Luka 3:3-19

³Iye kapita inti piya zíkiwa nanyenje ya muto wa Yordani, akiwereza wanu, akamba javi: “Tubiyani, moziwe ipate Mwenyezimungu akuswamiini madambi enu.”

⁴Evi ndi kamba vyavyandikiwe nkitabu ca nabii Izaya javi: “Munu mmojawapo kawankukuwa nlanga, kankwamba: ‘Tengezani njira mumpokerere Mwenye Nvushi, olosani barabara yake.

⁵Mirati piya ikwijala, myango na makinga piya vyandaziwe, mwa kupombonyoka molosiwe, muri mawe mubambadiwe.

⁶Na wanu piya wakuja kuwona kuvusha ka Mwenyezimungu.’ ”

⁷Wanu wákuka kwake wakóziwe, Yahaya akiwambira javi: “Kabila ya mirába sumwe! Nani akukumbuseni kutira hukumu ya Mwenyezimungu suku zambere?

⁸Lavyani visumo vyema vyakolóta kutubiya kwenu. Wala musambe mmyoyo yenu: ‘Tiwa nawo wawa yetu, ndi Iburahima.’ Kamana nukwambirani kuwa anta na eya mawe‑ya, Mwenyezimungu akidiri kutadula kuwa ujukulu wa nabii Iburahima!

⁹Epa sambi‑pa, soka riwa panzipe wa muti, tayari kutupula. Kwa javyo, kila muti saupa visumo vyema usinjiwa, ukwefiwa pamoto.”

¹⁰Wanu ware wakindairi, wakamba: “Sambi, catijuzi kutenda kinani?”

¹¹Yahaya akiwajibu, akisema javi: “Ári na zubãu mbiri alavye mmoja, ampe mwenziwe saana. Ári nawo cakurya, kwa namuna moja, alavye ammere mwenziwe.”

¹²Na waja novyo warípisi nsoko wamojawapo kusakula koziwa. Ewo wakindairi Yahaya: “Mwanlimu, ofwe tijuzi titende kinani?”

¹³Iye akiwajibu: “Musiripise kinu tena kupundisa vyamwamuriwe.”

¹⁴Masurudadu newo novyo wakindairi javi: “Sambi ofwe, tíjuzi titende kinani?” Yahaya akiwajibu, akamba: “Musinyang'anye munu nzuruku, wala musinlongopere kinu. Muwe radi na nshahara wenu.”

¹⁵Wanu piya wakinrindira kuja Almasihi, wakiwaza mmyoyo yawo kuwa dalili Yahaya, wakamba: “Fala iye si Almasihi?”

¹⁶Novyo-sivyo, Yahaya akiwambira wanu ware piya: “Kusema kweli, omi nukozani na maji, fala akuja mwengine wanguvu pakulu koliko omi. Kusema kweli, omi siri bora anta wa kunvula tamango zake. Iye akozani na Roho Takatifu pamoja na moto.

¹⁷Iye paa iwa mmakono mwake, apate kuwandala masansi na tirigu ature kwake-kwake. Ikisa tirigu‑yo ature nkikuti mwake, ila masansi ataya moto sauzimika.”

¹⁸Basi javyo, na masowezi mengine tena, Yahaya ndi vyakiwarimbisa wanu myoyo, kuno akiwereza Habari Ngema.

¹⁹Fala nfalume Herodi, kâsutumiwa na Yahaya kwa sababu ya vitendo vyake na Herodiza muka wa nduye, pamoja na vitendo vyakunyata piya vyaatendire,