Lucas 24:1-44

¹Ri nabꞌe qꞌij re ri semana lik anim tan rixoqibꞌ e petinaq lo Galilea y jujun chik ixoqibꞌ, xebꞌek pa muqutal wi ri Jesús, yey kukꞌaꞌam bꞌi kunabꞌal lik kiꞌ ruxlabꞌ, ri kiyijbꞌam bꞌi.

²Yey xeꞌkiriqa rabꞌaj esam chi chuchiꞌ ri muqubꞌal.

³Xebꞌok kꞌu bꞌi chupa ri muqubꞌal, pero na xkiriq ta chi rucuerpo ri Qanimajawal Jesucristo.

⁴Lik kꞌut bꞌenaq ri kinaꞌoj puwi waꞌ, echiriꞌ xaqikꞌateꞌt xewinaqir kaꞌibꞌ achijabꞌ chikiwach, lik kawolqꞌin ri kiqꞌuꞌ.

⁵Rixoqibꞌ lik xkixiꞌij kibꞌ y xkiqasaj ri kipalaj pulew. Ekꞌu ri kaꞌibꞌ achijabꞌ xkibꞌiꞌij chike: —¿Suꞌchak kitzukuj chikixoꞌl ri ekaminaq ri Jun kꞌaslik?

⁶Rire na jinta chi wara, ma kꞌastajinaq chi lo chikixoꞌl ri ekaminaq. Kꞌuna chikꞌuꞌx saꞌ rubꞌiꞌim lo chiwe echiriꞌ kꞌa kꞌo Galilea,

⁷echiriꞌ xubꞌiꞌij: “Lik chirajawaxik wi Ralaxel Chikixoꞌl Tikawex kayaꞌ pakiqꞌabꞌ achijabꞌ aj makibꞌ chaꞌ kakamisax chwa cruz, noꞌj Rire kakꞌastaj lo churox qꞌij” —xechaꞌ.

⁸Kꞌa ekꞌuchiriꞌ xkꞌun chikikꞌuꞌx rixoqibꞌ ruchꞌaꞌtem ri Jesús.

⁹Echiriꞌ xetzelej lo chilaꞌ pa ri muqubꞌal, xkitzijoj ronoje waꞌ chike ri junlajuj taqoꞌn y chike konoje ri e kꞌo kukꞌ.

¹⁰Ekꞌu ri xetzijon waꞌ e ri María ri aj Magdala, ri Juana, ri María uchu ri Santiago y jujun kachbꞌiꞌil.

¹¹Yey ri taqoꞌn na xkikoj ta ri xkitzijoj rixoqibꞌ, ma e chikiwach rike, wa ixoqibꞌ echꞌuꞌjerinaq.

¹²Ekꞌu ri Pedro xyaktaj bꞌi y lik kanik xeꞌek pa kꞌo wi ri muqubꞌal re ri Jesús. Y echiriꞌ xochꞌin pan chupa, xrilo xew chi kꞌo kan ri jutaq rabꞌaꞌj kꞌul pa xbꞌolqꞌotix wi ri Jesús. Xeꞌek kꞌut lik kaminaq ranimaꞌ che ri xrilo y kutzꞌonoj chiribꞌil ribꞌ saꞌ nawi waꞌ.

¹³Chupa laꞌ laꞌ qꞌij, kaꞌibꞌ chike rutijoꞌn kebꞌin chupa ri bꞌe re keꞌek pa raldea Emaús, waꞌ kꞌo lo pa once kilómetro che ri tinamit Jerusalem.

¹⁴Xaloqꞌ kꞌu kebꞌin chupa ri bꞌe, rike kechꞌaꞌt chikiwach puwi ri kꞌakꞌ ikꞌowinaq.

¹⁵Yey echiriꞌ kechꞌaꞌt chikiwach, ri Jesús xqibꞌ kukꞌ y xerachbꞌilaj bꞌi.

¹⁶Pero rike pachaꞌ chꞌuqutal ri kiwach, ma tobꞌ xkilo na xketaꞌmaj ta uwach.

¹⁷Ekꞌu ri Jesús xubꞌiꞌij chike: —¿Saꞌ puwiꞌ kachꞌaꞌt wi alaq chupa wa bꞌe? ¿Y suꞌchak kabꞌison alaq? —xchaꞌ.

¹⁸Jun kꞌu chike, Cleofas rubꞌiꞌ, xukꞌul uwach, jewaꞌ xubꞌiꞌij: —Laj xew rilal chike konoje ri ebꞌinel e kꞌo Jerusalem na etaꞌam ta la saꞌ ri kꞌakꞌ ikꞌowinaq chupa taq waꞌ wa qꞌij —xchaꞌ.

¹⁹Xubꞌiꞌij kꞌu ri Jesús chike: —¿Saꞌ ri xuꞌano? —xchaꞌ. Ewi xkibꞌiꞌij che: —E kojchꞌaꞌt puwi ri xukꞌulumaj ri Jesús ri aj Nazaret, ri nimalaj qꞌalajisanel lik kꞌo uchuqꞌabꞌ che taq ri kuꞌano y ri kubꞌiꞌij; rire lik yakom uqꞌij ruma ri Dios y kuma taq ri tikawex re ri tinamit.

²⁰Yey ri nimaq e aj chakunel pa Rocho Dios kukꞌ raj wach re ri qatinamit xkiya puqꞌabꞌ ri taqanel romano chaꞌ kaqꞌat tzij puwiꞌ y kakamisax chwa cruz.

²¹Chwi kꞌu rukamik e urox qꞌij waꞌ. Yey riꞌoj xkubꞌiꞌ qakꞌuꞌx e rire ri kukolobꞌej ri qatinamit Israel.

²²»Yey kisachisam ne qanaꞌoj jujun ixoqibꞌ ebꞌare jun chiqaxoꞌl riꞌoj oj utijoꞌn kan ri Jesús. Ma rike lik anim tan xebꞌopon chupa rumuqubꞌal,

²³pero na xkiriq ta chi rucuerpo ri Jesús. Xetzelej kꞌu lo qukꞌ, kakitzijoj chiqe xewinaqir jujun ángeles chikiwach, yey waꞌ xkibꞌiꞌij chike: “Rire kꞌastajinaq chi lo chikixoꞌl ri ekaminaq.”

²⁴Xebꞌek kꞌu jujun chiqe riꞌoj chupa rumuqubꞌal y e xkilo jelaꞌ pachaꞌ ri kibꞌiꞌim rixoqibꞌ chiqe. Noꞌj na xkil ta uwach ri Jesús —xechaꞌ.

²⁵Ekꞌu ri Jesús xubꞌiꞌij chike: —¡Toqꞌoꞌ wach alaq ma lik na kamaj ta alaq usukꞌ y kamayin alaq che ukojik janipa ri kibꞌiꞌim kan ri qꞌalajisanelabꞌ!

²⁶¿Na chirajawaxik ta nebꞌa ri Cristo, Ruchaꞌoꞌn lo ri Dios, kutij na ronoje wa kꞌaxkꞌobꞌik y tekꞌuchiriꞌ keꞌek chilaꞌ chikaj pa kayak wi uqꞌij? —xchaꞌ.

²⁷Xuqꞌalajisaj kꞌu chike ronoje ri kubꞌiꞌij chupa Ruchꞌaꞌtem ri Dios chwi Rire, xujeq lo rukꞌ ri tzꞌibꞌital kan ruma ri Moisés yey tekꞌuchiriꞌ xuqꞌalajisaj janipa ri tzꞌibꞌital chwi Rire kuma konoje ri qꞌalajisanelabꞌ.

²⁸Ekꞌuchiriꞌ xebꞌopon chupa raldea pa kebꞌek wi ri kebꞌ achijabꞌ, ri Jesús xuꞌan pachaꞌ e riꞌ xumaj chubꞌi rubꞌe.

²⁹Pero rike lik xebꞌelaj che kakanaj kan kukꞌ, jewaꞌ xkibꞌiꞌij che: —Kanaj kan la qukꞌ, ma bꞌenaq chi ri qꞌij yey ya kok raqꞌabꞌ —xechaꞌ. Ri Jesús xok kꞌu bꞌi y xkanaj kan chiriꞌ kukꞌ.

³⁰Echiriꞌ e kꞌo chi chwa ri mexa, xukꞌam ri pam y xtioxin chwach ri Dios, xuwechꞌ kꞌu upa y xuya chike.

³¹Kꞌa ekꞌuchiriꞌ xjaqataj ri kiwach y xketaꞌmaj uwach. Pero ri Jesús e laꞌ chikiwach xmalkaꞌnik.

³²Xkibꞌiꞌij kꞌu riꞌ chikiwach: —¿Na kamiqꞌmot ta nebꞌa qakꞌuꞌx che kiꞌkotemal echiriꞌ rire kachꞌaꞌt qukꞌ pa ri bꞌe y kuqꞌalajisaj chiqe Rutzij Upixabꞌ ri Dios? —xechaꞌ.

³³Na jampatana xeyaktajik y xetzelej Jerusalem. Chiriꞌ xebꞌoꞌlkiriqa ri junlajuj taqoꞌn kimolom kibꞌ kukꞌ ri kachbꞌiꞌil.

³⁴Y rike xkibꞌiꞌij chike wa kaꞌibꞌ: «¡Paqatzij wi kꞌastajinaq lo ri Qanimajawal Jesucristo ma xilitaj uwach ruma ri Simón!» kechaꞌ.

³⁵Yey la kaꞌibꞌ xkijeq utzijoxik saꞌ ri xkikꞌulumaj chupa ri bꞌe echiriꞌ xebꞌek Emaús y suꞌanik xketaꞌmaj uwach ri Jesús echiriꞌ xuwechꞌ upa ri pam.

³⁶Kꞌa ketajin ne che uchꞌaꞌtibꞌexik ri kilom y ri kitom, echiriꞌ ri Jesús xwinaqir chikiwach, xaqikꞌateꞌt xtakꞌiꞌ chikixoꞌl y jewaꞌ xubꞌiꞌij chike: —Kꞌola utzil chomal iwukꞌ —xchaꞌ.

³⁷Yey rike lik xkixiꞌij kibꞌ che, ma e chikiwach rike laj juna espíritu ri kakitzutzaꞌ uwach.

³⁸Noꞌj ri Jesús xubꞌiꞌij chike: —¿Suꞌchak kuxiꞌij ribꞌ ikꞌuꞌx y na kikoj taj we in kꞌaslik?

³⁹Chiwilape ri nuqꞌabꞌ y ri waqan; chichapape rukꞌ riqꞌabꞌ y jelaꞌ kiwil chi utz lik in ri in kꞌo iwukꞌ y na xa ta in juna espíritu, ma juna espíritu na jinta utiꞌjil y na jinta ubꞌaqil pachaꞌ ri kiwil chwe riꞌin —xchaꞌ.

⁴⁰Y ekꞌuchiriꞌ kubꞌiꞌij waꞌ, xukꞌut ruqꞌabꞌ y ri raqan chikiwach.

⁴¹Ekꞌu rike lik kekiꞌkotik y kaminaq kanimaꞌ che yey na kakiriq taj suꞌanik kakikoj ri kakilo. Ekꞌuchiriꞌ, ri Jesús xubꞌiꞌij chike: —¿Saꞌ ri kꞌo iwukꞌ re katijik? —xchaꞌ.

⁴²Xkiya kꞌu che, juchꞌaqap kar bꞌolom y uwaꞌal kabꞌ kꞌa kꞌo pa cera.

⁴³Ewi Rire xukꞌamo y xutij chikiwach.

⁴⁴Ekꞌuchiriꞌ, xubꞌiꞌij chike: —E nubꞌiꞌim lo waꞌ chiwe echiriꞌ kꞌa in kꞌo iwukꞌ: Lik chirajawaxik wi kuꞌana na janipa ri tzꞌibꞌital kan panuwi riꞌin chupa ri Tzij Pixabꞌ re ri Moisés, chupa ri kitzꞌibꞌam kan ri qꞌalajisanelabꞌ y chupa taq ri Salmos —xchaꞌ.