SAN LUCAS 3:3-19

³Juan₅₄ në́₃ ca₂ŋɨ₃ le₂tan₅₄ juɨg₂ te₁'i₁ ma₂quián₅ Cuá₃ Jordán, qui₂tsɨ́'₅ dsa₂ a₂'nió'₅ tsóin₃ jmɨg₂, cuë₃ léi₄ a₂ma₂ca₂dsi₃quén'₅ dsɨ́₅ ia₁jaun₂ le₃'én₂ Diú₄ dsáu₁.

⁴Le₂në₅ bá₄ ca₂lë₃ ca₂rë₃ti₃ con'₂ lë́₅ jág₁ a₂ca₂tó'₂ Isaías ne₄ si₂, i₂jme₁'ë́₂ jág₁ o₄quió'₄ Diú₄, a₂ca₂juá'₂: Nag₃ dsa₂ co₂mɨ'₅₄ jág₁ caun₂ 'uë₃ co₂'ŋiog₅, a₂juá'₂: Jmo₄ 'nia'₂ co₂jŋia₅₄ juɨ₅ quió'₅ Te₁gui'₅₄; Nia₄ 'nia'₂ caun₂ juɨ₅ co₂dsau₅.

⁵Ca₂le₃jë́₃ jɨ'₅₄ siá₅ 'nió'₅ le₃can'₂, ca₂le₃jë́₃ dsɨ₂con'₂, má'₂, 'nió'₅ 'ag₃ co₂rë₂; Ca₂le₃jë́₃ juɨ₅ qui₂rë₂guion'₂, 'nió'₅ lé₂ co₂dsau₅, juɨ₅ a₂qui₂le₁quɨn'₅₄, 'nió'₅ lei₂.

⁶Ca₂le₃jɨ́n₃ dsa₂ mɨ₂güɨ́g₃ bá₄ jág₃ 'a₂ lia'₂ lë́₅ a₂jmo₃ Diú₄ lió₂.

⁷Jaun₂ ca₂'uɨn₂ dsa₂ quió'₅, ca₂o₃léin₂ mɨ₂₃ cho₃ Juan₅₄ jmɨg₂, jaun₂ ca₂juá'₂ 'éi₂: ―¡'Nia'₂ tsɨ₁jon₂ dsɨ₂mɨ'₂! ¿'Ein₂ bá₄ në₂chí'₃ 'nia'₂ a₂cuɨng'₂ long'₅₄ uɨg₅ a₂ja₂quián₃?

⁸Cuë₄ 'nia'₂ léi₄ jaun₂ a₂të₃dsón'₂ ma₂ca₂dsi₃quén'₅ 'au'₂. 'A₃ lë₁juɨ₁dsi₂jŋia₅ 'au'₂ 'nia'₂ jua'₅₄ a₂jua'₅₄: “Lág₅ jnia'₅₄ tsɨ₁jon₂ Abraham”; ia₁ jniá₂ juá'₅, Diú₄ quɨ'₅₄ jmɨg₄ jmo₃ ca₂të₂ nɨ₁cang₁ tio'₅₄ la₂, lé₂ le₃jmói'₂ chi'₂-guein₂ quián₅ Abraham.

⁹Ia₁ ma₂lë́₅ co₂jŋia₅₄ ŋi₁dsi₁ a₂qui₃uɨ́n'₂ nɨ₁'ma₂. Ca₂le₃jë́₃ 'ma₂ a₂tsá₃ dse₃ mɨ́g₂ 'ag₅, uɨ́n'₂ dsɨ₃to'₅₄ si₂.

¹⁰Jaun₂ ca₂ŋag₃ dsa₂: ―¿'E₂ bá₄ le₃jmó₁ jnia'₅₄ jaun₂ në́₃?

¹¹Jaun₂ ca₂ŋag₃ táng₃: ―I₂cha₂ tɨn₃ dsán'₃ tsɨn'₅₄, juɨ₁cuë́'₄ co₂dsán'₃ i₂tsá₃ cha₂ quió'₅; le₂jaun₂ guë'₂ juɨ₁lia'₂ i₂cha₂ a₂guë́'₃, juɨ₁jme₂'oin₅₄ juɨ₁lia'₂ i₂tsá₃ cha₂ quió'₅.

¹²Ca₂o₃lén₂ i₂lɨn₅₄ i₂cán₂ 'lia'₅₄ quián₅ dsɨ₂tan₅₄ në́₃, a₂'nio₃ tsóin₃ jmɨg₂, jaun₂ ca₂tsɨ́'₃ Juan₅₄: ―Të₅, ¿'e₂ bá₄ lé₂ le₃jmó₁ jnia'₅₄?

¹³Jaun₂ ca₂jéin'₃ táng₃ 'éi₂ jág₁: ―Tsá₃ jmó'₂ 'nia'₂ jua'₅₄ a₂cán'₁ ŋag₅₄ guë́₄ 'lia'₅₄ quió'₅ dsa₂, jua'₅₄ a₂dsɨ₁juɨn'₅₄ con'₂ 'éi'₃ quí'₅ si₂.

¹⁴Ca₂o₃lén₂ i₂lɨn₅₄ 'lióg₂ në́₃, ca₂ŋag₃: ―Jnia'₅₄ guë'₂ në́₃: ¿'E₂ bá₄ ca₂tág₂ jnia'₅₄ jmó₁? Jaun₂ ca₂ŋag₃: ―Tsá₃ qui₁quiang'₄ dsa₂ juë́'₅, jua'₅₄ a₂qui₁jŋiá'₄ 'e₂ qui₁jŋiá'₄ quió'₅, on₃ guë'₂ qui₁'nɨ́g'₄ dsa₂ jua'₅₄ a₂lë₁qui₁'nɨ́i'₄. Juɨ₁le₂'ŋio₂ bá₄ 'au'₂ 'nia'₂ ján₃, con'₂ ma₂tí₅ 'liang'₅₄.

¹⁵La₁ dsa₂ në́₃, tsá₃ tei₄ le₁'ág₄ dsɨ́₅ tioin'₅₄, le₁jŋia₂₃ le₃ŋi₅ chi₂jua'₂ Juan₅₄ 'éi₂ bá₄ lɨ́n₅ I₂rë₂'ɨ́n₁ quián₅ Diú₄.

¹⁶Jaun₂ ca₂juá'₂ Juan₅₄ 'ŋiog₅, ca₂tsɨ́'₃ ca₂le₃jɨ́n₃: ―Jniá₂ në₂tiáng₃ 'nia'₂ jmɨg₂; la₁ i₂já₅ chi₂quɨ́n₃ në₅, tióg₂ Jme₂dsí₂ Jŋió₅, jë₄ si₂ në́₃. 'Éi₂ bá₄ i₂'uan'₂ guë́₄ lia'₂ con'₂ guë́₄ jniá₂, ca₂lia'₂ jŋia'₅₄ lau₂ ton₅ tag₅₄ bá₄ tsá₃ ca₂tɨ́ng₂ tsɨ'₅₄.

¹⁷Ma₂chi₁chan'₂ si₂jmu₂ a₂jme₂dse₃ mɨ́g₂ trigo. Cág'₃ dse₃ lɨn₃, con'₂ dsia₃ jmá'₃ a₂dse₃, 'ma₃ dsi₂néi₂. Dsɨ́'₂ bá₄ jme₁qui₅ dsi₂si₂ ja₁tsá₃ lɨ́g'₂ jmɨg₄ éi₃.

¹⁸Jaun₂ le₂në₅ bá₄, 'lióng₂ jág₁ dse₃ siá'₂ ca₂to'₂ Juan₅₄, ca₂jme₃tɨin₂₃ dsa₂ jág₁ dse₃.

¹⁹Ján₃ bá₄ ca₂jéin₂ Rag₅₄ Herodes, ia₁ a₂jme₁ma₂guá₅ 'éi₂ quian'₅₄ 'io₅₄ Herodías dsa₂ mɨ́₂ quián₅ rɨin'₅₄, ne₄ 'lióng₂ guë́₄ a₂'lɨg'₅₄ siá'₂ a₂jme₁jmo₅-dsáu₅ Herodes;