LUKA 3:3-19

³Avo Yohana kachola ng'ambu zose za undewa wa Ulwanda lwa Yolodani, yopeta, “Lekeni vilozo venu mkabatizigwe giladi Mulungu yavigele kumgongo vilozo venu.”

⁴Kamba vija viyandikigwe muna ikitabu cha muhokozi Isaya, “Munhu kenula dizwi muluwala, yolonga, ‘Itandeni nzila ya Mndewa, mgoloseleni nzila zake.

⁵Migea yose yokusiligwa, vigongo na visugulu vose vohimbuligwa. Nzila ziveduke zogolosigwa, hali na mikolongokolongo hatelebuswe.

⁶Na wanhu wose wowona ukombola kulawa ha Mulungu.’ ”

⁷Yohana kawalongela wanhu bwando wamwizile wabatizigwe, “Mweye wana wa nyoka! Iyo yalihi yawazumile kulukimbila lusango lwa Mulungu londalwize?

⁸Tendeni mbuli zilagusa kamba muleka vilozo venu. Sambimsonge kuilongela kamba ‘Ablahamu iyo tata wetu.’ Kwavija nie nowalongela Mulungu kodaha kumwinulila Ablahamu wana kulawa mgamabwe gano.

⁹Avo nhemo ikigwa goya kuikanha mibiki mmisina, avo biki jojose dondadileke kulela mujo unogile dokanhigwa na kwasigwa hamoto.”

¹⁰Dale da wanhu dimuuza, “Avo, tutendeze?”

¹¹Kawalongela, “Yali na vivalo vibili yam'bagulile yalibule, na yali na mandia yatende vivo.”

¹²Wawila kodi na hewo weza kubatizigwa, wamuuza, “Mkulufunzi, na tweye tutendeze?”

¹³Na heyo kawalongela, “Sambimuwile kodi ng'hulu kubanza vumulagizwe.”

¹⁴Asikali na hewo weza kumuuza, “Na tweye tutende choni?” Na heyo kawalongela, “Sambim'bokonye hela za munhu yoyose ama sambimum'vwizile mbuli munhu yoyose, mwenelwe na maliho genu.”

¹⁵Wanhu wose wakala wamemile nhamanila ha Yohana, wakala wokiiuza mmioyo yao kamba siku Yohana iyo Kilisto.

¹⁶Avo Yohana kawalongela wanhu wose, “Nie nowabatiza mweye na mazi, ila kokwiza yali na mhiko kubanza nie, nie sidaha hata kufungula nzabi za ng'hwabasa zake. Heyo kowabatiza na Loho wa Mulungu na moto.

¹⁷Heyo kana kia chake cha kubetela ngano yake, yakunzanye ingano kukano, na imikumvi yaisome na moto hauzimikaga.”

¹⁸Yohana kaupeta Usenga Unogile mwa wanhu yowazuma mkuwagong'ondeza na mbuli bwando waleke gehile.

¹⁹Ila Yohana kamkomhokela Helode Antipa, mndewa, kwavija kakala yamsolile Helodia, mtwanzi wa ndugu yake, na gehile gose goyokala yotenda.