LUCAS 3:3-19

³Lex wa Xwa yra gyëz ne nak guex rugyow-Jordán, re Xwa lo mén ne yrobnis men no ysaan men xgyelmal men chen gun Dëdyuzh perdon xdol men.

⁴Zeree wak kumplir diiz ne wkaa profet-Isaías ledne re: Te rëz rlen denbidx, re we: “Gulaxnëz xnëz Men ne rnebééy, guxal te nëz ne tebli.

⁵Yrandxee ledne nugyët, gyezaa we; yrandxee gyeey no le yrandxee bles, gakleecho. Nëz ne nyeky, gaktebli we. Nëz ne gya gyëttee, gaktebli we.

⁶No yrandxee mengyëzlyu kwii mén ne yxaal Dëdyuzh ne yselaa mén.”

⁷Chene ra mén lo Xwa ne ytxobnis Xwa men, nan Xwa lo men: ―¡Xerras mëël! ¿Txu na lo de ne yláá de lo gyelentozroo ne zëdyob?

⁸Xnëz gugak chen gaknyoo ne nli che wsaan de xgyelmal de, no guedet de lo xkompanyer de: “Xnëz Abraham zëëd be”; porke yna noo lo de yra de ne axtegue gyeree zun Dëdyuzh gan ylaa Dëdyuzho men ne zëëd xnëz Abraham.

⁹Che list zu gyibyag ne txuug axtegue ydeblu yag; yrandxee yag ne rkaadet nexwen lo, txuugo, tsa we lo gyi.

¹⁰Lex wnabdiiz mén lo Xwa, re men: ―¿Pagox rap noo degne ylaa noo?

¹¹Wke Xwa, re Xwa: ―Men ne rap txup lërmank, rap men degne ydee men tebo lo men ne yëteno; men ne rap ne ru, rap men degne ydee men tebëdo lo men ne yëteno.

¹²No tebëd men ne rgoob zeg impwest wa lo Xwa ne ytxobnis Xwa men, lex wnabdiiz men lo Xwa, re men: ―Maxter, ¿noo naa, pagox rap noo degne ylaa noo?

¹³Lex re Xwa lo men: ―Gobdet de mazre nzhoodee ke ne rap de degne gob de.

¹⁴No le tebëd soldad wnabdiiz lo Xwa, re men: ―¿Noo naa, pagox rap noo degne ylaa noo? Wke Xwa, re Xwa: ―Ynechedet de mén por ne gak ygyitxee de logne nak xen men, ni ykagyiidet de mén logne wlaadet men, no gugyan byen logne rezh rka de.

¹⁵Noze kambë́z yra mén guin, nuu lextoo men pazer laa Xwa nak Crist.

¹⁶Per re Xwa lo men yra men: ―Noo noze kon nis rtxobnis noo de, per che zëëd te men ne ytxobnis kon Espíritu Sant no le kon gyi. Axtegue ni xgyël men rzëëldet noo ychil noo nii men porke mazre rapdee men poder ke lo noo.

¹⁷No nzen men ne ylanya men zhobxtil, koo men zhobxtil lad xgyizho, lex gutsoow meno; le xgyizho tsa lo gyi ne nunk gyuudet.

¹⁸Zeree re Xwa lo mén no ndalre diiz ne wnino Xwa men, wzëët Xwa xdiznzoon Dëdyuzh lo men.

¹⁹No wakndux Xwa lo rrey-Herodes por ne nuu Herodes yrup Herodes Herodías xewnaa Blib bech Herodes no por yra ne mal ne wlar Herodes.