔɔ. Tǝnɑɣɑ kɔtǝlɑɑ wulɑʋ tǝmlɛ tʋ ɑlʋ nyǝŋ nɔɣɔlʋ kpǝtǝnɑ-ɩ nɑ ɩ́ tɔmɩ-ɩ sɩ: Nyɑ́ tɔtɔ n kɑ wɛ Kɑlilee tʋ Yesu ɩnɩ ɩ kiŋ.

⁷⁰Ḿpʋ́ɣʋ́ Piyɛɛ kpɛɛsɑ yǝlɑɑ tǝnɑ ɩsɛntɑɑ sɩ: Mɑ tɑ nyɩ nti n yɔɣɔtǝɣɩ mpʋ tɔ.

⁷¹Pǝlɛ pǝ wɑɑlɩ kɛ́ Piyɛɛ kʋlɑɑ nɑ ɩ́ polo nɔnɔkeelɑsɩ. Ɩlɛnɑ tǝmlɛ tʋ ɑlʋ nyǝŋ lɛlʋ nɑ́ɑ́ nɑ-ɩ nɑ ɩ́ heeli mpɑ pɑɑ wɛ tǝnɑ tɔ sɩ: Ɩnɛ ɩnɩ ɩ kɑ wɛ Nɑsɑlɛtɩ Yesu ɩnɩ ɩ kiŋ kɛ́.

⁷²Ḿpʋ́ɣʋ́ Piyɛɛ tɑɣɑnɑ kpɛɛsʋɣʋ sɩ: Nɑ Ɩsɔ, mɑ tɑ nyɩ ɑpɑlʋ ɩnɩ.

⁷³Pǝ lɑpɑ lɑɑsɑɣɑ ɩlɛnɑ mpɑ pɑɑ wɛ tǝnɑ tɔ pɑ́ kpǝtǝnɑ Piyɛɛ nɑ pɑ́ tɔmɩ-ɩ sɩ: Nyɑ́ n tɑ lɑŋ yǝlɑɑ mpɛ pɑ tɑɑ nɔɣɔlʋ. Nyɑ́ yɔɣɔtɑɣɑ hʋlǝɣǝnɑ timpi n lɩɩnɑɑ tɔ.

⁷⁴Ḿpʋ́ɣʋ́ Piyɛɛ kpɛɛsɑɑ tǝlɑlɑlɑ nɑ ɩ́ tuu nɑ ɩ́ tɔ sɩ: Nɑ Ɩsɔ, mɑ tɑ nyɩ ɑpɑlʋ ɩnɩ. Tǝnɑɣɑ kɑmpɑɑʋ koo kpɑkpɑɑ.

⁷⁵Ɩlɛnɑ Piyɛɛ tɔɔsɩ nti Yesu kɑ yɔɣɔtɑ-ɩ tɔ tǝ tɔɔ sɩ: Mpi pɩɩ tɑkɩ kɑmpɑɑʋ koou tɔ n tɛmɑ tɔm toosoɣo kpɛɛsʋɣʋ sɩ n tɑ nyɩ-m kɛ́ n tɑ nyɩ-m. Ḿpʋ́ɣʋ́ ɩ tukɑɑ nɑ ɩ́ lɩɩ, ɩlɛnɑ ɩ́ wii ɩsɩɩ ɩ sǝkɩ ɩ sǝkɩ.