SAN LUCAS 3:3-19

³Nɛ nubʉya, bi dʉmp' rá 'bɛfi ra Xuua Nxixyą, bin 'yo bʉ n'danguadi ra dąthe Jordán nɛ bi xih yʉ ją'i di päh yʉ́n 'yomfɛ̨ni nangue yʉ́ ts'oqui, n'dahma da mba ma punbi. Nɛ bi xifi din xixyą bʉya.

⁴Nɛ guehna ra Xuua bi man'a ra Isaías 'bʉ mi 'yɛ̨na: N'da ra ją'i din yą bʉ ja ra dąpo nɛ da 'yɛ̨na: “Dami päh nin 'yomfɛ̨nihʉ, ga simhbʉ ra Hmu mi ts'ʉtho da zøcua. Dami hoc ni mbʉihʉ, ga tømhbʉ xʉn ho.

⁵Tengu yʉ mbothäi nɛ yʉ t'øhø din juąni tengu n'da ra 'yu i pa ma hoqui, hingui ndaxni, i uɛ̨ntho, din ja bʉ ni mbʉihʉ.

⁶Nɛ gätho yʉ ją'i da nu'a ram pørpate ba pɛnd Oją,” da 'yɛ̨na, bi 'yɛ̨n'a ra Isaías.

⁷Nɛ bi zøm bʉ yʉ ją'i bʉ 'bʉh ra Xuua ngue in nde din xixyą ʉ. Nɛ nu ra Xuua bi 'yɛ̨mp'ʉ: ―Nu'ahʉ tengu thoho 'bʉ gyʉ́ pozʉhʉ, nɛ guí ɛ̨nsɛhʉ hin guin nuhʉ rá muui ni ts'oquihʉ 'bʉ gan xixyąhʉ, nɛ hin gui hoc ni mbʉihʉ.

⁸Pɛ nte di muui 'bʉ guí ɛ̨mhbʉ gán yąmhbʉ ngue ya nim bombøtahʉ ra Abraham. Pɛ nɛhya yʉ do i 'bongua mi sä xtá 'yɛ̨na yʉ́ t'ʉhni ra Abraham gue'bʉ gue'a xtán nde Oją a.

⁹Nɛ nu'a to'o gätho him bi päh yʉ́n 'yomfɛ̨ni nangue yʉ́ ts'oqui, tengu'bʉ yʉ za ngue hingui ho yʉ́n dät'o. Nɛ nu rán ts'onza Oją ya mahoqui xʉn ho ngue da 'yɛx'ʉ yʉ za hingui ho yʉ́n dät'o, nɛ da thøspʉ ja ra sibi din zø, bi 'yɛ̨n a ra Xuua.

¹⁰Nu yʉ ją'i bʉya, bi 'yɛ̨n'ʉ: ―'Bɛ'a sä ga øt'ähe 'bʉ, bi 'yɛ̨mp'a ra Xuua.

¹¹Nu ra Xuua bi dąti: ―Nu'a to'o i ja yoho yʉ́ pahni, di un'na n'da to'o hin'yʉ rá pahni. Nɛ nu'a to'o i ja 'bɛ'a da zi, di unni ts'ʉ a to'o hin'yʉ da zi, bi 'yɛ̨na.

¹²Nɛ'ʉ 'da yʉ hyącahäi xí zøm bʉ ngue in nde da mba ma xixyąbi, bi 'yän'dʉ: ―Xänbate i, 'bɛ'a sä ga øt'ähe.

¹³Nu ra Xuua bi dąti: ―'Yo guí huspahʉ man'da ra renta, pɛ hønt'a i man rán t'ɛ̨di ra häi gui hyąjʉ.

¹⁴Nɛ'ʉ 'da yʉ dofʉi bi 'yänni: ―Nɛcähe, 'bɛ'a sä ga øt'ähe, bi 'yɛ̨n'ʉ. Nu ra Xuua bi dąti: ―O guí hącuahʉ ra mbɛti yʉ ją'i nangue ni ts'ɛdizɛhɛhʉ. Nɛ o gadí yąfʉ n'da ra ją'i 'bʉ guí pąhmbʉ him majuąni a guí mamhbʉ. Nɛ hin guim bɛ̨mhbʉ ngue man'da ɛ̨mmɛ xʉn ngu gui tąhmbʉ, pɛ hønt'a nin zäbi gui tąhmbʉ, bi 'yɛ̨n'a ra Xuua.

¹⁵Nɛ xʉn ngu ʉ ngue mi tø'ma ra Cristo mim bɛ̨nsɛ ʉ ngue ɛ̨mbi ra Cristo a ra Xuua.

¹⁶Pɛ nu'a ra Xuua bi 'yɛ̨mp'ʉ: ―Nugä dí xixyą ahʉ ngue ra dehe thoho, pɛ ba ɛ̨'a n'da ja rá ts'ɛdi xinda guecä, hin dí sʉcä tengu a. Nu'a di hoc'ahʉ nangue rá Hogandąhi Oją tengu'bʉ xtí hoc'ahʉ ra sibi.

¹⁷Nɛ da huahn'dʉ yʉ ją'i tengu 'bʉ i pa nt'ɛi yʉ trigo. Nu rá xi di 'uec ran dąhi, nɛ nu yʉ trigo da mba m'bɛ'ts'i, pɛ nu yʉ́ xi da t'upʉ ja ra sibi njąm'bʉ i huɛ̨t'i, in jabʉ da 'yøt' 'bʉ bi huahn yʉ ją'i a ra Cristo, bi 'yɛ̨n a ra Xuua.

¹⁸Nɛ xʉn ngu mi'da yʉm hma bi xi ʉ yʉ ją'i nangue ran ho ma'da'yo.

¹⁹Pɛ nu ra Xuua bi dąmhyą ra ts'ʉt'abi Herodes nguetho nu ra Herodes bi zin'a rá 'bɛpozɛhɛ, ngue rá xisu ra Felipe, í Herodías a ra xisu. Nɛ hinga hønt'a pɛ xʉn ngu mi'da yʉn ts'o bi 'yøt'a, janangue bi dąmhyą.