SAN LUCAS 3:3-19

³co Juan vac̈hje cjoi ngain cain lugar de ngandehe río Jordán para ndache chojni ixin chonda na que tsentoxinhi na vidé na co siguitte na, para que cainxin tti jianha que nchehe na Dios sinchetjañehe na.

⁴Cain jihi conhe inchin diquentaxin profeta Isaías janhi: Tsinhi na ná tté chojni que tsoyaoxin de ngagaha jna co rrondac̈ho: “Nchechjian ra nttiha para ixin jehe tti chonda cain joachaxin; danttjehe ra ná nttiha nao.

⁵Cain tsaga singattea tsaga, co cain jna co jnanchjan tsonataonxin; cain nttiha que jeha nao, tsonao nttiha, co cain nttiha que jeha nataonxin, tsonataonxin nttiha.

⁶Cottimeja cainxin chojni sicon na tti rroanha Dios para tsjenguijna jehe na.”

⁷Are chojni vaconchienhe na para que Juan rrojincheguitte na, jehe vandac̈ho ngain na: ―¡Jaha ra xenhe conché ra! ¿Quensen jointtanoha jaha ra ixin nchao setanha ra tti castigo anto soji que jitonchian?

⁸Saho nchehe ra jian para que jamé sicon icha chojni que ján ndoa coentoxinhi ra vidá ra co ndacheha chó ra: “Ján na razé Abraham na; mexinxin Dios tsjenguijna na”, ixin janha rrondattjo ra que hasta ẍo jihi Dios nchao sinchechjian ẍo chojni de razé Abraham.

⁹Ojí listo hacha para tsonc̈hinji nttá, co cain nttá que danjoha jian ttochjoin rroc̈hinji ntta co rroche ntta ngain ẍohi.

¹⁰Cottimeja cain chojni mé joanchiangui na ngain Juan co ndac̈ho na: ―Mexinxin, ¿quehe chonda na que sinttaha na remé?

¹¹Juan ndac̈ho ngain na: ―Ẍo chonda ra yó camisa chonda ra que sanjo ra ná camisa ngain tti chondaha ni ná camisa. Co ẍo chonda ra tti jintte ra, jinttecoho ra tti chojni que chondaha.

¹²Nttiha vintteconchienhe canxion xicobrador de impuesto cai para que joiguitte xa, co joanchiangui xa ngain Juan co ndac̈ho xa: ―Maestro, ¿quehe chonda na que sinttaha na janha na?

¹³Co Juan ndac̈ho ngain xa: ―Ncheha ra cobro icha de tti ttetonha ley.

¹⁴Cai canxion xisoldado joanchianguihi xa Juan co ndac̈ho xa: ―Co janha na, ¿quehe chonda na que sinttaha na? Juan ndac̈ho ngain xa: ―Dantsjeha ra tomí chojni afuerza, ni tjanguiha ra cosa que jehe na ẍonhi joinchehe na; jaha ra dintte ra contento conixin tti tomi que jaha ra tedacha ra.

¹⁵Cain chojni mé anto joinao na conohe na ixin quensen Juan ixin ẍaxaon na que puede Juan jehe mé tti Cristo.

¹⁶Pero Juan ndache cainxin na: ―Janha ndoa nttaguittexin chojni conixin jinda, pero toin tsí iná xí que sinttaguittexin ra conixin Espíritu Santo co Espíritu mé tsiaho ẍá ẍohi para sincheroa almá ra ẍá tonhe oro toroaxin ngain ẍohi. Co xí mé chonda xa anto icha tsje joachaxin que janha, ixin janha ni jiquininxinha na ni tsonxindangá corrié catté xa.

¹⁷Xí mé ojiyá xa palé xa, para tsjendoaxin xa trigo, co para sac̈hjehe trigo paja. Sasicao xa cain trigo ngain nchiandoha xa, pero cain paja tsjaga xa ngain ná ẍohi que ẍonhi tiempo danga ẍoi.

¹⁸Conixin jihi, co icanxin consejo, vandachexin Juan chojni tti jian joajna.

¹⁹Co después, Juan joinchesattehe xigobernador Herodes ixin vecao xa jeho nc̈hicoñadé xa que vinhi Herodías, mé cjoi c̈hihi Felipe, xichó jehe Herodes, co jehe Juan joinchesattehe Herodes de ixin icha cosa jianha cai que joinchehe Herodes.