Noca 3:3-19

³Jamajjeya Huani poꞌayequie nequia cua Eyacuiñajjija esohui huohuiya Jodana cueijje. Ohuaya pea cuana jama huohuime aca cua baꞌa: —¡Jjashahuabaquicue Eyacuiñajjijo; miquea mimishi pajeaꞌyocue! ¡Miquea mimishijo quea yeno pocue! ¡Aꞌa mimishi maja sa poꞌyojji! Miya mimishi pajeaꞌyajo, aje Eyacuiñajjiya miquea mimishi cuijea cajeꞌyo. Eyaya miya besa meeje enajje pea cuanaja ebajji miya Eyacuiñajjija epeejji nei nei cuanijo.

⁴Jamaya Isaiaa yahuajo nei Huanijo tehue ca cua. Isaia Eyacuiñajjija epeejji, esohui huohuijji cua. Oya etiiquiana nei nei cua. Jama tehuemeya aje yahuajo aca cua baꞌa: “Oe dejja quimajo nequi taaani jama baꞌa: ¡Acua pocue! ¡Jjashajjaꞌajjaquicue Eyacuiñajjija huoojeaꞌyo ojjaña jaahuanajjijo!

⁵Eyacuiñajjiya dejja quea mimishi cuana jeajea caje cuaqui yasijje jjashajjaꞌajjaqui ajjajojo. Ojjañaa joya Eyacuiñajjija esohui ojaya ehuoojeaꞌyo ojjaña jaahuanajjijo shajjaꞌajja cani ca ca quea bame nee cuajeꞌyo. Joya ecua ejiojji quea bame aca yani jama jayojja dejja cuana quea bame acajeꞌyo.

⁶Ojjaña meshijo nequica dejjaa shajjaꞌajja caje Eyacuiñajjija esohui. Joya onijje jjapeequije Eyacuiñajjiya mimishi cuijea cajeꞌyo”. Jamaya cua Isaiaja etehueꞌyo Huanijo.

⁷Majoya dejja quea huiso cueya cua Huani que mimishi pajeaꞌyohua nisho, oja besa mee yohua nisho peaꞌaiya. Jamajjeya aje Huaniya jama tecueame aca cua baꞌa: —Miquianaya quea tai cuani. Peyo jayojja cuani. Miquianaaya ca jja ca mimishi pajea nishoꞌyaña. Miquianaya jjashahuaba taiquiani jama baꞌa: “Eyacuiñajjiya eya jeajea jjima acaje cuaqui yasijje Huanija enajje ebesa meejojo”. Jamatii miquianajaya ca jja ca oe mimishi pajeaꞌyo jjima nei nei. ¡Ebionei oe shajjaꞌajjacue Eyacuiñajjija esohui; majoya miquianajaya mimishi pajea neineiꞌyocue! Majoya oe enajje eyaya besa meejeꞌyo Eyacuiñajjija epeejji nei epojji.

⁸Miquianaya Eyacuiñajjija epeejji nei baꞌyanijo, mimishi epo becaꞌyojji pojjeama. ¡Jama jjashahuabaquimeya oe pocue enajje ebesaqui cuahuajje! Aꞌa mimijji jama baꞌa: “Ecuea etiiquiana Amajama cua. Oya Eyacuiñajjija epeejji nei cua, jamajjeya aje oe ecuanaya Eyacuiñajjija epeejji peaꞌai cuani”. Cho, miquianaya ca ca jjapeequi jjima Eyacuiñajji nijje. Miquianaya quea mimishi, de. Eyacuiñajji ojaya epeejji quea huiso sa cuani jojjemo Amajama jayojja epojji, ohuaya mei pana came.

⁹Miquianaya joya acui jjajjamaꞌ jayojja cuani. Jiquio ecua acui jjajjaꞌyo ajja jajajea caꞌyojji jayojja jama Eyacuiñajjiya dejja mimishi acajeꞌyo, jeajea cajeꞌyo cuaqui yasijje. Jamaya aje miquianaya acajeꞌyo mimishi pajeaꞌyo ajjajojo, onijje jjapeequi sa po ajjajojo. Beca cuana ca ca joya acui quea jjajja huiso jayojja cuani. Quea bame nee nee baꞌyani, Eyacuiñajji nijje jjapeequiani jjejojo. Quea bei baꞌyani pea cuana nijje, oya Eyacuiñajjiya quea jea nee nee acani jjejojo.

¹⁰Majoya aje dejja cuaa jama huohuiꞌajjame aca cua baꞌa: —¿Yajja acuae oe po cajji soꞌo?

¹¹Huani jama cua baꞌa: —¡Joya miquea beca yanijo daqui quiacue daquimaꞌ cuana huasijje! ¡Miquea bobi yanijo ca bobimaꞌ cuana huasijje quiacue!

¹²Emeshi meseja bejjo chichajji cuani cuaa jama huohuiꞌajjame aca cua baꞌa: —Esohui huohuijji, ¿yajja acuae pajjaja po cajji soꞌo?

¹³Huani jama cua baꞌa: —¡Aꞌa quea mimishi pojji! ¡Aꞌa quea sose huiso ajji! ¡Joya emeshi meseja sosehuiso tiiya jjeshecue! —jamaya cua Huani.

¹⁴Majoya aje sohuinanohua jama huohuiꞌajjame aca cua baꞌa: —¿Yajja acuae ecuanaya cuajeꞌyo soꞌo? Huani jama cua baꞌa: —¡Aꞌa miquiaaya dejja cuana iñajji bejjo esiijji! ¡Aꞌa pea cuana nijje siajje pojji bejjo esiijji! ¡Miquianajaya bejjojo nei jjaja oe quea bihui pocue! —jamaya Huaniya sohuinano aca cua.

¹⁵Dejja cuaa Huani Eyacuiñajjija huoojeaꞌyo ojjaña jaahuanajji poso aca cua oja esohui quea bame nee nee cua jojoya.

¹⁶Huani ca ca Eyacuiñajjija huoojeaꞌyo ojjaña jaahuanajji pojjeama cua. Oya jama cua baꞌa: —Eyaya miquianaya enajje besa meejeꞌyo Eyacuiñajjija epeejji jojoya. Eya ca ca Eyacuiñajjija huoojeaꞌyo ojjaña jaahuanajji pojjeama. Oya ca ca Quito bajjani quijje pishana cueje. Ohuaya miquiana que Eyacuiñajjija Edojjoshahua Bame dobiqui mee cajeꞌyo. Jamajjeya miya quea bame cuajeꞌyo. Mimishi cuana pajea sa poꞌyo ajjajo ca ca, jeajea cajeꞌyo cuaqui yasijje. Jamaya Quito oe nei quea caꞌa nequi. Eya ca ca iña quea caꞌa pishana nequi. Jamajjeya eya ca iña onijje nequi sa po ajja miquiana ani cojja nei. Quea bicho eya, de.

¹⁷Quito cueje ojaya epeejji nei chichaꞌyohua. Pea cuana ca ca cajaa ajea cajeꞌyo. Eꞌe, jiquio ecua seya anoso shaa jea majje equi yasijje iyaꞌyaña jama ojaya epeejji cuana acajeꞌyo Quitohua. Jiquio ecua seya anoso cuiahuojo majje shaa jeajeaña jayojja jama Quitohua ojaya epeejji pojjeama cuana jeajea cajeꞌyo cuaqui quijjoꞌyo ajja huasijje —jamaya Huaniya aca cua.

¹⁸Huanija pea esohui jama cua baꞌa ojjaña cuanajo: —Eyacuiñajji ojjaña nijje jjapeequi sa cuani, jjeya nei.

¹⁹Ojaya pea esohui jama cua baꞌa: —Esejaya emeshi mese, Enode bajjani quea mimishi nee nee cuanaje. Oja chahuaja, Penipeja huanase sii canaje oja huanase epoꞌyojji. Ma epona Enodiasi bajjani cuanaje —jamaya cua Huani.