Luku 24:1-44

¹Ḿpʋ́ɣʋ́ ɑlɑɑ tɑɑ tɛʋ kɛ cimɑɑsɩ tɑnɑŋ tɛɛ nɑ pɑ́ kʋlɩ nɑ pɑ́ polo pǝlɑɑʋ tɔɔ, nɑ pɑ́ tɔkɑ pɑ nim sɔɔsʋŋ nyǝm mpi pɑɑ tɑɣɑnɑɑ tɔ.

²Ḿpʋ́ɣʋ́ pɑ mɑɣɑnɑ pǝ kulɑ pǝlɑɑʋ pǝlɛ kɛ pǝlɑɑʋ nɔɣɔ nɑ pǝ́ pilimi-tɛ nɑ pǝ́ ponɑ pooluŋ.

³Tǝnɑɣɑ pɑ sʋʋ pǝlɑɑʋ tɑɑ, ɑmɑ pɑ tɑ mɑɣɑnɑ Tɑcɑɑ Yesu.

⁴Pɑ wɛɛ nɑ pɑ tɔŋnɑ pǝ tɔm mɑɣɑsʋɣʋ, ɩlɛ ɑpɑlɑɑ nɑpǝlǝɣɩ nɑɑlɛ lɩɩ pɑ tɔɔ kɛlɛ nɑ pɑ́ suu wontu nɑ tǝ tee kɔkɔ tǝnyǝnǝnyǝnɩ.

⁵Sɔɣɔntʋ kpɑ ɑlɑɑ nɑ pɑ́ kɑ́ pɑ nyɔɔŋ nɑ ɑtɛ. Ɩlɛnɑ yǝlɑɑ mpɛ pɑ́ tɔ-wɛ sɩ: Weesuɣu tʋ kɛ mǝ pɛɛkǝɣɩ sǝtɑɑ hɛkʋ nɑ?

⁶Ɩ fɛɩ cǝnɛ, ɩ femɑ. Ɩ́ tɑ́ tɔɔsɩ nti ɩ kɑ heelɑ-mɛɣɛ ɩ kɑ wɛʋ Kɑlilee tɔ sɩ:

⁷Pǝ wɛɛ kɛ́ sɩ pɑ́ tʋ Yʋlʋ Pǝyɑɣɑ kɛ ɑsɑɣɑɑ niŋ tɑɑ, nɑ pɑ́ kɑ-kɛɣɛ tesikɑ tɔɔ, ɩlɛ kɑɑ fe pǝ wɛɛ tooso wule.

⁸Tǝnɑɣɑ pɑ tɔɔsɑ Yesu kʋyɔɣɔtʋtʋ ntɩ.

⁹Alɑɑ lɩɩnɑ pǝlɑɑʋ tɔɔ, ɩlɛnɑ pɑ́ kpɑɣɑ pǝ tǝnɑɣɑ mpʋ nɑ pɑ́ kɛɛsɩ Yesu ɩfɑlɑɑ nɑɑnʋwɑ nɑ kʋlʋm nɑ lɛlɑɑ tǝnɑ.

¹⁰Alɑɑ mpɛɣɛlɛ Mɑkǝtɑlɑ Mɑlɩ nɑ Sɑɑnɩ nɑ Sɑɑkɩ too Mɑlɩ. Pɑ nɑ lɛlɑɑ kɛ́, nɑ tɔm kʋlʋmtʋ ntǝɣɩ pɛlɛ pɑ tɑsɑ tillɑɑ kɛ heeluɣu.

¹¹Amɑ tillɑɑ nɑ́ hʋʋkɑɣɑ sɩ tɔm nti ɑlɑɑ heelɑ-wɛ tɔ tǝ lɩɩnɑ-wɛɣɛ yem kɛ́, pɑ tɑ mʋ-wɛ nɑ-tɩ.

¹²Pɑɑ nɑ mpʋ Piyɛɛ kʋlɑɑ nɑ ɩ́ kpɑɣɑ ɑsewɑ nɑ ɩ́ polo pǝlɑɑʋ tɔɔ. Ɩ tɑlɑɑ ɩlɛnɑ ɩ́ luŋ nɑ ɩ́ wiili nɑ ɩ́ mɑɣɑnɑ kpoŋkpontu toŋ nyǝntʋ pʋŋkɑhʋlʋŋɑ sɑɑlɑsɩ tike. Pǝ wɑɑlɩ kɛ́ ɩ kʋlɑɑ nɑ ɩ́ mǝlɩ ɩ tɛ nɑ piti kpɑ-ɩ sɔsɔm kɛ nti tǝ lɑpɑ mpʋ tɔ tǝ tɔɔ.

¹³Wʋlɛ ntɛ́ tǝ mɑɣɑmɑɣɑ kɛ Yesu nɑ tillɑɑ tɑɑ nɑɑlɛ nɑpǝlɩ nɑ́ kʋlɑɑ nɑ pɑ́ puki ɩcɑtɛ nte pɑ yɑɑ sɩ Ɩmɑyusi tɔ. Ɩcɑtɛ ntɛ́ nɑ Yosɑlɛm pǝ pooluŋ nǝɣǝsǝnɑ kilomɛɛtǝlǝnɑɑ nɑɑnʋwɑ nɑ kʋlʋm.

¹⁴Mpi pǝ tǝnɑ pǝ hɔlɑɑ tɔ pǝ fɑɑci kɛ pɑ lɑkɑɣɑ.

¹⁵Pɑ tɔŋnɑ yɔɣɔtʋɣʋ nɑ pɑ́ mɑɣɑsǝɣɩ-tɩ ɩlɛ Yesu mɑɣɑmɑɣɑ hikɑ-wɛɣɛlɛ, nɑ ɩ́ nɑ-wɛ pɑ́ tɔŋ.

¹⁶Pɑ nɑ-ɩ, ɩlɛ pǝ tɑ cɛ pɑ ɩsɛntɔɔ kɛ́ sɩ pɑ́ nyǝmɩ-ɩ.

¹⁷Tǝnɑɣɑ Yesu pɔɔsɑ-wɛ sɩ: Ɩ́ tɔŋ ɩlɛ tɔm ntiɣi ɩ́ mɑɣɑsǝɣɩ mpʋ? Ḿpʋ́ɣʋ́ pɑ sǝŋɑɑ nɑ pɑ lɑŋɑ wɑkǝlɑ tǝnɑŋnɑŋ.

¹⁸Tǝnɑɣɑ pɑ tɑɑ lɛlʋ wei pɑ yɑɑ sɩ Kǝleupɑɑsɩ tɔ ɩ tɔmɑ-ɩ sɩ: Pǝ pɔʋ Yosɑlɛm ɩnɛ ɩ tǝnɑ tɔ, nyɑ́ tike nyɑ́ tɑ nɩɩnɑ ntɛɣɛ kɔkɔlɔnɑɑ mpɑ pɑ hɔlɑ kʋyɛɛŋ ɩnɛ ɩ tɑɑ tɔ?

¹⁹Ḿpʋ́ɣʋ́ ɩ pɔɔsɑ-wɛ sɩ: Kɔkɔlɔnɑɑ mpɑ ye? Ɩlɛnɑ tǝŋlɑɑ nɑɑlɛ cɔ Yesu sɩ: Mpi pǝ mɑɣɑnɑ Nɑsɑlɛtɩ Yesu wei ɩ kɛ́ Ɩsɔ kʋyɔɣɔtʋtʋ tɛlǝsʋlʋ sɔsɔ tɔ. Pǝ́cɔ́ ɩ kɑ pǝsɑ tǝmɑ sɔsɔɔnɑ lɑpʋ nɑ sɛɣɛsʋɣʋ kɛ pǝ tɩɩ fɛɩ, hɑlǝnɑ Ɩsɔ mɑɣɑmɑɣɑ nyǝnɑ-ɩ sɔsɔ nɑ yǝlɑɑ tǝnɑ tɔtɔ.

²⁰Tɑ kɔtǝlɑɑ sɔsɑɑ, nɑ tɑ́ nyʋɣʋ nyǝ́mɑ pɑ kpɑnɑ-ɩ nɑ pɑ́ kʋ-ɩ, nɑ sǝm tesikɑ tɔɔ kɛ́ pɑ kɑmɑ-ɩ.

²¹Tɑ́ tɛɛlɑɣɑɑ sɩ ɩnɩ ɩ kɑ́ yɑnɑ ntɛɣɛ Ɩsɛɣɛlɩ nyʋɣʋ. Tɔʋ sɑŋɑ tɑɑ wɛɛ tooso kɔlɔ, pǝ tǝnɑɣɑ mpʋ pǝ hɔlʋɣʋ tɔ.

²²Pǝlɛ pǝ pɑɑsi tɑ́ tɑɑ ɑlɑɑ nɑpǝlɩ pɑ tʋ-tʋɣʋ piti tɑɑ. Pɑ tɑɑ tɛʋ nɑ pɑ́ polo pǝlɑɑʋ tɔɔ.

²³Amɑ pɑ tɑ mɑɣɑnɑ sǝtʋ. Pɑ mǝlɑɑ ɩlɛnɑ pɑ́ heeli-tʋ sɩ: Ɩsɔtɑɑ tillu lɩɩ tɑ́ tɔɔ, nɑ ɩ heelɑ-tʋ sɩ ɩ femɑ.

²⁴Tɑ́ tɑɑ lɛlɑɑ nɑ́ polɑ pǝlɑɑʋ tɔɔ nɑ ɩsǝnɑ mpi ɑlɑɑ kɛɛsɑɑ tɔ, ḿpʋ́ɣʋ́ pɑ mɑɣɑnɑɑ tǝtɛŋɛlɛŋ. Amɑ ɩ mɑɣɑmɑɣɑ kɛ pɑ tɑ nɑ́.

²⁵Tǝnɑɣɑ Yesu tɔmɑ-wɛ sɩ: Ɩ́ kɛ́ lɑɣɑtʋ fɛɩnɑɑ kɛ́. Pepe tɔɔ kɛ́ ɩɩ mʋɣɩ lɔŋ kɛ nti Ɩsɔ kʋyɔɣɔtʋtʋ tɛlǝsǝlɑɑ kɑ kpɑɑlɑɑ tɔ ye?

²⁶Pɩɩ wɛɛ sɩ Mesii kɑ́ tɔɣɔ kʋnyɔŋ kɛ ḿpʋ́ɣʋ́ nɑ pǝ́cɔ́ pɑ́ tʋ-ɩ teeli mɛɛ.

²⁷Ḿpʋ́ɣʋ́ ɩ kpɑɣɑ Ɩsɔ Tɔm tɑkǝlɑɣɑ tɑɑ tɔm nɑ ɩ́ sɛɣɛsɩ-wɛɣɛ timpi pɑ yɔɣɔtɑ ɩ tɔm tɔ. Moisi tɑkǝlɑsɩ kɛ ɩ́ cɑɑlǝnɑɑ nɑ ɩ́ kpɛntɩ nɑ ɩ́ tʋɣʋtǝnɑ Ɩsɔ kʋyɔɣɔtʋtʋ tɛlǝsǝlɑɑ tǝnɑ nyǝŋsɩ tɑɑ.

²⁸Pɑ kɔmɑ nɑ pɑ́ tɑlɑ ɩcɑtɛ nte pɑ pukɑɣɑ tɔ, ɩlɛnɑ Yesu lɑ ɩsɩɩ ɩ tɛɛkɩ tǝnɑ tɔɔ.

²⁹Amɑ pɑ kpɑ-ɩ sɩ: Tɑ́ nɑ-ŋ tǝ́ sʋʋ, nn nɑɑ tɑɑnɑɣɑ tɑɑnɑɑ, nɑ pǝ́ cɑɑ yuɣu. Ḿpʋ́ɣʋ́ Yesu cɑɣɑɑ nɑ ɩ́ nɑ-wɛ pɑ́ tɑŋ tɑɑnɑɣɑ.

³⁰Ɩ́ nɑ-wɛ pɑ cɑɣɑɑ nɑ pɑ́ tɔkɩ, ɩlɛnɑ ɩ́ kpɑɣɑ potopoto nɑ ɩ́ sɛɛ Ɩsɔ kɛ́ ɩ́ nɑ tǝmlɛ, ɩlɛnɑ ɩ́ fɑɣɑ-ɩ nɑ ɩ́ cɛlɛ-wɛ.

³¹Tǝnɑɣɑ pǝ cɛpɑ pɑ ɩsɛntɔɔ nɑ pɑ́ nyǝmɩ-ɩ. Ḿpʋ́ɣʋ́ ɩ mʋkɑ yem kɛ́ pɑ hɛkʋ tɑɑ tǝnɑ.

³²Tǝnɑɣɑ pɑ tɔmɑ tǝmɑ sɩ: Aŋhɑɑ, pǝtooli, tǝ yɔɣɔtɑɣɑ nɑ ɩ́ sɛɣɛsǝɣɩ-tʋɣʋ Ɩsɔ Tɔm kɛ mpɑɑʋ tɑɑ tɔ pǝ sʋʋ-tʋɣʋ teu tǝkɑŋkɑŋ nɑ?

³³Tǝnɑɣɑ tǝŋlɑɑ nɑɑlɛ ɩnɩ ɩ kʋlɑ kpɑkpɑɑ nɑ pɑ́ mǝlɩ Yosɑlɛm. Ɩlɛnɑ pɑ́ mɑɣɑnɑ pɑ nɑɑnʋwɑ nɑ kʋlʋm ɩnɩ nɑ pɑ tɑɑpɑlɑɑ pɑ kotɑɑ,

³⁴nɑ pɑ́ tɔŋ sɩ: Tɑmpɑnɑ tɔɔ Tɑcɑɑ femɑ. Simɔŋ nɑ-ɩ.

³⁵Ḿpʋ́ɣʋ́ mpɛ pɑ mɑɣɑmɑɣɑ pɑ kɛɛsɑ-wɛɣɛ mpi pǝ lɑpɑ-wɛɣɛ mpɑɑʋ tɑɑ tɔ, nɑ ɩsǝnɑ pɑ nyǝmnɑ Yesu kɛ́ potopoto tǝfɑɣɑlɛ tɔ.

³⁶Pɑ tɔŋnɑ ḿpʋ́ɣʋ́ yɔɣɔtʋɣʋ, ɩlɛnɑ Yesu mɑɣɑmɑɣɑ lɩɩ pɑ hɛkʋ tɑɑ nɑ ɩ́ tɔ-wɛ sɩ: Ɩsɔ ɩ́ hɛɛsɩ lɑŋɑ.

³⁷Tǝnɑɣɑ sɔɣɔntʋ kpɑ-wɛ nɑ pɑ́ tɔnǝŋ pɑɑkɩ. Pǝ tɑɣɑ pʋlʋ, pɑɑ nyǝmɑɣɑ sɩ ɑsǝnɑɑlɩɩ kɛ́.

³⁸Tǝnɑɣɑ Yesu tɔmɑ-wɛ sɩ: Pepe tɔɔ kɛ́ mǝ pʋntʋ kpɛɛtǝɣɩ mpʋ? Nɑ pepe tɔɔ kɛ́ ɩ́ lɑkɩ sikɑ kɛ ḿpʋ́ɣʋ́ mǝ tɑɑ?

³⁹Ɩ́ nyǝnɩ mɑ niŋ nɑ mɑ nɔɔhɛɛ nɑ ɩ́ nɑ́, mɑɣɑ te. Ɩ́ tɑkɩ-m nɑ ɩ́ nɑ́. Mɑ wɛnɑ tɔnʋɣʋ nɑ mʋwɑ, mɑ fɛɩ ɩsɩɩ mpi pǝ nɑɑ yem tɔ.

⁴⁰Yesu yɔɣɔtɑ mpʋ, ɩlɛnɑ ɩ́ hʋ́lɩ́-wɛɣɛ ɩ niŋ nɑ ɩ nɔɔhɛɛ.

⁴¹Lɑŋhʋlʋmlɛ nɑ piti wei ɩ kpɑ-wɛ tɔ pǝ kɑtɑtǝlɑɣɑ tɔɔ pɑ tɑ pǝsɩ nɑ pɑ́ mʋ-tɩ. Tǝnɑɣɑ ɩ pɔɔsɑ-wɛ sɩ: Ɩ́ wɛnɑ tɔɣɔnɑɣɑ nɑkǝlǝɣɩ cǝnɛ?

⁴²Ḿpʋ́ɣʋ́ pɑ kɔnɑ-ɩ tinte kʋwɔpǝlɛ tilimle,

⁴³nɑ ɩ́ mʋ nɑ ɩ́ tɔɣɔ pɑ ɩsɛntɑɑ.

⁴⁴Pǝ wɑɑlɩ kɛ́ ɩ tɔmɑ sɩ: Ntǝɣɩ mɑɑ heelɑ-mɛɣɛ wɑɑtʋ wei mɑ nɑ-mɛ tɩɩ wɛɛ tɔ sɩ, mɑ tɔm nti nti pɑɑ ŋmɑɑ Moisi tɑkǝlɑsɩ tɑɑ nɑ Ɩsɔ kʋyɔɣɔtʋtʋ tɛlǝsǝlɑɑ nyǝŋsɩ tɑɑ nɑ Yontu tɑɑ tɔ tɩɩ lɑ.