SAN LUCAS 3:3-19

³Ex chuncha ni Juan tapasaꞌol talakachux taꞌan ukstsꞌuniy ni xalaꞌaxkan Jordán. Va jaxaqalal ni lapanakni para kataꞌaqchajꞌaul va chuncha katasul ni tapaxalcha ixjatapastakꞌatkꞌan, ex ni Dios kalaqmalaqmixinil ixtalaqalhinkꞌan.

⁴Yu ixmakay ni Juan va tacha yu istsꞌoqta ni Isaías yu ixlaqputeꞌey ixchivinti Dios la maqancha, va naul: Qayntaun tꞌasay ni lakakꞌavin, va najun: “Kalaꞌoximanitꞌikcha ixlakatin ni Jalhachimoꞌonuꞌ. Vas kꞌamakꞌatꞌikcha para tsꞌalti katapasal.”

⁵Tachun yu lakpuꞌuyan kalaqtsamaꞌokal. Tachun yu aspajunuxnan kalakpujkal. Taꞌan jalkꞌavil, va kalasavalakal, taꞌan lakapulkalau, va lakaputaun kaval.

⁶Va chuncha katatapaxalcha ixjatsukuntikꞌan tachun ni lapanakni. Katalaqtsꞌinaꞌ ni Dios tejkan kalaqmalaqtaxtuyaꞌ ni ixlapanakni —va chuncha naul ni Isaías.

⁷Tejkan qaynlhuu lapanakni talaqchinchal ni Juan para kalaqmaꞌaqchajꞌaval, ex va lakjunil ni Juan: —Laktuꞌunuꞌ tsapulin untꞌatꞌik. ¿Taꞌayucha xatajunancha ni uxiknan para kaꞌostꞌik ni jamaqanlqajnati yu lakamintacha?

⁸Kꞌamakꞌatꞌikcha yu lajꞌox para ex chuncha katasulcha ni mapꞌaxatꞌatꞌikcha mimputsukkꞌan. Jantu kanauntꞌik meꞌemankꞌan: “Ni Abraham yucha kimpaykꞌan”. Kitꞌin klajunau yu Dios lay kalakmapaxal ni aniy chiyux para kataval sasꞌatꞌan Abraham.

⁹Chavaycha va tacha taun hacha yu va laycha kachaqxtal ni kꞌiu la ixtitakxiyati. Yu jantu makay yu lajꞌox, yucha kachaqxtakal, va kamapꞌukalcha ni laka jikmi.

¹⁰Ex tanajun pumalhuu lapanakni: —¿Tas kakmakayaucha?

¹¹Ex qaltayanal ni Juan, va najun: —Yu lhitꞌajun aqxtꞌuy chamarra, va kaxtaqnil yu jantu kalhitsukul. Vachu yu lhitꞌajun ixlhiꞌuti, va katꞌaꞌul yu tsꞌanqaniy.

¹²Ex chuncha tachinchal yu tachꞌinin impuestos para kamaqchajꞌavakal, va tanajun: —Jamalaniniꞌ, yu kijnan ¿tas kakmakayaucha?

¹³Ex lakjunil ni Juan: —Jantu kꞌalhitꞌoqslaskꞌinitꞌik tumin yu jantu tapaxtoqniyan.

¹⁴Ex yu tropas vachu talhisakmil: —Yu kijnan ¿tas kakmakayaucha? Ex lakjunil: —Jantu kꞌalakꞌalhaunitꞌik alati lapanakni kun miꞌayajnatkꞌan y jantu kꞌalakmakꞌanutꞌik. Kꞌatꞌaꞌoxamaktꞌamitꞌikcha kun yu milhilhajatkꞌan.

¹⁵Tachun ni lapanakni ixtapakxanꞌita yu ixtanajun kamalaqachayaꞌ ni Dios. Taval va ixtapastakꞌa la ixjalhanutkꞌan ni Juan kaval ni Cristo yu ixtanajun kaminaꞌ.

¹⁶Pero ni Juan va jalakjunil tachun ni lapanakni: —Ni kitꞌin va xkan klapumaꞌaqchajꞌavayau. Pero kaminaꞌ aqayntaun yu apalay ay xajantu kitꞌin. Yu kitꞌin tus jantu kimpaxtoqniy kaklakmusxꞌoqnil xamusni ni ixvarachi. Yucha katapumaꞌaqchajꞌavayan kun ni Espíritu Santo ali jikmi.

¹⁷Va tacha kalhitsukul la ixmakaꞌ ixpatankꞌalhan para kalaktankꞌalhal ni lapanakni tacha trigo. Yu lajꞌoxi kalakmaꞌayaꞌ la ixpakꞌatsa pero yu tacha pꞌoqxni kalaqxavayaꞌ laka jikmi yu jantu aqtaun kamixaꞌ.

¹⁸Va lhuu jatapastakꞌati jaxtaqnil ni lapanakni. Jalaqputeꞌenil ni ox chivinti yu masuy tacha lay katapulaqtaxtul.

¹⁹Ni gobernador Herodes ixtꞌatꞌajun Herodías yu ixanati ixpꞌisaqa, vachu makal alati axtoqnuꞌ yu jantu ox kaval, xlhiyucha laqꞌaymal ni Juan.