Ruk 3:3-19

³Imtiporhan oh susa Jodan but mong aptei aptei oh sus Kuuhan ihirnong Gure er hat sapti pe oh Got oh er yan naham gure boknong napripramur ma dahat pat yan oh it yansi na naham hanhan mar ha mandatinoha daham da tamburketinmuro. Da tamburkera kuuhan ihir Gin er danong kom asar mandaya ma hapat ha dahengwe rim tom wayonmuro pot ama pisasuh oh.

⁴Pot ma pisasuh oh rih Got ohe meng ritporhan propet Aisaia ohe brak matip mengru mat pisasuhmur. Ritporhan Aisaia ohe ma brak matip meng oh mamarumur. Irat timbas hanip timbas dusdapat han tit aprisa We. Hanipyah ohe aprin mandap oh duutinwi mar amanhem amamen matinmuro.

⁵Ma amamen matipri oh tom but mong ma gonsi pat mong oh mongsi teip matiprimuro. Teip mara yei monghe gatong pora tap kat tit tanwi matiprimuro. Mandaphe tathosi mandap oh duutin mandapwi matiprimuro. Runo wano mandaphe tap kat yahnap tan titwi matiprimuro.

⁶Imtiperhan kuuhan gonsi ihir Got ohe namburpat da oh wamar am hatiprimuro por uarpatmur. ritporhan Aisaia oh brak matipmur.

⁷Amaru hat orhor Jon oh Aisaia ohe ma brak matipru hat patin kuuhan kat gon ruumsan ihir ohe patnong ama apdapa oh. Apriperhan Jon oh Gur ina teimdapat yah hat pati hatin hat pati orhora; damdapat inapawam bap hatin hat pati han bap gurmuro. Gurnong nih Gur tomwi wayahanoh gure er hat saperhan Got oh heisup naham er yan napinmat kakduup mamen mat ma nat pat oh dat namdatiprohmur nih naporit gur tomwi wapero daham apripti.

⁸Gur tomwi wapero daham apripti gur guragure er hat sapti da oh mandatperhan ihir wanaham Ire er hat saptingweri da oh gin mandata ma hapat. Gin yah hatwi sapti ma hapat dahatin da oh ihirnong pinggit pisaptidapat apris tom wayonmur. Gur Nuhur Epraham ohe puh nuhur ohoh ihan Got oh batbet yan oh na napriprawa ma dahapti da oh dahapri. Gur Nuhurwi Epraham ohe puh ohoh ihan er dasi hat patin orhor nambutiprawa dahapri. Basra. Wan kweinong mohhe Got oh Epraham ohe puh matin hatinmur.

⁹Gin orhor Got oh sen marima irat gwe moh dam na timahanoh kakersi gatmar mandatinmat mamen tahat patmur. Ihat mamen tahat pat ohoh ihan yah hat son ohe da oh dam na timahan ama dam na tima han gurnong irat ohe tan sen ohsi kakersi gat nahama irat teinong nahatipramuro ama giporisuh oh.

¹⁰Giporpatin ihir Ihan nuhur yah hat indinmat kinhatper por ama dahamtipa oh.

¹¹Por dahamtiperhan oh Gur watah yot hat patihanoh tit watah timbas hat ma pati han ihirnong aprishenmur. Denhe timbas hat pati han ihirnong ti aprishenmur ama potip oh.

¹²Potporhan takis yan ma daripti han ihirhe aprisa Jon ohnong Tisa. Nuhur yah hat indinmat oh kinhatper por ama dahamtipa oh.

¹³Por dahamtiperhan Jon oh Gur gapman ohe takis yan ma daripti oh iraire ma naporiya kis orhorwi darinmur. Titsi napin por wan ohsi adaripri ama potip oh.

¹⁴Potporhan Rom ire dupsi han bap ami ihirhe aprisa Gin nuhuroh yah hat indinmat oh kinhatiprohe por ama dahamtipa oh. Por dahamtiperhan oh Gur ire mani adatinmathe guragure kasip haya ohe pe oh net por adaripri. Tit oh ire mani oh adatinmat Noh gonong Oh ihat er hat patgwer hanmur potiprohmur pora dasuh kas meng por ire mani oh behe adaripri. Guragure tamreim mani ma dariptihe Titsi napriyaneng dahapri. Guragure kis ma napriya oh Yahwa dahat patenmur ama potip oh.

¹⁵Jon oh ama ihtin meng oh kuuhan ihirnong porpatin ihir amrama Gin Got oh ihirnong amburin han tit adarhetipramur rim ma kis matip han Krais oh gin aprin kakduup hah ma hapat ama dahatpa oh. Dahat pati tei ohoh ihan Mama han moh Krais orhorda da Krais oh kom apripra ihat daham ama apetpa oh.

¹⁶Ihat daham apetperhan Jon oh Es. Noh oh basmur. Noh tomwi napatirpatmur. Kasipnap han oh kom apripramur. Ma apripra han oh kasip isipsi han oh apripramur. Nohe kasip oh ohe kasip hrepdapat hat patepramur. Oh kasip yahnapsi han ohoh ihan noh bisei han hatin hat pat ohoh ihan noh orhe tongap nangnong noh na arpitin inasi hat patmur. Ihtin kasipnap han tit aprisa gurnong Got ohe Yahsup ohsi; gure danong nahirmatin ohe irat has hatin ohsi nohe tom ma napatirpatru nahat gure mutuhnong namtipramur.

¹⁷Ohe ma apripra oh wit gwe pomtin ohe sapor ohsi marim apripramur. Aprisa ama sapor ohsi aim orhe dam orhe matinmat saksak matipramur. Saksak mara wit dam oh orhe saripti apnong matipramura; aim oh ruprup mara hirmar irat teinong matipramur. Irat teinong ma matipra irat oh na tikimapat irat teinong matipramur ama potip oh.

¹⁸Jon oh amaru mat orhor kuuhan ihirnong Got ohe yah meng oh sawa mengtei ama porisuh oh.

¹⁹Jon oh sawa meng imat porpatdapat gahan Gariri mong ohe gapman hat pat han Herot ohnong Go arwan ohe inap Herodias uhnong adaro gorhe ti er da ti er da hat uso ma ihat sapat oh go er hat sapat hanmuro ama potip oh.