San Lucas 3:3-19

³Hane quiji catsujyihiya me yëjë ni ladu tiña tsëhë ndajyë Jordán, tichja me xi meje rë xi tsindeya xu xuta cjuatacun rë me hacuaha xtenda me, cojo sa xi tsinchataha Nina xuta tsëhë jyë́ rë me.

⁴Xi cuatjin xu casahmi Juan ne, casahmichihin me sacuatjin camahindu hatsëë nixtin xcun xujun xi chja cjua rë profeta Isaías xi chja cuitjin: Cuitjin jercu hñu cuichja ngu xuta ngajan hiscan jemu xín tsëhë nandya: “Tuhunchjinu ndiya tsëhë Nai naja; ninguixun ndiya tsëhë me.

⁵Yëjë ni hiscan nangui cahntsua ne, tsë́ya rë, yëjë ni ndetjún cojo yëjë ni naxi ne, cuijnenangui, yëjë ni ndiya lahñi ne, cuma quixi, yëjë ni ndiya xi hacuiin chihin ne, cuma chihin.

⁶Hane yëjë ni xuta ne, scuëë me hacutjin vaxëtje Nina xuta rë me.” Cuatjin xu catsihindu Isaías cjua xi jercu hñu cuichja xuta jan.

⁷Ngajan xi hya xi quiji xutacjín xi xtenda me ne, cuitjin xu cachja Juan cojo xuta: ―‍¡Ngayujun ni ngayun quihndi rë chu tsehen matsejen ne!, ¿yo cavinchangui nuju xi nihñu ngahñu xi cuetjuntjun tsëhë castigu xi hatuxa tsingatju Nina?

⁸Sá xi meje jain cuetjuntjun matsejen ne, nihñu suvá cjuandaja sacuatjin sahmi xuta xi catsindeya jain me cjuatacun rë me. Xicanujuun cahntsua xahasen nuju cjua vihi: “Ngayaan ne, tsajin mé cuma naja ta, tsëhë xi tjë rë Abraham ngayaan.” Xicanujuun cuatjin matsejen ta, nguehe cuichjá cojo nuju ta Nina ne, hisca ndyojo xi cuicun vi ne, cuma sahmi me tjë rë Abraham.

⁹Chutsujun ta ngayun matsejen ne, tangun ngayun cojo yatjë xi ha quitaháchjine quicharcu tyjama rë xi cuetsihin xtí. Yëjë ni yatjë xi suaain tu xi ndaja matsejen ne, xtí rë, sehe cjue cueti. ―‍Cuatjin xu cachja Juan.

¹⁰Ngajan xi xutacjín jan ne, cuitjin xu cavinenguise rë me Juan: ―‍¿Hacutjin ndatjin nihñi xi cuma nihñi cjuandaja xi nújun vë ni? ―‍Cuatjin xu cavinenguise me.

¹¹Hane xi cafayangui Juan ne, cuitjin xu cachja me: ―‍Jarë ngayun xi tjin nuju jo tsjian nuju ne, tuhun rë ngu yo xi tsajin rë. Jarë ngayun xi tjin xi chinu ne, ha chuva vëhë ni tuhun hitsë catjinë me xi tsajin xi sinë. ―‍Cuatjin xu cachja me.

¹²Hacuaha canduva sa xu ngujo cha xi faha tujúnsa xi meje rë cha xi xtenda cha, hane cuitjin xu cavinenguise cha: ―‍Tatá, ¿mé xi ndatjin nihñi ngayin? ―‍Cuatjin xu cavinenguise cha.

¹³Sehe ngajan xi Juan ne, cuitjin xu cachja me cojo cha: ―‍Hacuiin cjín sa tujún chjahyun rë xuta. Chjahyun rë me hacutjin xi casatëxa ni nuju. ―‍Cuatjin xu cachja me.

¹⁴Hacuaha cavinenguise nga ngujo sindadu me cuitjin: ―‍Hane ngayin ne, ¿mé xi ndatjin nihñi? ―‍Cuatjin xu cavinenguise cha. Sehe cachja xu me cojo cha cuitjin: ―‍Xicanaxuun rë xuta tujún cojo cjuachan, o sá xi cojo ngu cjuandacha. Catamangutacún ni cojo tujún xi ha ma chji nuju. ―‍Cuatjin xu cachja me.

¹⁵Xuta ne, jercu siuya camahani me mé xi cuma, hacuaha vinenguise xu me cahntsua xahasen rë me cuitjin: “Hyaan sa xi Juan rë vi Xihin xi Tsingatju Nina xi cuaxëtje naja me.” Cuatjin xu cavinenguise me.

¹⁶Sehe ngajan xi Juan ne, cuitjin xu cachja me cojo yëjë xuta jan: ―‍Ngahan matsejen ne, cojo nandá ni tiviténda nuju, peru sehe cuinduva me xi cueyá me Hasen rë Nina cahntsua xahasen nuju, hacuaha cuaha me sacuaha ngu ndihi xi tsityjahi rë cjuatacun nuju. Me vëhë ne, hitsë sa jyë hnga me cojo cjuatacun rë xi cumá ná ngahan, hisca cumaji tsinguisehercu sahme tyjahi chuxinxtë rë me.

¹⁷Me xi tsingatju Nina jan matsejen ne, sacuaha xi ha yahatsja me quicha xi tsinguitjen rë xtë rë trigu cojo sa xi cuma tyjahi ndaja trigu xi casechun rë tsëhë me, hacuaha cjuaya me trigu tyjahi xi cuinchandaja me, hane xtë rë jan matsejen ne, cuaca me xcun ngu ndihi xi tsajin nixtin hvo. ―‍Cuatjin xu cachja Juan.

¹⁸Hacuaha hacuiin suvá xu ni cjua vëhë cachja Juan cojo xuta hya xi cachja me cjuandajyihi rë Nina ta cachja sa xu me jemu cjín cjua.

¹⁹Herodes, me xi cavitexa ngajan distritu Galilea ne, hacuaha cachjataha xu Juan me ngatsë rë xi cafaha Herodes na Herodía, chjuun rë hntsëjñu me, xi cumá chjuun rë me na. Hacuaha cachjataha sa xu Juan me tsëhë jingu sa xcusun tsehen xi casahmi me.