San Lucas 3:3-19

³Junni Juanni Jordán pi quelole jato, tsachilaca micarinaminue. Jutsa quinunca telaquepoto, casan tala tenca mancato mumunhilaide! tinaminue yape Diosi nulachi jutsaca piyarisa.

⁴Matu mate Diosichi Pila chutemin Isaíaca Diosi itsanque pila chutesa carinue: Tsachi manca niyanlanantiya chutunun postote sonba pato, tsachilaca itsanque payichunaeque chuteca jominue. Miya jano jonun tenchi jera manseilainade! tichunaeque chuteca jominue. Miya jano jonun tenchi minuca mansenun cuwenta, jun tsanquenan nulachi tenca manseilainade! tichunae.

⁵Jerale delesaca, jera duca, parejo suwan, minu enconca mantuquin, minubi coso jominca mansequin, quinun cuwenta, aman jun tsanquenan tsachilachi tenca manseilaichunae tichunae tinue.

⁶Junsi jeralela Diosichi mantate se lariminca quiralaquichunae tichunae tinue. Aman Diosichi Pilabi tsanque chuteca jominue Juan tsanque micarino jochunaeque.

⁷Junni Juan mumunnasanan, duque tsachila yabe mumunhibi jalainue. Junni yari weyanlaca quirato itsantinue: —Nulari seiton pini cuwenta jolajoe. Diosi tsachilaca paito casticaquinasa, ¿nulari niyaito se loanaeque tenca calaquinayun? tinue.

⁸Junni nulachi mumunhino muquilaquinari, casale nulachi jutsaca jera telaquepolaquede! Junsi seque nenalarana! yape nulachi jutsaca tsa telaquepocala joeque quereintsan josa. Junni nulari matu to Abrahanchi alicalayoe; junto Diosichi tsachilayoeque tenca calaquituna! tinue. Diosi nulaca jera telaquepoto, in sucatiya Abrahanchi alica suwano podeichunae tinue.

⁹Tsachila chide pele cuwenta jolajochunae tinue. Junni toleno ma faca joe. Junni sen puca itumin peleri tolaito, ninbi queereichunae tinue.

¹⁰Junni Juan tsantinasa, tsachilari ¿Ti quino jolajowan? tilatinue.

¹¹Juan yala tsantinaminlaca meráto, itsantinue: —Aman paluqui camisa tatori, manquica itonlachi cuwantsan joe tinue. Ano tanlanan itonlachi cuwantsan joe tinue.

¹²Weyanlari inpuesto calaca camin jominlanue. Junni yalanan mumunhibi pejalaito itsanlatinue: —Chiquilacanan micaride! ¿Niyan jonola jowan? latinue.

¹³Junni Juan yalaca itsantinue: —Nisi cala casa tica jonari, tsansiri calaquina! Fécari catulajona! tinue.

¹⁴Soldadolanan ti quino jonunca panhalaquinue. Yalabe itsantinue: —Tarinlaquituna! Sonbaito, nin encanato tarinlaquituna! tinue. Nulachi nisi pacara quica jun calaca cato, son jolajona! tinue.

¹⁵Juan tsanque micarinasa, tsachila wepanato meralaraminue. ¿Ya Diosi ereca jun Cristo tinun tsachi jonhoncan? tito méraminlanue.

¹⁶Junni tsanque tenca calaquinasa, Juanni jeralelabe itsantinue: —Te, ya itoyoe tinue. Lari pibiri mumunnayoe tinue. Aman laca benechi manca tsachi jachunae. Yari laca fécari mantá tan jochunae. Yari tsaracari sen jonan, lari yachi sapato silica woleto cuwanotiya sen itoyoe tinue seri sen jotonan. Yari pibiri mumuntumin jochunae; yari Diosichi Tencachi mumunmin jochunae ninchi casinun cuwenta.

¹⁷Junni tsachilari trico ni petse pun cuwenta jolajochunae tinue. Junni ya sen tsachi trico petse cuwenta jominlaca jera larito quepochunae. Numa pepe cato rae petse larichun. Junto sen trico nica dunun yaca tanjito sechunae tinue. Petsecari jeraitumin ninbi quepochunae tinue.

¹⁸Aman junto Juan tsachilaca duque payito, sen fiquica micarinaminue.

¹⁹Junsi miya Heródecanan payinue. Acochi sonaca josoletuntsan joe tica jominue. Junsi jerale uyan quiraque seiton quinun tenchinan yaca seitoe tito payinue.