Luk 3:3-19

³Eme Jon edek ili bolo kon mari badu loboho gwa Jodan ili atiye sahou, ta tiye iri lau katubuni ndrine iri ta kandriyen ndra-in ma Kindrei kameh sikine iu.

⁴I buku none propet Aisaya mene ndratorowenei udu bolo tarou tan: “Ndramak ari aloh udu bolo kon lomale an i buku doh, ‘Kalowosa san ta Laban, ma kadik san kales lewan.

⁵Bolo sa-eu badeh, katurukiy kanyemes keme loke, ma hawe iri bwili ndrondro-ou hawe mandrei badeh, katiriy kanyemes keme andri, Ma san mwekele-eu badeh, kales le, Ma san totokon badeh, kanyemes le.

⁶Ya eme iri lau mari kanyolom ndramak ta seben ta Kindrei.’”

⁷Eme iri lau solo-an ame hawe Jon ta iy kinyu iri. Arile, iy tiye i tiri i buku doh, “Aha badeh, mwak ndra-in. Are lau tiye aha ta atobwak au a len ta losen ta Kindrei kameh eme?

⁸Ado kadeu nah ma ado kabatanau oro ta oro katubuni ndrine oro ta kandriyen ndra-in toro ki san ta tikisiy. Ya ado sabudon ado ma satiye ado sala buku doh: ‘Aso badeh tama aso Abraham, eme ya aso anya, aso mwasin.’ Arile bwe. Jo katiye tado kamwenen, Kindrei winiyan mesekei iri bek dah, winiyan asahan i nadu Abraham.

⁹Samen kamondrou ta Kindrei badeh, ndrala ndrado mwe-e kei, ya iri kei ala bato-ou sali iri bala mwasin bwe, idah kameh amundroh iri ala andri, ano ma akeh iri au ala bolo jih.”

¹⁰Eme iri lau ndremenya, “Ya ahi kameh ki buku sah handru bah?”

¹¹Eme Jon anya, “Ado lau heh, awin tado la-uh, ado kanyohan ari ki ta ndramak tan awin bwe. Ma are lau nan nyamon udu aliy, iy kanyohan ki na ndramak nan nyamon bwe.”

¹²Ano iri lau ta akohok luk ta takis ame anya kanyu iri ma iri ndremenya Jon, “Ndramak ta leheya, ahi ka buku sah handru bah?”

¹³Ya eme Jon anya, “Ado sakohok lakou sawek la-u lakou tado bwena ja!”

¹⁴Eme iri lau rayah ta bahun ndremenya iy ja, “Ya, aso ka buku sah bah?” Eme iy tiye i toro, “Ado kasekesek ta sihine ado le. Ya ado sawendreya ta satara luk ta ari ndramak, ma ado sandres ndramak laleyah ta sahou.”

¹⁵Eme ya mada iri lau asak, ma iri lomondra i bada Jon. Eme ya iri anya, “Iy sala Krais?”

¹⁶Eme Jon anya, “Jo alomwa ado na gwa, arile ndramak ari in hamon tek eme kameh, boto-on tan badeh, sakalawi boto-on tek ja. Jo badeh, mwasin handru bwe, ta talou malou ta molowa ku-i katin bwe. Arile, iy kameh inyu ado na boto-on ta Malawin Ndrabun ma aleben ado buku jih.

¹⁷Ma iy andrei lakou tan udu minen ta asorok bada kalom eme len lewa salin. Idah kameh iy atukum sali kalom ili asiu ta asumwe nyamon, ma idah kameh, iy asun iri bada kalom ili bolo jih ta winiyan bamak bwe.”

¹⁸San solo-an, Jon badeh atiye sahou mwasin ta aliu iri.

¹⁹Ya eme Jon asehek sahou boto-on i ta Herot, ndramak ta atondrok, tasah iy sudi udu nadu tinen Pilip Herodiyas i tan, hawe iy amekes kandriyen ndra-in solo-an labai.