San Lucas 3:3-19

³Juan evocoiyase oso opacatu ɨai Jordán ɨvɨi oico, supi aipo ehi ava upe: “Pemboasɨ pe angaipa, peyevɨ Tũpa upe, ahese opoãpiramora Tũpa pẽu ñero ãgua pe angaipa rese” ehi.

⁴Co yavɨye ité Tũpa ñehe mombehusar Isaías rembicuachiagüer pɨpendar aipo ehi vahe: “Sendusa ɨvɨ iporupɨrẽhɨsave ava sapucaisa aipo ehi vahe: ‘Pemoingatu yande Yar raperã, pemohɨvi tuprɨ avei’ ehi.

⁵‘Evocoiyase opacatu ɨvɨsocuer opara imboapɨposa chupe, opacatu ɨvɨtrɨ ɨvate vahe iyavei ɨvɨtrɨ mini opara imboyoyasa tuprɨ no. Acoi perɨ ipãri vahe, ahe imohɨvisapara; perɨ ipɨcucu atɨ vahe opara imboapɨposa tuprɨ chupe.

⁶Iyavei opacatu ava osendura ñehesa pɨ̃sɨrosa resendar Tũpa remimbou yuvɨreco cute’ ehi vahe” ehi.

⁷Ava rehɨi yuvɨnosepa chupe ‘tayande ãpiramo’ oyapave yuvɨreco viña. Ahe rumo aipo ehi: “¡Pe mboi mboetasa tẽi peico! ¿Ava vo, ‘Pesẽra Tũpa ñemoɨrosa ou vaherã sui’ ehi tuprɨ tẽi pẽu?

⁸Yɨpɨndar toyecua tuprɨ rane yande Yar upe peyevɨsa pe angaipa mboasɨsa pɨpe. Iyavei ndapeyeroyai chira ‘ore Abraham suindar oroico’ pe hesa rese tẽi peñepɨsɨro ãgua. Esepia, Tũpa oicatuño ité co ita sui Abraham suindar nungar tuprɨ apo ãgua oyeupe nara yepi.

⁹Hacha niha imoingatusa voi eté opacatu ɨvɨra iha naporai vahe sapo rupi yasɨa ãgua yepi. Yasɨaprɨ evocoiyase imondosapara tatave” ehi.

¹⁰—¿Mbahe pĩha evocoiyase oroyapora ore recocuer recuñaro ãgua oroico? —ehi ava rehɨi oporandu yuvɨreco chupe.

¹¹—Pe pereco vahe ñuvɨrío pe camisa, ñepei pemondo ava ndovɨrecoi vahe upe; iyavei pe pereco vahe tembihu, pemboyahomi tẽi ambuae ava ndovɨrecoi vahe upe —ehi imboyevɨ ava upe.

¹²Yugüeru avei movɨro ava sui guarepochi rerocuasar ‘tayande ãpiramo’ oyapave yuvɨreco. Ipare oporandu Juan upe mbahe rese yuvɨreco: —Porombohesar, ¿mbahe vo ore oroyapora Tũpa rupi ore guata ãgua oroico? —ehi yuvɨreco chupe.

¹³Evocoiyase aipo ehi ahe ava yuvɨrecoi vahe upe: —Aní perocua catu iri guarepochi pẽu imombehusa sui —ehi.

¹⁴Iyavei amove sundao oporandu mbahe rese yuvɨreco chupe: —Ore no, ¿mbahe vo ore oroyapora? —ehi. —Ndaperocuai chietera que mbahe ambuae ava sui, ndapeñehe-ñehe tẽi chira ava upe sembiapoẽhɨ rese, iyavei peyembovɨhañora pe poravɨquɨ reprɨ rese —ehi sundao upe.

¹⁵Ava rumo, “¿Ndahei pĩha co Poropɨ̃sɨrosar sãrombrɨ secoi?” ehi tẽi Juan upe yuvɨreco.

¹⁶Juan rumo aipo ehi opacatu ava upe: “Che opoãpiramo ɨ pɨpe tẽi; oura rumo ambuae che raquɨcuei, ahe pe ãpiramora Espíritu Santo tata nungar pɨpe. Ahe seco pĩrata catu vahe secoi che sui. Sese cheu ndiyai eté ahe ipɨtaquisã yora ãgua ichui” ehi.

¹⁷“Ahe güeru trigo mbovevesa ihɨgüer sui ipeha ãgua. Sãhɨi evocoiyase yapocatusa, ihɨgüer rumo imondosa tata apɨrẽhɨ vahesave” ehi ava upe.

¹⁸Omombehu-mbehu vɨte ñehesa avɨye vahe ava upe ‘toyemonguerẽhɨ güecocuer recuñaro ãgua yuvɨreco’ oya.

¹⁹Ipare rumo Juan oñehe pĩrata mborerecuar Herodes upe secocuerai rese. Esepia, vɨvrɨ Felipe rembireco Herodías rese secoi, iyavei setá ambuae mbahe naporai vahe sembiapo.