ሉቃሴ 3:3-19

³ዬያሮ ዮሓኒሴ ዮርዳኖሴ ዎሮ ኮይሎ''ይዳ ዓኣ ዓጮ'' ቢያ ሃንቲ ሃንቲ፦ «ፆኦሲ ዒንሢም ዓቶም ጋዓንዳጉዲ ጎሞ ቡኡፂ ቡኡፂ ዋኣፆና ማስቱዋቴ» ጌዒ ጌዒ ዔርዛኔ።

⁴ዬይ ያዺ ማዔሢ ፆኦሲ ማሊፆ ኬኤዛ ዒሲያሴ ዮሓኒሴ ዛሎ'' ቤርታዺ፦ «ሃይ ዓሲ ናንጉዋ ዳውሎ''ይዳ ሂዚ ጌዒ ጌዒ ዒላታ ዓሲኮ ዑኡሲኬ፤ ‹ጎዳኮ ጎይፆ ጊኢጊሹዋቴ፤ ሉኡጎ ጎይፆዋ ፒዚሱዋቴ፤

⁵ዶኦጫዻ ቤዛ ቢያ ኩሞንጎ፤ ዹኮ''ና ጌሜሮና ቢያ ሂርኪ ጎዖንጎ፤ ዎቦ ጎይፃኣ ፒኮንጎ፤ ጊኢጊ ኮሺ''ንቲባኣ ጎይፃኣ ጊኢጎንጎ፤

⁶ዓሲ ቢያ ፆኦሲኮ ዻቂሻ ዎልቆ ዛጎንጎ!› » ሂዚ ጌዒ ፃኣፒንቴ ጎይፆናኬ።

⁷ዋኣፆና ማስቶሮ ዒዛ ኮይላ'' ሙካ ዓሶም ዮሓኒሴ፦ «ዒንሢ ሓይ ሾኦዣ! ሙካንዳ ፆኦዛሢኮ ጎሪ''ንቶይዳፓ ቶላ''ኒ ዒንሢ ዳንዳዓንዳጉዲ ዖኦኒ ዒንሢም ኬኤዜይ?

⁸ዓካሪ ሃሢ ጎሞ ዒንሢኮ ቡኡፂፆ ዔርዛ ማዾ ማዻንዳኣፓዓቴም ‹ኑኡኒ ዓብራሃሜ ናኣቶ''ኬ› ጌዒ ዒንሢ ዒኖና ሄርሺንቲፖቴ። ፆኦሲ ሃያ ሹጫፓ ዓብራሃሜ ናይ ማሂ ዔቂሳኒ ዳንዳዓያ ማዔሢ ታ ዒንሢም ኬኤዛኔ።

⁹ሃሢ ሚፆ ፃጳፓ ቲቂ ኬኤራኒ ሄርጋ ጊኢጊንቴሢሮ ቃራ ዓኣፒ ዓኣፑዋ ሚሢ ቢያ ቲቂንቲ ታሚዳ ኬኤሪንታንዳኔ» ጌዔኔ።

¹⁰ዴራ'' ማሃዖ፦ «ሂዴቶ ኑ ዓይጎ ማዾንዶይ?» ጌይ ዮሓኒሴ ኮራ ዖኦጬኔ።

¹¹ዒዚያ፦ «ላምዖ ማኣዓ ዓኣሢ ፔቴ''ማ ባኣሢም ዒንጎንጎ፤ ሙኡዚ'' ዓኣሢያ ባኣሢም ጊሽኮንጎ» ጌዔኔ።

¹²ኮርሞ ኮርማ ዓሶይዳፓ ሚኢሾ ቡኩሲ ማዻዞንሢያ ማስቲፆሮ ዒዛ ኮይላ'' ሙካዖ፦ «ዔርዛሢዮ! ኑኡኒሾ፥ ዓይጎ ማዾንዶይ?» ጌይ ዒዛ ዖኦጬኔ።

¹³ዒዚያ፦ «ዎጎና ዓይሢንቴሢፓ ዑሣ ዓኣሢ ዔካኒ ዖኦጪፖቴ» ጌዔኔ።

¹⁴ሃሣ ፖኦሊሳ ሙካዖ፦ «ኑኡኒሾ፥ ዓይጎ ማዾንዶይ?» ጌዔኔ። ዒዚ፦ «ዓሲ ሚኢሼ ጌኔና ቡሪ ዔኪፖቴ፤ ዖና ማዔቶዋ ሉኡቂ ዎጌና ዓይሢሲፖቴ፤ ዒንሢ ማዼሢ ዛሎ'' ዒንጎ ሚኢሻ ዒንሢም ጊዶንጎ» ጌዔኔ።

¹⁵ዒማ''ና ዴራ'' ቢያ ሜሲሔኮ ሙኪፆ ዎዛና ካፓያታሢሮ ዮሓኒሴ፦ «ሃይ ዓሢ ጎዖንቴ ሜሲሔ ማዓንዳሞ?» ጌዒ ጌዒ ዒኖና ማሌኔ።

¹⁶ዮሓኒሴ ጋዓንቴ ዔያቶም፦ «ታኣኒ ዒንሢ ዋኣሢና ማስካኔ፤ ጋዓንቴ ሜሌ'' ታጊዳፓ ባሼ ሙካንዳኔ፤ ታኣኒ ዒዛኮ ዱርዞ ቱኮ'' ሱዞታዖ ቡላ''ኒ ኮይሳያቱዋሴ፤ ዬይ ዒንሢ ዓያና ጌኤሺና ሃሣ ታሚና ማስካንዳኔ።

¹⁷ዒዚ ቆይዳይዳ ዓኣ ሃኣኮ ሶኦራኒ ሶኦሮ ዓንዶ ኩጫ ዓርቄሢሮ ሶኦሪ ጌኤሼሢኮ ጊንፃ ኮዦ ዓኣፖ ኮናይዳ ዋሂ፥ ዲኢሮ ጋዓንቴ ባይቁዋ ታሚና ሚቻንዳኔ» ጌዔኔ።

¹⁸ዬያጉዲ ሃሣ ዮሓኒሴ ዱማ ዱማ ጎይሢና ዴሮ'' ዞሪ ኮዦ ሃይሶ ዔያቶም ኬኤዜኔ።

¹⁹ጌሊላ ዓጮ'' ዎይሣ ሄሮዲሴ ጋዓንቴ ጌርሲ ፒልጶሴኮ ማቾ ሄሮዲያዳ ዔኬሢሮና ሜሌ'' ሚርጌ ፑርታ ባኣዚ'' ማዼሢሮ ዒዛ ዒ ጎሬኔ።