3मिनु यूहन्ना यर्दन खोला आ नेक्था जाक्दीश्शा, एर ओंथ परमप्रभु यावे आ लोव़ शेंना शेंन गाक्माक्त। मिनु शेंना शेंन मुर आन कली “इन थुं परमप्रभु यावे गे लेश्शा, ब्वाक्कुम ख्रुम्शा ग्रुंइचा पुंइसीन। मिनु परमप्रभु यावेमी इन पाप क्याम्शा गेब” दे शेंदीमी बाक्त।
4साइ नेसी परमप्रभु यावे आ लोव़ पाइब यसैयामी “गोरशो रागीमी सेंदा का नेंसीब। मेकोमी मार देंब देंशा हना, प्रभु आ लां सेलीने। आ गाक्तीकेम फुल्लु ग्रोक्शा थेलीने। यसैया ४०:३-५
5बेंसी नेल्ल प्रिंचा पुंइसीनीम। डांडा नेल्ल दिंम सेल्चा पुंइसीनीम। हिरशो लां नेल्ले सोव़जो सेल्चा पुंइसीनीम। मरिम्शो लां नेल्ले रिम्शो सेल्चा पुंइसीनीम।
6मिनु मुर नेल्लेमी परमप्रभु यावेमी दोपा पाप रे प्रोंइबा मेको तुइक्नीम” दे ब्रेक्शो बाक्माक्त। यसैया ४०:३-५
7मिनु शुश मुर यूहन्ना आ बाक्तीकेमी ब्वाक्कुम ख्रुम्शा ग्रुंइपांइसीचा कली जाक्मा बाक्त। मिनु यूहन्नामी मेको आन कली “गे बुस्स आ खलकपुकी, परमप्रभु यावे आ सजाइ रे ब्रोंइचा ताइनीनी, दे सुम शेंदा?
8इन थुं परमप्रभु यावे गे लेश्शा, रिम्शो फल सिश्शो खोदेंशो गेय कोंइदीने। गे ‘इं किकी पिपी अब्राहाम बाक्ब’ दे मिम्शा, देश पा मबाक्कीन। मारदे हना गो इन कली ‘परमप्रभु यावेमी एको फुल्लु रे अब्राहाम आ चच युइ सेल्ने चाप्ब’ देंनुङ।
9तिम्चा, दे रवा आन पुंमी खा वोइश्शो बाक्ब। रिम्शो फल मसिप्ब रवा का का पा तिम्शा, मीम चोचा पुंइसीनीम, दे तुइक्तीन” दे माइक्मी बाक्त।
10मिनु मुरपुकीमी “मुल मार पक?” दे हिल्लो पामे बाक्त।
11मिनु यूहन्नामी “सु के फेक्तीक वा निक्शी बाक्मे, मेकोमी फेक्तीक का मबाक्शो कली गेचा माल्ब। सु के जचा थोव़क बाक्मे, मेकोमी जचा मताइब कली गेचा माल्ब” देंमाक्त।
12तिरो पोक्बपुकी यो जाक्शा यूहन्ना कली “शेंब, गो मार पक?” दे हिल्लो पामे बाक्त।
13मिनु मेकोमी “सरकारम ताक्चा देंशो क्येङा शुश मताक्चा” देंमाक्त।
14का निक्शी सिपाइपुकी यो जाक्शा “मिनु गो मार पक?” दे हिल्लो पामे बाक्त। मिनु मेको आन कली “सुइ आन कली हिंम हिंम पा जोल पा दोस गेशा आन मारेइ मारेइ मरोइक्तीन। इन गेय रे पा तशो क्येटम इन थुं नुशा बाक्कीन” दे माइक्मी बाक्त।
15मिनु यूहन्ना आ लोव़ नेंबपुकीमी “एको मुर सु माइ? ख्रीस्त कोर में?” दे शुश मिम्तमे बाक्त।
16यूहन्नामी मेको नेल्ल आन कली “गो इन कली ब्वाक्कुम ख्रुम्शा ग्रुंइनन्नी। आं नोले जाक्ब चहिं आं क्येङा ठेयब बाक्ब। गो मेको आ ङोंइती बाप्शा, आ जुत्ता प्रुइक्चा लायो मशिरनुङ। मेकोमी इन कली परमप्रभु यावे आ सोक्ती नु मीम ख्रुम्ब।
17लाङगाम हाम्शो चेरब हुरशा, भूस नु गेडा तिल्चा कली मेको आ गुइमी ग्योल बाक्ब। गेडा कोठोम कुर पा वोइक्ब। भूस चहिं गेनायो मकाप्ब मीम हुम्ब” दे माइक्मी बाक्त।
18मोदेंशो लोव़ पा अर्ती गेशा, रिम्शो लोव़ शेंदीमी बाक्त।
19मेकोमी सासन पाइब हेरोद आ लोक्ब आ मीश चाक्चा आ पर्बम दोस गेवा बाक्त। मोपतीके मेकोमी यूहन्ना कली जेल्खानमी चोक्पदा बाक्त। मत्ती १४:३-४; मर्कूस ६:१७-१८