Lucas 24:1-44

¹Meneng pegkeiselem te Linggo, limapos se menge bayi nengibing te metinadeg integilan dan, aw dimoton dan te linebengan ki Jesus.

²Pegdateng dan doton, kinità dan se lebeng neowang, so tapay den nekelid se dakel bato insampeng.

³Peg-awop dan diyà te lebeng, kinità dan te wedad den lawa i Jesus kidoen.

⁴Migkebulung dan aw eden se neinang. Penga niyan, kinità dan se didowa anghil kidoen, aw ontò mepotì se penenaktun dan.

⁵Timikelong se menge bayi, so ontò dan nelemitan. Minikagi se menge anghil, “Ikà niyo egpengemahà te otaw neantay lekat te nematay dini te lebenganan.

⁶Wedad sikandin dini, so neantay den lekat te nematay. Eneng-enengi niyo se inikagi din diyà kenyo kedengan dalem te pegtoladà din kidoen te Galiliya.

⁷Inikegiyan kaw din te keilangan ibegay sikandin Timanem Migpekeotaw diyà te belad te menge otaw nelegeb te salà amon imetayan dan sikandin ilansang diyà te kros, aw penga niyan, meantay sikandin lekat te nematay te iketelo te aldaw.”

⁸Yan neeneng-enengan dan te yan se inikagi i Jesus diyà kandan.

⁹Penga niyan, minolì dan, aw mig-indan dan te kedakel niyan diyà te sempolò tegusà tinoledaan i Jesus aw diyà te menge doma dan kidoen.

¹⁰Se menge bayi sìyan, yan si Maria tege Magdala, si Juana, si Maria inay i Santiago, aw menge bayi doma dan. Peg-indan dan kenyan diyà te menge sogounun i Cristo,

¹¹wedà dan pemenal te neantay den si Jesus, so eden dan aw kenà benal se inikagi dan.

¹²Meneng kimagnan si Pedro pesalo doton te lebeng. Pegdateng din doton, simelib sikandin aw timengteng doton didalem. Kinità din olò se sapot tapay inggakes diyà te lawa, meneng wedad lawa kinità din. Penga niyan, minolì sikandin gayed mig-aneng-aneng tepad te neinang, so nepela sikandin.

¹³Te aldaw sìyan, doen didowa tinoledaan i Jesus minipanaw pesalo doton te Imaos, sebad lonsod menge sempolò tegusà kilomitro lekat te Jerusalem.

¹⁴Gayed dan migpebelaw-belaway tepad te kedita te neinang ki Jesus.

¹⁵Dalem pa te pegpebelaw-belaway dan, migpedapag si Jesus aw migdoma kandan.

¹⁶Pengkey kinità dan sikandin, meneng wedà dan kilala kandin.

¹⁷Peg-ipanaw dan, minikagi si Jesus, “Eden lay se egbelaw-belewayen niyo gina?” Simagked se didowa dan aw ontò nelidò se pedowan dan.

¹⁸Penga niyan, timaba se sebad si Cleopas, kagi din, “Tay law, elew. Nepela a, so pengkey gimemaw ka doton te Jerusalem, meneng wedà ka kedì ketaga-taga aw eden se neinang kidoen te menge aldaw seini.”

¹⁹Minikagi sikandin, “Eden lay se neinang kidoen?” Minikagi dan, “Doen telekeliwat te kagi te Timanem ngadan din si Jesus tege Nasarit. Insogò sikandin te Timanem, aw ontò mèpiya se ininang din aw inikagi din kinità te kedita te otaw.

²⁰Meneng se menge pengolo te simbahan aw menge obanen te Judiyo, impedakep dan sikandin te gobirno, aw penga niyan inimetayan dan sikandin inlansang diyà te kros.

²¹Tapay kay migpeliman te sikandin se megpelowà te menge bowad-bowad i Israel. Meneng inimetayan dan sikandin te netelowan pa.

²²Meneng pengkey nematay sikandin, nepela kay, so doen menge kedomaan day bayi limapos doton te lebeng din gina iselem,

²³meneng wedad lawa din kinità dan kidoen. Peg-olì dan, mig-indan dan diyà kenami te doen menge anghil migpekità diyà kandan, aw minikagi dan ekon heman te neantay den si Jesus lekat te nematay.

²⁴Doen menge doma day dimoton heman te lebeng din, aw kinità dan te benal se in-indan te menge bayi. Meneng wedà dan kitai si Jesus.”

²⁵Penga niyan, minikagi si Jesus, “Tay law. Nepela a kenyo, so wedà kaw pa pemenal te kedita te inikagi te menge telekeliwat te kagi te Timanem gebii.

²⁶Nepela a so wedà niyo ketegahi te eked lowan se Misiyas singed aw onà sikandin imetayan iling te neinang den seini.”

²⁷Penga niyan, miglebad-lebad si Jesus diyà kandan te kedita te insolat kidoen te kagi te Timanem tepad te pegkeotawun din, lekat te insolat i Moises aw kidoen te insolat te kedita te telekeliwat te kagi te Timanem gebii.

²⁸Pegkedapag dan doton te lonsod dinotonan te didowa tinoledaan sìyan, domeleg peden si Jesus.

²⁹Meneng ontò dan sikandin tinemengan, kagi dan, “Idegà ka den dini kenami, so ontò den meapon aw agpet den delem.” Penga niyan, timaking si Jesus kandan.

³⁰Peg-iyambong dan, inabat din se pan, aw migpesiontong sikandin diyà te Timanem, aw binelà-belà din, aw imbegay din diyà kandan.

³¹Penga niyan, kinilala den dan te sikandin si Jesus. Meneng pegketà, migkewedad sikandin kidoen.

³²Migpebelaw-belaway dan, “Yan kedì se doun te neantag se pedowan ta te peg-ikagi din diyà kenita kidoen te dalan, aw peglebad-lebad din te kagi te Timanem diyà kenita.”

³³Penga niyan, nesayo dan aw limikò dan doton te Jerusalem. Pegdateng dan doton, tapay netipon se sempolò tegusà tinoledaan i Jesus aw menge doma dan.

³⁴Minikagi se otaw tapay netipon, “Ontò benal neantay se Pengolo lekat te nematay, so migpekità sikandin diyà ki Simon.”

³⁵Penga niyan, mig-indan se didowa dan kaling dimateng tepad te neinang kandan kidoen te dalan, aw pegkilala dan kandin te pegbelà-belà din te pan.

³⁶Dalem pa te peg-indan dan te kinità dan, dimateng si Jesus timindeg kidoen te tengà-tengà dan. Minikagi sikandin, “Ibeg ko melinaw se pedowan niyo.”

³⁷Meneng nelemitan dan, so eden dan aw along din.

³⁸Minikagi si Jesus, “Ikà niyo egkebulung. Ikà niyo heman egdowa-dowa.

³⁹Tengtengi niyo se menge palì diyà te belad ko aw benis ko. Ontò siak. Pemaed kaw kanak amon ontò kaw metaga-taga te kenà a olò along. Wedad lawa te along, meneng seini kitaen niyo den te doen lawa ko.”

⁴⁰Penga niyan, impekità din kandan se belad din aw benis din.

⁴¹Neluba dan, meneng iling te wedà dan pemenal te ontò sikandin. So nepela dan pa, mig-insà si Jesus, “Doen lay kànen dini?”

⁴²Yan nemegay dan kandin te ikan sinognowan.

⁴³Kininawà din iyan aw kinaen din dalem te timengteng dan kandin.

⁴⁴Penga niyan, minikagi si Jesus, “Pegdoma ko kenyo kedengan te wedà a pa kematay, seini se inikagi ko diyà kenyo, te keilangan metoman se kedita te kagi insolat tepad kanak kidoen te punù ingkeliwat i Moises, aw insolat te menge telekeliwat te kagi te Timanem, aw kidoen heman te libro te Delangan.”