SAN LUCAS 3:3-19

³Ic opanotaya in Juan inahuac in atentli Jordán, oquiniluihtaya: ―Ximoyolcuepacan ica Dios mamechtlapohpoluican namotlahtlacol huan namechcuatequis.

⁴Inin opanoc quen in tlayolchicauqui Isaías oquihcuilo: Quicaquisque quen quihtohtas inon tlanahuatili ipan in acahualtlahtli: “Hualuilohuas Totecohtzin. Ximoyectlalican ica namoyolo ic nanteselisque, ijcon quen nanquiyectlalisque in ohtli ic hualahxihuas in Totequihuatzin.

⁵Quitlaltemisque in tlacoyocten. Quinixmanasque in tepemen huan in tlachquilten. Quimelahuasque in tlen cueltic ohtli. Quixmanasque in ohtli ic maye parejo.

⁶Huan nochin tlacamen quitasque in Totemaquixticahtzin tlen techualtitlanililos in Dios.”

⁷Ihcuac ochocoquisayayahque in tlacamen, maquincuatequi in Juan, yehhuan oquiniluiyaya: ―¡Namehhuan in ololi den ome inxayac! Tel, ¿aquin omechnahuati ic nanmaquisasque ipan in hueyi tlapanolistli den Dios tlen mechualahsis?

⁸Xicchihuacan tlen cuali huan ijcon maquitacan quen onanmoyolcuepque. Huan ahmo ximoyolchicahuacan namehhuan ic nanquihtosque: “Tehhuanten tiixuihuan in Abraham”, tleca namechiluiya in Dios cuali mochihuas ixuihuan Abraham inin temen.

⁹In tetzahuitl ayacmo huehca. Quen aquin yau coutequi ipan in tlamiloli ica in tlen ahmo quitemacas cuali itlaquilyo. Ijconon quitohuetzosque ipan in tletl. Ijcon nampolihuisque in tlahmo nanmochihuasque cuenta.

¹⁰Huan ijcon otlahtlanque: ―Tel, ¿tlen ticchihuasque?

¹¹Juan oquinnanquilic: ―In aquin quipiya ome itlaquen, quimacas seya in aquin ahmo tlen quipiya. Huan aquin quipiya itlacual quixeluis in aquin ahmo quipiya tlen.

¹²Noyojqui ohualahque sequin renderos ic mocuatequinihque huan oquitlahtlanihque in Juan: ―Tlamachtiyani, tel, ¿tlen ticchihuasque tehhuanten?

¹³In Juan oquiniluic: ―Ahmo ocachi xiquincobrarocan quen in tlanahuatili quihtos.

¹⁴Huan noyojqui sequin soldados otlahtlanque: ―Huan tehhuanten, tel, ¿tlen ticchihuasque? Huan oquinnanquilic: ―Ahmo aquin tlen xicuilican ic nanquinteluisque niyan ica istlacatilistli ica tlen ahmo quichiutoc, huan xipactocan ica namotlaxtlahuil.

¹⁵In tlacamen omochixticatcahque tla cana in Juan yehhuatl yesquiyani in Cristo.

¹⁶In Juan oquiniluic nochten: ―Nehhuatl melahuac namechcuatequis ica atl. Huan hualuilohuas seya aquin mechcuatequis ica in Itiotonaltzin huan ica tletl. Yehhuatzin mopiyas ocachi chicahualistli quen nehhuatl, huan nehhuatl ahmo tlen noquisca niyan ic nimochihua tlapalehuiyani.

¹⁷Huan tla ilohuas quen in aquin quiquitzquihtoc in pala ic mochipahuas in trigo huan mosecnintlalis in itlahsolyo. Huan motlalis in trigo canin moehuas huan in itlahsolyo motlatis ipan in tletl tlen ahyic sehui.

¹⁸Huan ica miyac tlahtolten ijcon oquinnextili in Juan, huan oquincaquiltiyaya in cuali tlahtoli ica tlen hualas.

¹⁹Noyojqui oquicaquilti in hueyixtoc Herodes ica inon sihuatl Herodías quen oquisihuacuili in icniu Felipe. Huan noyojqui ica in oc sequin tlen ahmo cuali quichiutoc.