San Lucas 24:1-44

¹Domingo ijigʉ̃ bohrearopʉ tiquina numia ehme sitiye tiquina quehnorire Jesu masa copepʉ ne cãmahye.

²Ti copepʉ esa, ti copere bihariare ʉtãre tiquina põo duhu cũria ʉtãre ihñahye.

³Sa ihñañe tiquina ti copepʉ sajãa wahahye. Jesu pagʉre bocaerahye tiquina.

⁴Tiquiro pagʉre bocaera, “¿Dʉhse wahayari?” ni tʉhotuahye tiquina. Tiquina sa ni tʉhotu yahuducuri watoa pʉaro ʉmʉa asi siteye suhti sañañequina tiquina cahapʉ ducuahye.

⁵Topʉ tiquina ducugʉ̃ ihña, numia cueye, dʉsepe curi mehna quehe sahye. Sa ye ʉmʉa pehe tiquinare yahuahye: —‍¿Dʉhsena yariariquiro ijirore Jesure macajari mʉsa? Yojopʉre tiquiro catiriquiro ijire.

⁶Tiquiro ohõre mariedare. Masa wijia tuhasari. ¿Sohõ ijiri pjere tiquiro Galileapʉ mʉsa mehna ijiro mʉsare tiquiro nidire wacũajari mʉsa?

⁷“Yʉhʉre Cohãcjʉ̃ ohorigʉre apequiro ohorota ñañequinare. Tiquiro ohori bato yʉhʉre curusapʉ quẽ biha wejẽeta tiquina. Sa yegʉ yʉhʉ yariari bato ihtia deco wahaboro masa wijiagʉtja yʉhʉ”, nidi mʉsare. ¿Tiquiro sa nidire wacũajari mʉsa? niahye ʉmʉa pehe.

⁸Tiquina sa nigʉ̃ tʉhoye, numia pehe tiquiro nidire wacũahye.

⁹Tiquina sa nidi bato tiquina tojoaa waha, once buheyequinare apequina gʉ̃hʉre tire yahu pehoahye.

¹⁰Tiquina numia pehe María Magdalena, Juana, María Santiago pacoro ijiahye. Tiquina numia apequina numia gʉ̃hʉ ijiahye Jesu buheyequinare yahuri numia.

¹¹Tiquina sa ni yahuepegʉ̃ta Jesu buheyequina pehe “Poto niñe niedaga. Ni mehoñe niaga ahriquina numia”, ni tʉhotumahye. Sa ye tiquina numiare tʉho duerahye.

¹²Tiquina sa nigʉ̃ tʉhoro, Pedro pehe masa copepʉ oma cã, ihñano wahahye. Ti copepʉ esa, tiquiro muhri ihña sõahye. Jesure tiquina wahmedi suhtiro dihitare ihñahye. “¿Dʉhse wahayari?” ni, tʉhotu, tiquiro ya wʉhʉpʉ tojoaa wahahye.

¹³Ti decota pʉaro Jesu buheyequina mehna cjẽna Emau wame tiri macapʉ wahaye niahye. Jerusalẽ once kilómetro yoaro ijire Emaupʉ esato.

¹⁴Emaupʉ waha, ijipihtiye Jerusalẽpʉ ti pjere Jesu tiquiro sa waharire tiquirore tiquina ñano yerire yahuducu cãñe niahye.

¹⁵Tiquina sa ni yahuducuri watoa Jesu pehe tiquina cahapʉ esa, tiquina mehna wahahye.

¹⁶Sa ye tiquirore ihñaepeta tiquina tiquirore ihña masiedahye.

¹⁷—‍¿Dʉhse ni yahuducu cãna niajari mʉsa? ni, sinituahye Jesu. Tiquiro sa nigʉ̃ tiquina bʉjʉa witiyequina esadʉcahye.

¹⁸Cleofa wame tiriquiro pehe Jesure yʉhtiahye: —‍¿Yojopʉre Jerusalẽpʉ tiquina yerire mʉhʉ dihita masiedajari? ni sinituahye tiquiro.

¹⁹—‍¿Dʉhse wahari Jerusalẽpʉre? niahye Jesu. Tiquiro sa nigʉ̃ Cleofa yʉhtiahye: —‍Jesure Nazare cjʉ̃nore tiquina yerire nina niaja. Tiquiro Cohãcjʉ̃ yere yahu mʉhtariquiro ijimedi. Sa ye tiquiro yahuducurire tʉhoye, tiquiro yeri gʉ̃hʉre ihñañe, “Tutuariquiro ijire”, ni, tʉhotumedi masa. Cohãcjʉ̃ gʉ̃hʉ sata ni tʉhotuaga.

²⁰Mari pahia pʉhtoa, apequina pʉhtoa mehna tiquirore wejẽ dutiye, apequinare ohori. Tiquina sa ohogʉ̃ apequina pehe tiquirore curusapʉ quẽ biha wejẽdi.

²¹“Roma cjẽnare cohãtiquiro Israe masa pʉhtoro ijiatiquiro ijire”, ni, tʉhotumi ʉsã tiquirore. Mia mehna ihtia deco wahare tiquiro yariari bato.

²²Meheñequinagã numia ʉsã mehna cjẽna numia ʉsãre acʉagʉ̃ yeri. Bohrearopʉ Jesu tiquiro masa copepʉ tiquina numia esa,

²³tiquiro pagʉre bocaerañohti. Tiquiro pagʉre bocaeraye, tiquina tojoa wihi yahuri. “Ʉsãre angele bajuari. Jesu catiñohti”, ni yahuri ʉsãre numia pehe.

²⁴Tiquina sa nigʉ̃ apequina ʉsã mehna cjẽna ti copepʉ esa, numia tiquina nidiro sahata ihñañohti. Tiquina gʉ̃hʉ Jesure ihñedañohti, niahye tiquiro Jesure.

²⁵Tiquiro sa nidi bato Jesu yahuahye tiquinare: —‍Mʉsa ne tʉho masiedare. ¿Cohãcjʉ̃ yere yahu mʉhtariquina mʉna tiquina nidire quehnoano tʉhoerari mʉsa?

²⁶Cristore tiquiro pʉhtoro ijiato pano ʉhmʉsepʉ tiquiro mʉjato pano tiquirore ñano yʉhdʉro cahmedi. ¿Tire masiedajari mʉsa? niahye Jesu tiquinare.

²⁷Sa nino Cohãcjʉ̃ Cristore tiquiro ni yahu tiquina ojoarire Jesu yahu peho cãhye tiquinare. Moise mʉnano tiquiro ojoarire Jesu yahu dʉcahye. Sa yero ijipihtiyequina Cohãcjʉ̃ yere yahu mʉhtariquina Cristore tiquina ojoari gʉ̃hʉre yahu peho cãhye tiquiro.

²⁸Tiquina wahari macapʉ tiquina esaye taye yegʉ̃, Jesu pehe tiquinare yʉhdʉ cãa wahamahye.

²⁹Tiquiro sa yepegʉ̃ta tiquina tiquirore waha dutierahye: —‍Ʉsã mehna tojoaya. Ñamicahapʉ ijire. Nahinopʉ nine, niahye tiquina tiquirore. Sa yero Jesu tiquina mehna wʉhʉpʉ sajãa wahahye.

³⁰Wʉhʉpʉ sajã sa, tiquiro tiquina mehna ihyari mesapʉ nuju sa, pãre ne, Cohãcjʉ̃re “Quehnoare”, niahye. Sa nino ti pãre nuha ne, tiquinare ohoahye.

³¹Tiquiro sa yegʉ̃ ihñañe tiquina Jesure ihña masiahye. Tiquina ihña masi dʉcagʉ̃ta tiquiro buti maa wahahye.

³²Tiquiro sa buti maa wahagʉ̃ ihñañe tiquina basi ohõ saha ni yahuducuahye: —‍Mahapʉ tiquiro marine tiquiro yahuducuri watoa Cohãcjʉ̃ tiquiro ojoarire tiquiro yahuri watoa mari jeripohnari mehna quehnoano bucueye mehna tʉhotuu mari, niahye tiquina basi.

³³Sa ni tuhasa tiquina duita Jerusalẽpʉ majare tojoaa wahahye tja. Topʉ esa, once buheyequinare apequina mehna cahmecoañequinare bocahye.

³⁴Tiquina esagʉ̃, once buheyequina ohõ saha niahye: —‍Potota mari pʉhtoro masa wijiañohti. Simo Pedro tiquirore ihñañohti, niahye once buheyequina.

³⁵Tiquina sa nigʉ̃ pʉaro Emau cjẽna mahapʉ Jesure tiquina ihñarire yahuahye: —‍Jesu pãre tiquiro nuhagʉ̃ ʉsã ihña masii tiquirore, ni, yahu pehoahye tiquina apequinare.

³⁶Tiquina sa ni yahuri watoa tiquina cahapʉ iji tuhasahye Jesu pehe. —‍¿Ijiajari mʉsa? niahye tiquiro tiquinare.

³⁷Tiquiro sa nigʉ̃ tʉhoye tiquina “Mari yariariquiro mʉnanore ihñana niaja”, ni tʉhotuye, tutuaro cueahye.

³⁸Tiquina sa cuegʉ̃ ihñano tiquiro tiquinare yahuahye: —‍¿Dʉhsena cueajari mʉsa? ¿Dʉhsena “Ahri poto ijierare”, niajari mʉsa?

³⁹Yʉhʉ omocarine, yʉhʉ dahpocãri gʉ̃hʉre ihñaña. Mʉsa yʉhʉre ihñana, ihña masinata. Yʉhʉre ñehe tuhuya. Ñehe tuhuna masinata mʉsa. Yariariquiro mʉnanopʉ pagʉ mariedare. Yʉhʉ pehe pagʉ tiaja, niahye Jesu.

⁴⁰Sa nino tiquiro omocari gʉ̃hʉre, tiquiro dahpocãri gʉ̃hʉre ihñoahye tiquinare.

⁴¹Tiquiro sa ihñoepegʉ̃ta tiquina tutuaro bucue, ihña maria waha, “Ahri poto ijieraga”, ni tʉhoturĩahye. Tiquina sa tʉhotugʉ̃ masino Jesu tiquinare sinituahye: —‍¿Ohõpʉ ihyaye ijiajari? niahye tiquiro.

⁴²Tiquiro sa nigʉ̃ tʉhoye wahi dohariquirore ohoahye tiquirore.

⁴³Tire ne, tiquina ihñonopʉ Jesu ihyahye.

⁴⁴Ihya tuhasa, Jesu yahuahye tiquinare: —‍Sohõ ijiri pje mʉsa mehna ijigʉ mʉsare yʉhʉ yahuriro sahata yojopʉ yʉhʉ sa wahaʉ. Cohãcjʉ̃ dutiye Moise marine tiquiro cũri tiquiro sa ni ojoariro sahata yʉhʉre sa wahari. Cohãcjʉ̃ yere yahu mʉhtariquina, Salmo ojoari pũre ojoayequina gʉ̃hʉ panopʉ yʉhʉre tiquina ni yahuriro sahata yojopʉre yʉhʉre sa wahari. Sa wahacjʉta ijii yʉhʉ, niahye Jesu.