Luk 3:3-19

³Nd mrokfo rifhur mithu nawohmottr, tfit rorn nd mrokfot yaknihato tek Jodenthu mkuyef mkuyeffhu kmi kmim yi habrimoarn, met yindarim kfo memourm, “Nikmoh fasoh fasoh nefm mong wahikahkomm, baftaiskfot. Baftaiskahtko, Bro Nkifrar yak thu-hirahrko nikmoh fasoh fasoh nefm.”

⁴Jonr mrokfom pthamoahat bingot profet Aisaiar pthamoa mrokfom kanjo inji pthamour. Aisaiar memour, “Wom yimar nungur tik furatn tohhato kfo mirahrko, ‘Bro Nungothetrhu niayuk yuhat wayak marnyak hanyhekomr.’

⁵Nd mi bunduha niyet tkitm Bro Nkifrar yak marnyarahrm. Nd muh wohneni hanyet kminysofm ror nhaf tou gifa marnya hanyrahrm. Nd tirngnha htani hanyet yihotam rorn touwak hanyruharn be yihotam yak teh marnyarahm. Tamoh tahi siket tkitm ror yak marnyarahrm. Yak marnyahato yihotam be wutham rhurahm.

⁶Ndhtet ndhtet tkitm yak marnya bomarnyahato ee nd yimaroh minrfa htiyakyukr Bro Nkifrar kfo tkruraforuhatrr, htiyakrah-komr.”

⁷Bok met yindarim Jonr baftaisafo hanyhato kfaf hany memourm, “Arom nandomrhu yon kunyso, Bro Nkifrar yimam yak tutfa thombat, finji yak hhrifniruhako?

⁸Nikmoh nefm, tohefm amfrfnah marnyakahtm riruh aruhyukm htiruhamn duka mirahm, ndm bi mong trohmomm fasoh fasoh nefm. Bi mar nukat tohwom. To mirahko, ‘Ka nom Abrahamrhu yon kunysn ka yak trohnirahrnom.’ Nhai. Ndt rot niko mirahko bro yima yuhum ahtanomt. Wawanyko. Na kfiwanko, Bro Nkifrar akfor, nda tahim yak krekutrfotrm, Abrahamrhu yonm rhurfom.

⁹Hudarim bi mispimn bi frhamsisetm korhm. Fitoh mim nhai hifa yukha hir marnyakahm, nd hudariye yohakhany yohakhany, kahrpatn dbuhaf hanyrahm.”

¹⁰Jonr inji kfomotrm, tfit romn ttiwon memomr, “Tone nome finji naruhanom?”

¹¹Kfo memorm, “Yimar hus hmbreshetre, wom that yakhato wom hmbresha duhatrn hekfot. Yo yimar yeshretr, be nd rpahtet neft nakfot.”

¹²Takis marum yakmoa yimam nhaf baftais yakneft niahato ttiwon memomr, “Nome finji naruhanom?”

¹³Kfo memorm, “Niko maruha yakneft mirahko wom maruham be tunmoh duka fijo ayak furanomm. Nd gafmanr kfo htayuk maruharpam yakkfot.”

¹⁴Yo wom soldiam nd baftaiskfot nia yak hanyukm nhaf ttiwon memomr, “Nome nhafne finji naruhanom?” Kfo memorm, “Mirahko yimam kfo yakrmehato marum ayak hanynomm, o yimam kotim furahato maruham ayak hanynomm. Tuko hingrnayuk maruharpam yakkfot.”

¹⁵Bok met yindarim rroh hbhakyuk yima Kraisr gari hasetmn, tfit Jonr inji kfomohat, to be rroh dukeft duka memom, “Ka asor nd nom gari hasiwa yimar.”

¹⁶Jonr memorm, “Na be nda bupa furaye baftaiswanko. Tor nanhu mong yuhat niewa yimarn, tor tu yimar. Na nhai ror kanjo bbukeft hatohkaha. Na, na be yima furaya rorhu senderfhu ki jbkafyuk mtinf kak nyusakahukanr. Rorn Bro Nkifrarhu Yafothati kahe baftaisimrahrko.

¹⁷Ror witthu hoftha kr nd ndroh thu krhayuk safort tirtn kakitohwort. Tu hifa witham yak nhafohruharm, turhu naku dany kunysn htarahrm. Nd hoftha kr tikmn tu yiha yiha nanyjar hatohet kahtn kandhi thurahrm.”

¹⁸Jonr mrokfom pthamohat nhai be nd mrokforpam kformor. Hifa hifa dborioh mrokfom kfo yingmarimorm.

¹⁹Jonr pthamo mrokfom rom hifa pthamorm tfit turn nd Judaroh gafmanr kutewumr Herotr, ror nahnamo fasoh fasoh nefmi yo najom tuhan Herodias yakmo yuhat, nd ndmpno Jonr kfo nyingo fnahmotrr, be wom Herotr namburhato Jonr yakhato kalabusn htamorr. Herotr nd Jonr kalabus htamo yuhatpno tot tu wom bro fasoh neft ror namot.