Lúkas 3:3-19

³Ig timapni henne, ig tipik. Ig ekkene giwsapan Uhokri muwwapu aranwa warik Jordawh. Ig awna ta gitkis hiyeg: ―Wagesnabay yihiyakemni ariw yitaraksan. Kewpinabay ta ahakwat un adahan yis amepene ini ku Uhokri bayahminay ariw yitaraksan. Hennewatbaki ig amekene João Batista awna.

⁴Minikwak Uhokri gawnepe amekene Isaías ig kinetihwa gimin ig amekene João Batista. Ig tamak inakni giwn amadga kagta. Ig awna: “Pahapwi kinetihwanek ta gitkis hiyeg amadga amatap. Ig awnanek: ‘Ahegbetawnabay gapit Ukiparawiy gaytni. Ig nemnik ig. Wadithanabay yihiyakemni gidahan kahadbekam yis kawih gidahan Uhokri gikumadukan.

⁵Yihiyakemni kewa pahatra ahinbe mbeyepyebe. Ka ik adahan ig Ukiparawiy sibuhaprik atere. Kipuhaprikanabay ini ku kiney duwihaprikapniye. Kiguknabay ku kiney ini imuhgipitapnipye. Waditaprikanabay ini ku kiney kiduwapriknene. Ahegapanabay ini ku kiney duwibdamnipye.

⁶Ayge nikwe madikte hiyeg hiyaknek ku samah Uhokri amnih hiyeg.’ ” Hennewatbaki ig Uhokri gawnepe awna minikwak.

⁷Kaayhsima hiyeg ayta kaywasewpiye ta git amekene João Batista. Igme awna ta gitkis: ―Yis kaybunyune hiyeg pahaywitniyepwi. Uhokri ka batek akak yihiyakemni kane kibeynema. Mmah yitneki yikewpen keh ig hiyapyi ke wotbe yis kibeynepwibe hiyeg giwtrik?

⁸Kawa. Ini yikewpen ka kinisri. Amawka ku yis inyerwa wages yihiyakemni ariw yitaraksan. Kapusanabay wew wadit. Ini yiwewni waditye ininewa arekhetni ku yis inyerwa wages yihiyakemni. Hawwata akiw, ka yi muwaka awna: “Wixwiy hiyeg judeyenepwi wixwiy amekene Abrawh gihiwhipwi. Amun ini wixwiy kuwis Uhokri gihiyegapu. Ayge nikwe ig Uhokri ka aminama ariw utaraksanwiy. Ig hiyapwiy kewa kibeynepwibe giwtrik.” Ka ik adahan yis awna inakni henne. In ka ariknawnama ku wixwiy amekene Abrawh gihiwhipwi. Ka innema keh wixwiy isamtaw. Ik adahan Uhokri keh no tip humaw amekene Abrawh gihiwhipwi.

⁹Ahawkanaprik kabá danuh adahan Uhokri ipuke hiyeg patahwapye hampa arimkanit biyukwiki. Pahapwi ku pariye kane wew wadit amadga hawkri iggi kewa pahakti amutribe ku pariye sarayh guw kane kabaynopwima. Igme Uhokri ig kewa pahapwi awaygbe ku pariye kuwis ahegbet akak gimegwan adahan ahukepten eggu ah kane kabaynoma. Ku pariye gamutra ka sarayh guw kabayno guw, eggu ig ihukapepru ig padakapepru ariwtrikut tiket bukahapepru.

¹⁰Igkis hiyeg timapni henne, igkis awna git: ―Mmahpa usuh keh adahan usuh wew wadit?

¹¹Igme kaytwa giwnkis: ―Amnihaknay pawtak. Ku pahapwi yaytak kasimsa pikana akebyi, amawka ku ig ikí pahak ta git pahapwi ku pariye yumanene gisimsa. Ku pahapwi yaytak kamana, amawka ku ig ikí git pahapwi ku pariye yumanene gimana. Hennewatbaki ig amekene João Batista awna.

¹²Ayteke awaykemni ladwan danuh atere adahan igkis kaywasewpiyes ta git amekene João Batista. Igkis awna git: ―Kiyapwiye, mmah usuh keh?

¹³Igme kaytwa giwnkis: ―Ka ba yi kinis hiyeg akiw. Ka yi muwaka ayá karukri mpiyepepyema mpiya ku pariye gupelma ayá adahanma yis msekwe akak asemne.

¹⁴Hawwata akiw suwtat danuh atere git amekene João Batista. Igkis awna git: ―Ya usuh, mmah usuh keh? Igme kaytwa giwnkis: ―Ka ba yi mpiksaptih hiyeg ikí karukri yit. Hawwata akiw ka ba yi ayá yitiwni git pahapwi adahan yis ka kamiyig ta git yikipara. Yis kuwis katiwnihka gapit yikipara. Ikeypi. Ka yi muwaka aharit akiw.

¹⁵Madikte hiyeg ayge igkis wahepnenekwa gaytni Cristo ig Uhokri gikanyan adahan ukumaduketniwiy. Igkis kapusa pukuhepwe gibohri amekene João Batista ku nawenétke ignewa ku pariye Cristo.

¹⁶Ig amekene João Batista hiyapni henne, ig awna gitkis: ―Ku aysaw nah kaywepyi, nah kawihkis un ta yipitit. Henneme pahapwi nemnikumpiye nuhapuh butte ku pariye kaywepyi akak igyerwa Uhokri Gitip adahan ig kawihkis gidahanwa gihiyakemni akak gannu ta yipitit Yaytakme ig kawihkis tiket ta yipititnek. Ig ner kaayhsima pi kiyatte mpiyhan. Nah yuma nukiythanisima gitiput adahan nah ayapig wiwh gikasotni gikugkuptak.

¹⁷Aysawnemenek ig ibekhe hiyegnek hawwata ku samah wis ibekhe amutri ayak akak amar. Ig ahegbet ibekhepye hiyeg kuwis ke pahapwibe awayg akak pahak huw ay giwaku ig ahegbet adahan ig mihikobetene amutri ayak ariw amar. Ig ibakhanek ku pariye kibeynepwi hiyeg akak ku pariye kane kibeynepwima hiyeg. Hawwata akiw, ku samah wis bayah amutri ayak agiku payt, amarme wis bukehpig, hawwata ner nemnikumpiye ig bayah hiyeg ku pariye kibeynepwi agiku gipin. Nerrasme ku pariye kane kibeynepwima, igkis bukehpikanek ariwtrik eggu tiket ku pariye kane awakti.

¹⁸Hennewatbaki ig amekene João Batista awna. Ig ikenenekwa hiyeg gihiyakemnikis akak inakni yuwit akak kaayhsima yuwit akiw ku samah ig ayge ekkene Uhokri ginetni gitkis.

¹⁹Hawwata akiw ig awna gimin amekene Erodis apatra ku samah igme powkemnihwe gukak giwgun amakano Erodíyas, ig keh kaayhsima mbayka akiw.