Mɑtiyee 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ḿpʋ́ɣʋ́ Yesu tɔmɑ sɩ: Ḿpʋ́ɣʋ́ pǝ wɛɛ, ɩsɔtɑɑ Kɑwulɑɣɑ kɑ́ nǝɣǝsǝnɑ kɛ́ ɩsɩɩ pɛɛlɑɑ nɑɑnʋwɑ wei ɩ kpɑɣɑ fǝtǝlɑnɑɑ nɑ ɩ́ tɛɛ ɑkpɑɣɑlʋ sǝŋʋɣʋ tɔ.

²Pɑ tɑɑ kɑkpɑsɩ kɛ kʋmɛlɛmǝŋ nɑ kɑkpɑsɩ kɛ lɑɣɑtʋnɑɑ.

³Kʋmɛlɛmǝŋ nɑ́ kpɑɣɑ fǝtǝlɑnɑɑ, ɩlɛnɑ pɑ́ yele nim cosuɣu sɩ pɑ tɔkǝɣɩ pɑ tɔɔ.

⁴Amɑ lɑɣɑtʋnɑɑ nɑ́ kpɑɣɑ pɑ fǝtǝlɑnɑɑ, ɩlɛnɑ pɑ́ cosi nim kɛ kpɑlǝpɑnɑɑ tɑɑ nɑ pɑ́ tɔkɩ pɑ tɔɔ tɔtɔ.

⁵Akpɑɣɑlʋ fɛɩ ɩ́ kɔɔ lɔŋ, ɩlɛnɑ tom cɑŋ nɑ pǝ́ kɛlɩ-wɛ nɑ pɑ́ too pɑ nɑɑnʋwɑ ɩnɩ.

⁶Ḿpʋ́ɣʋ́ pǝ kɛɛsɑ ɑhoo hɛkɑ, ɩlɛnɑ pɑ́ nɩɩ pǝ kiisɑɑ sɩ: Akpɑɣɑlʋ ntɛ́, ɩ́ kʋlɩ nɑ ɩ́ sǝŋɩ-ɩ.

⁷Tǝnɑɣɑ pɛɛlɑɑ mpɛ pɑ femɑ nɑ pɑ́ nyɔɔsǝɣɩ pɑ fǝtǝlɑnɑɑ.

⁸Ḿpʋ́ɣʋ́ kʋmɛlɛmǝŋ tɔmɑ lɑɣɑtʋnɑɑ sɩ: Ɩ́ pɑsɑ-tʋɣʋ mǝ nim, tɑ fǝtǝlɑnɑɑ cɑɑ tem.

⁹Ɩlɛnɑ lɑɣɑtʋnɑɑ nɑ́ɑ́ cɔ-wɛ sɩ: Ye tǝ pɑsɑ-mɛ pǝ kɑɑ tɑlɑ tɑ́. Ɩ́ polo pɛɛtǝlɑɑ cɔlɔ nɑ ɩ́ yɑ.

¹⁰Wɑɑtʋ wei kʋmɛlɛmǝŋ tɛɛ ḿpʋ́ɣʋ́ nim yɑpʋ tɔ, ɩlɛnɑ ɑkpɑɣɑlʋ tɑlɑ. Nɑ ɩ́ nɑ mpɑ pɑ sɔɔlʋ kɑ pɩɩwɑ mpʋ tɔ pɑ́ sʋʋ ɑkpɑɣɑlɛ kʋtɔɣɔʋ tǝtɔɣɔlɛ tɑɑ, nɑ pɑ́ tǝkɩ nɔnɔɣɔ nɑ pɑ́ kɑlǝsɩ tǝkem.

¹¹Pǝ lɑpɑ lɑɑsɑɣɑ ɩlɛ kʋmɛlɛmǝŋ ɩnɩ ɩ́ mǝlɑɑ kɛlɛ, nɑ ɩ́ tɔŋ sɩ: Tɑcɑɑ Tɑcɑɑ, tʋlɩ-tʋ.

¹²Ḿpʋ́ɣʋ́ ɑkpɑɣɑlʋ nɑ́ cɔ-wɛ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, mɑ tɑ nyɩ-mɛ.

¹³Tǝnɑɣɑ Yesu tɑsɑ-wɛɣɛ kpɑɑlʋɣʋ sɩ ye mpʋ ɩ́ feŋiɣi. Mpi tɔ, ɩ́ tɑ nyɩ kʋyɑŋku nɑ ɩsǝnɑ wɑɑtʋ pɩɩ lɑ tɔ.

¹⁴Pɩɩ nǝɣǝsǝnɑ kɛ́ ɩsɩɩ yʋlʋ kʋlʋɣʋ sɩ ɩ tɛɛ yɛlɑ, nɑ ɩ́ yɑɑ ɩ tǝmlɛ nyǝ́mɑ nɑ ɩ́ tʋ pɑ niŋ tɑɑ kɛ́ ɩ wɛnɑʋ tɔ.

¹⁵Ɩ yɑɑ kɑncɑɑlɑɣɑ nyǝŋ nɑ ɩ́ cɛlɛ ɩlɛɣɛ wʋlɑ nyǝɣǝtʋ nɑsǝlɛ nɑ nɩɩnʋwɑ (500). Nɑ ɩ́ yɑɑ lɛlʋ ɩlɛnɑ ɩ́ cɛlɑ ɩlɛɣɛ wʋlɑ nyǝɣǝtʋ ŋmʋnʋɣʋ (200). Pǝ tɑlɑ tooso nyǝŋ, ɩlɛnɑ ɩ́ cɛlɑ ɩlɛɣɛ wʋlɑ nyǝɣǝtʋ nɩɩnʋwɑ (100). Ɩ kɛɛsǝnɑ pɑɑ wei ɩ pǝsʋɣʋ kɛ́ nɑ ɩ́ cɛlɛ-ɩ. Ɩlɛnɑ ɩ́ kʋlɩ nɑ ɩ́ tɛɛ.

¹⁶Tǝnɑɣɑ wei ɩ kɑ cɛlɑ nyǝɣǝtʋ nɑsǝlɛ nɑ nɩɩnʋwɑ (500) tɔ ɩ tɛɛ kpɑkpɑɑ nɑ ɩ́ sʋʋ tɑɑtʋɣʋ, nɑ pǝ́ sɛɛ-ɩ nyǝɣǝtʋ nɑsǝlɛ nɑ nɩɩnʋwɑ (500) tɔtɔ.

¹⁷Wei pɑɑ cɛlɑ nyǝɣǝtʋ ŋmʋnʋɣʋ (200) tɔ, ɩ́lɛ́ ɩ tɑɑtɑ mpʋ tɔtɔ, nɑ pǝ́ sɛɛ-ɩ nyǝɣǝtʋ ŋmʋnʋɣʋ (200) tɔtɔ.

¹⁸Amɑ wei pɑɑ cɛlɑ nyǝɣǝtʋ nɩɩnʋwɑ tɔ, ɩ́lɛ́ ɩ polɑɑ kɛ́ nɑ ɩ́ huli pʋ́ʋ́ɣʋ́ kɛ ɑtɛ nɑ ɩ́ ŋmɛsɩ pɑ cɑɑ liɣitee ɑnɩ.

¹⁹Pǝ leelɑɑ, ɩlɛnɑ pɑ cɑɑ ɩnɩ ɩ́ kɔɔ. Ɩ tɑlɑ mpʋ, ɩlɛnɑ ɩ́ yɑɑ-wɛ sɩ pɑ́ hʋlɩ-ɩ ɩsǝnɑ pɑ lɑpɑ pɑ liɣitee nɑ pǝ lɩɩ mpi tɔ.

²⁰Ḿpʋ́ɣʋ́ wei cɛcɛ kɑ cɛlɑ nyǝɣǝtʋ nɑsǝlɛ nɑ nɩɩnʋwɑ (500) tɔ ɩ́lɛ́ ɩ kɔmɑ nɑ ɩ́ hʋlɩ-ɩ nyǝɣǝtʋ nɑsǝlɛ nɑ nɩɩnʋwɑ (500) wei pǝ sɛɛ-ɩ tɔ. Nɑ ɩ́ tɔ sɩ: Tɑcɑɑ, n kɑ cɛlɑ-m nyǝɣǝtʋ nɑsǝlɛ nɑ nɩɩnʋwɑ (500), nɑ pǝ́ sɛɛ-m nyǝɣǝtʋ nɑsǝlɛ nɑ nɩɩnʋwɑ tɔtɔ.

²¹Ḿpʋ́ɣʋ́ ɩ tɔmɑ-ɩ sɩ: Pǝ wɛ teu, n kɛ́ tǝmlɛ tʋ kʋpɑmpɑŋ. Ɩsǝnɑ mpi n lɑpǝnɑ pǝcɔ nyǝm kɛ teu kɛ ɩsǝntɔ tɔ, mɑɑ cɛlɛ-ŋ sɔsɔm. Kɔɔ nɑ mɑ́ nɑ-ŋ tǝ́ yɔɔlɩ.

²²Pǝlɛ pǝ wɑɑlɩ kɛ́ tǝmlɛ tʋ wei pɑ cɛlɑ nyǝɣǝtʋ ŋmʋnʋɣʋ (200) tɔ, ɩ́lɛ́ ɩ kɔmɑ nɑ ɩ́ tɔ sɩ: Tɑcɑɑ, n kɑ cɛlɑ-m nyǝɣǝtʋ ŋmʋnʋɣʋ (200), nɑ pǝ sɛɛ-m ŋmʋnʋɣʋ (200) tɔtɔ.

²³Ḿpʋ́ɣʋ́ pɑ cɑɑ ɩnɩ ɩ tɔmɑ ɩ́lɛ́ tɔtɔ sɩ: Pǝ wɛ teu, n kɛ́ tǝmlɛ tʋ kʋpɑmpɑŋ. Ɩsǝnɑ mpi n lɑpǝnɑ pǝcɔ nyǝm kɛ teu kɛ ɩsǝntɔ tɔ, mɑɑ cɛlɛ-ŋ sɔsɔm. Kɔɔ nɑ mɑ nɑ-ŋ tǝ́ yɔɔlɩ.

²⁴Pǝ tɑlɑ wei pɑɑ cɛlɑ nyǝɣǝtʋ nɩɩnʋwɑ (100) tɔ, ɩlɛnɑ ɩ́ tɔ sɩ: Tɑcɑɑ, mɑ nyǝmɑ́ nyɑ́ tɔɔ sɩ n kɛ́ yʋlʋ kɑtɛ tʋ. Pǝ tɑɣɑ pʋlʋ tɔɔ, timpi n tɑ tuu tɔɣɔ n kʋŋ, nɑ timpi n tɑ ŋmɩɩsɩ tɔɣɔ n cɛkɩ.

²⁵Sɔɣɔntʋ lɑpɑ-m, ɩlɛnɑ mɑ́ polo nɑ mɑ́ pi nyɑ́ liɣitee kɛ ɑtɛ kɛ teu tǝkulɑkulɑ. Mʋ nyɑ́ cɛɛ.

²⁶Tǝnɑɣɑ ɩ cɑɑ tɔmɑ-ɩ sɩ: Amɑ n kɛ́ tǝmlɛ tʋ ɩsɑɣɑʋ nɑ felentu kɛ́. N kɑ nyǝmɑ́ mpʋ sɩ timpi mɑ tɑ tuu tɔɣɔ mɑ kʋŋ, nɑ timpi mɑ tɑ ŋmɩɩsɩ tɔɣɔ mɑ cɛkɩ ɩlɛ,

²⁷pepe tɔɔ kɛ́ n tɑɑ tʋ mɑ liɣitee ɑnǝɣɩ pɑnci tɑɑ? Mɑ kɔmɑ ɩsǝntɔ tɔ mɑɑ mɑɣɑnɑ pǝ sɛɛ ɑ tɔɔ nɑ mɑ́ kpɛntɩ nɑ mɑ́ mʋ.

²⁸Tɔʋ, ɩ́ lɛɛkɩ nyǝɣǝtʋ nɩɩnʋwɑ (100) ɩnǝɣɩ ɩ niŋ tɑɑ, nɑ ɩ́ sɔɔsɩ nyǝɣǝtʋ nɑsǝlɛ nɑ nɩɩnʋwɑ (500) tʋ.

²⁹Pǝ tɑɣɑ pʋlʋ, timpi pǝ wɛɛ tɔɣɔ pǝ sɔɔsǝɣɩ teu sɩ pǝ́ tɔɔlǝnɑ pɛlɛ. Amɑ wei ɩ fɛɩnɑ pʋlʋ tɔ, pɑɑ pǝciiu mɑɣɑmɑɣɑ kɛ ɩ wɛnɑ, pɑɑ lɛɛkɩ kɛ́.

³⁰Ɩ́ kpɑɣɑ tǝmlɛ tʋ yem ɩnɩ nɑ ɩ́ pɛtɩ-ɩ ɑwɑlɩ kɛ́ sǝkpɛtʋɣʋ tɑɑ. Tǝnɑɣɑ ɩ kɑ́ cɑsǝɣɩ kɑpusi nɑ ɩ́ nyɑsǝɣɩ ɩ tǝɣɩ kelɑ.

³¹Ḿpʋ́ɣʋ́ Yesu yɔɣɔtɑɑ sɩ: Wɑɑtʋ wei Yʋlʋ Pǝyɑɣɑ mɑ́, mɑɑ kɔɔ ɩsɩɩ wulɑʋ sɔsɔ nɑ ɩsɔtɑɑ tillɑɑ tǝnɑ tɔ, mɑɑ cɑɣɑ mɑ teeli kumte tɔɔ.

³²Nɑ ɑtɛ pɩɩtimnɑɑ tǝnɑ kɑ́ koti mɑ ɩsɛntɑɑ. Mɑɑ fɑɣɑsɩ yǝlɑɑ ɩsɩɩ tiikilu fɑɣɑsʋɣʋ heeŋ nɑ pǝ́ŋ tɔ.

³³Mɑɑ sɩɩ heeŋ kɛ mɑ ntɔɣɔŋ tɔɔ nɑ pǝ́ŋ kɛ mɑ mpǝtǝŋ tɔɔ.

³⁴Wulɑʋ Sɔsɔ mɑ́, mɑɑ heeli mpɑ pɑ wɛ mɑ ntɔɣɔŋ tɔɔ tɔ sɩ: Mɛ mpɑ mɑ Cɑɑ yelɑɑ nɑ ɩ́ nɩɩ leleŋ tɔ, ɩ́ kɔɔ nɑ ɩ́ tɔɣɔ Kɑwulɑɣɑ ŋkɑ pɑɑ sɩɩ-mɛɣɛ hɑtoo ɑntulinyɑ lɑpʋ wɑɑtʋ tɔ.

³⁵Pǝ tɑɣɑ pʋlʋ, nyɔɣɔsɩ kɑ kpɑ-m tɔ mǝ hɑnɑ-m tɔɣɔnɑɣɑ. Lʋkɔtʋ kpɑ-m tɔ mǝ hɑnɑ-m lʋm nɑ mɑ́ nyɔɔ. Mɑɑ kɛ́ mʋʋlʋ tɔ mǝ kpɑɣɑnɑ-m nɑ ɩ́ ponɑ mǝ tɛ.

³⁶Mɑɑ wɛ kpɛtɛ tɔ mǝ hɑnɑ-m wontu. Pǝ wɩɩkɑɣɑ-m tɔ mǝ fɛpǝnɑ-m. Pɑɑ tǝkɑ-m sɑlǝkɑ tɑɑ tɔ mǝ kɔŋɑɣɑnɑ nɑ ɩ́ nɑɑ-m.

³⁷Kʋpɑmɑ kɑ́ cɔ-m sɩ: Tɑcɑɑ, leɣe tǝ nɑ-ŋ nɑ nyɔɣɔsɩ wɩɩ-ŋ nɑ tǝ́ hɑ-ŋ tɔɣɔnɑɣɑ, nɑ lʋkɔtʋ wɛnɑ-ŋ nɑ tǝ́ hɑ-ŋ lʋm?

³⁸Leɣe tǝ nɑ-ŋ nɑ ń kɛ́ mʋʋlʋ nɑ tǝ́ kpɑɣɑ-ŋ nɑ tǝ́ ponɑ tɑ tɛ? Yɑɑ n wɛ kpɛtɛ nɑ tǝ́ suu-ŋ wontu?

³⁹Leɣe tǝ nɑ-ŋ nɑ pǝ́ wɩɩkɩ-ŋ, yɑɑ pɑ tǝkɑ-ŋ sɑlǝkɑ tɑɑ nɑ tǝ́ polo nyɑ́ wiiluɣu?

⁴⁰Wulɑʋ mɑ mɑɑ cɔ-wɛ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, timpi ɩ́ lɑpɑ mɑ tɑɑpɑlɑɑ pɑnɛ pɑ sǝkpemɑ tɑɑ nɔɣɔlʋɣʋ kʋpɑntʋ tɔ, mɑɣɑ ɩ́ lɑpɑ.

⁴¹Pǝlɛ pǝ wɑɑlɩ kɛ́ Wulɑʋ mɑ́, mɑɑ heeli mpɑ pɑ wɛnɑ mɑ mpǝtǝŋ tɔɔ tɔ sɩ: Mpusi nyǝ́mɑ mɛ ɩ́ tɛɛ nɑ ɩ́ fɛɛ-m. Ɩ́ polo kɔkɔ ŋkɑ pɑ tɑɣɑnɑ Ɩlɔɣɔʋ nɑ ɩ ɩsɔtɑɑ tillɑɑ pɑ tɔɔ nɑ kɑɑ teŋ tɔ kɑ tɑɑ.

⁴²Pǝ tɑɣɑ pʋlʋ tɔɔ, nyɔɣɔsɩ kɑ kpɑ-m tɔ ɩ́ tɑ hɑ-m nɑ mɑ́ tɔɣɔ. Lʋkɔtʋ kpɑ-m tɔ ɩ́ tɑ́ hɑ-m lʋm sɩ mɑ́ nyɔɔ.

⁴³Mɑɑ kɛ́ mʋʋlʋ, ɩ́ tɑ kpɑɣɑ-m nɑ ɩ́ ponɑ mǝ tɛ. Mɑɑ wɛ kpɛtɛ tɔ ɩ́ tɑ hɑ-m wontu sɩ mɑ suu. Pɩɩ wɩɩkɑɣɑ-m tɔ ɩ́ tɑ fɛ-m. Wɑɑtʋ wei mɑ wɛ sɑlǝkɑ tɑɑ tɔ ɩ́ tɑ wiili-m.

⁴⁴Nɑ pɛlɛ pɑɑ cɔ-m sɩ: Tɑcɑɑ, leɣe tǝ nɑ-ŋ nɑ nyɔɣɔsɩ yɑɑ lʋkɔtʋ pǝ wɛnɑ-ŋ, yɑɑ n kɛ́ mʋʋlʋ, yɑɑ n wɛ kpɛtɛ, yɑɑ pǝ wɩɩkɩ-ŋ, yɑɑ n wɛ sɑlǝkɑ tɑɑ, nɑ tǝ tɑ pɑɑsǝnɑ-ŋ?

⁴⁵Ɩlɛ mɑɑ cɔ-wɛ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, timpi ɩ́ tɑ́ lɑ sǝkpemɑ pɑnɛ pɑ tɑɑ nɔɣɔlʋɣʋ kʋpɑntʋ tɔ, mɑɣɑ ɩ́ tɑ́ lɑ.

⁴⁶Pɑnɛ ɩnɩ pɑɑ polo sɑlǝkɑ tɑm nyǝŋ tɑɑ, nɑ kʋpɑmɑ nɑ́ɑ́ polo weesuɣu ŋku kɩɩ tɛŋ tɔ kʋ tɑɑ.