LUCAS 24:1-44

¹Dxe ne rzelo xman, rsilgue wa yra wnaa guin ruxbaa Jesus. Weey men perfum ne wzhexkwaa men, no wanal stebëd wnaa men.

²Chene wdxiin men, wii men le gye ne zemzëë rubaa che zu tebkoo.

³Lex wdee men lenbaa, per wzëldet Jesus lo men.

⁴Axtegue nandet men pe nlaa men. Tebegue wii men le txup mgyeey ne nak lërrkabnii zuli koo men.

⁵Por tant rdxe men, wlitlo men wii men lyu. Lex re mgyeey guin lo men: ―¿Penak rye de menmbán lad mengut?

⁶Yëtre men nee; le men che wban. Gunileedx ne na men lo de chene benak ka men Galilea.

⁷Na men lo de ne Men ne wdxiid wak Mén, sdekwent mén men lo mendol chen ykaa men men lo kruz, per chene gyon gbiz, yban ke men.

⁸Orguin wnileedx men diiz ne re Jesus lo men.

⁹Chene wberee men ne wa men rubaa, wuu men diizo lo yra chibteb poxter no le lo stebëd xpén Ne.

¹⁰Laa Mli Matlen no le Xwan no le Mli xnaa Jacob no le stebëd wnaa nak ne wa wuu diiz guin lo yra poxter.

¹¹Per wlaleedxdet men logne re yra wnaa guin, nuu lextoo men pazer noze le men rnii.

¹²Per wruu Bëd, noze rzhoon Bëd za Bëd rubaa; chene wii Bëd lenbaa, nonchee saben zhoobtee. Orguin wberee Bëd, rzee rzak Bëd ne wii Bëd neguin ne wak.

¹³Dxe ke guin, za txup xpén Jesus te gyëz ne la Emaús, zeg chibteb kilometro ryano kwlo Jerusalén.

¹⁴Za men ruu men diiz yra neguin ne wak.

¹⁵Laatee ne kayuu men diizo, wbig Jesus lo men yrup men, za Jesus yra Jesus men.

¹⁶Per mase rwii men Ne, per zegnak te ne rsoow lo men, wnebeeydetgue men Ne.

¹⁷Lex wnabdiiz Ne lo men, re Ne: ―¿Pagox gwa ruu de diiz ne zëëd de nëz? ¿Penak nles nuu lextoo de?

¹⁸Wke te men ne la Cleofas, re men: ―Yrandxee mén nan ne wak Jerusalén che padxe guin. ¿Pe nonchee laa de ka Jerusalén ne nandeto?

¹⁹Lex re Ne lo men: ―¿Pagox wak? Orguin re men: ―Ne wzak Jesus zhan-Nazaret, ne nak te profet ne kesentyent rap poder nes lo Dëdyuzh no le nes lo yra mén, nigle por yra ne rlaa zhaa, nigle por yra diiz ne rnii zhaa.

²⁰Wdekwent xextis be zhaa yra xextis be fxuz ne rnebééy lo yra fxuz chen ykaa mén zhaa lo kruz; zenga guet zhaa.

²¹Le noo yra noo nuu lextoo ne laa zhaa nak ne yselaa men-Israel, per orrenaa nedxeree wyon gbiz ne wak yra neree.

²²Le nersilree, wa txup tson wnaa ne nuu lad noo rubaa, lex legue wneche men noo,

²³porke wzëldet zhaa lo men, lex na men lo noo yra noo ne wlalo txup angel lo men, re angel ne mbán zhaa.

²⁴Zhich guin wague txup tson xkompanyer noo rubaa, no nli ne zenga wak zegne na yra wnaa guin, per wiidet xkompanyer noo zhaa.

²⁵Orguin re Jesus lo men: ―¿Penak rdeedet de kwent, no pa axtegue or ylaleedx de ne re profet?

²⁶¿Pe let rapdet Crist ne sak Ne yra neree antes ne gya Ne ledne nzoon?

²⁷Lex wzelo Ne wzëët Ne lo men yrup men yra ne zëëd lo xgyiich Dëdyuzh por laa Ne. Primer wzëët Ne ne zëëd lo liber ne wkaa Moises, zhich guin wzëët Ne ne wkaa yra profet.

²⁸Ne wdxiin men gyëz ne za men, wlaa Jesus zeg rlaa men ne tesu.

²⁹Per wkyenfwers men Ne ne yzëën Ne yra ne men, re men lo Ne: ―Guzëën, porke che rzëë no che zëdnit lyu. Orguin wdee Ne lenyuu chen yzëën Ne yra Ne men.

³⁰Chene che zob Ne lo mezh yra Ne men, wgoob Ne gyëtxtil, lex wdee Ne dexkyizhtee lo Dëdyuzh; wluzh nga wla No, wdee No lo men yrup men.

³¹Orguin nak bzalo men zegnak ne wyenii, wnebeey men Ne; per orgueguin nonchee wnitlo Ne.

³²Lex rulsaa men diiz, re men: ―Kon rrazón ne nzoon nuu lextoo be chene zëëd be nëz ne zëdyuu zhaa diiz lo be no chene rzëët zhaa gan pe rna ne re lo xgyiich Dëdyuzh.

³³Orguin wyuli men nëz, wbë́zdetre men nga. Wberee ke men Jerusalén ledne ndxin yra chibteb xpoxter Ne no le stebëd xkompanyer men

³⁴ne re lo men: ―Nli ne wban Jesus, wlalo Ne lo Simon.

³⁵Lex wuu men diiz lo yra poxter logne wzak men nëz no ne gan pezee wnebeey men Jesus chene wla Ne gyëtxtil.

³⁶Benak kayuu men diiz guin, tebegue wlalo Jesus gwrooltee lad men yra men. Wgabtyuzh Ne men, re Ne: ―Dëdyuzh yseleedx gyelendxi lo de yra de.

³⁷Kesentyent wdxe men yra men, nuu lextoo men pazer te anem rwii men.

³⁸Per re Jesus lo men: ―¿Penak rdxe de? ¿Penak nutxup lextoo de?

³⁹Gukwii nya noo, gukwii nii noo gante, noo ke ne. Gunëëz led noo gante, porke te anem neeydeto bëël, ni nuudeto dxit zegne rwii de nak noo.

⁴⁰Wluzhse re Ne zenga, wluu nya Ne lo men no wluu nii Ne.

⁴¹Per kom wlaleedxdetgue meno por tant rzhiilen men no por tant gyelgwzee ne nuu men, lex re Jesus lo men: ―¿Pe nuu pe rap de gu be?

⁴²Orguin wdee men tebla mël wgye lo Ne no le stebla mkuudx ne nuu dxin.

⁴³Lex wnëëz No, wu No nes lo men yra men.

⁴⁴Zhich guin re Ne lo men: ―Neree ne wzak noo, laa we nga na noo lo de yra de chene benak zu noo lad de: ne rap degne gak xkwent noo ne zëëd lo liber ne wkaa Moises no le ne zëëd lo yra liber ne wkaa yra profet no le lo liber Salmos.