SAN LUCAS 3:3-19

³Chi Juan choñ ñɨcxy ma tüg'ócɨy cajp mɨhuingon je Jordán mɨjnɨɨ, capxhuijy je jäy ajcxy, co huen jothuimbijttaaygɨxy etz huen nɨɨbejtcɨxy jɨgɨx ajcxy ypocy yajhuinmeecxɨp.

⁴Jada jadu'n tunɨ jajtɨ nej je ayucnajtzcapxɨɨybɨ Isaías anajty tɨ cojaay: Jɨm mɨjtɨgɨ̈duum yajmɨdooy tüg jäy mɨna'ñ: “Yaj'oyɨɨygɨx yɨ Dios ytü'aa, tɨm jadu'n nej jäy ajcxy yaj'oyɨɨygɨxy yɨ jɨbɨc tü'aa co tüg rey mina'ñ.” Yajtɨ́ɨyɨgɨxy yɨ tü'aa huidɨbɨ ooy y'adɨjy y'a'och.

⁵Tüg'ócɨy anɨɨ ahuoc huen joyɨɨydäy, tüg'ócɨy tungop huen nañ jadu'n joyɨɨydäy. Tüg'ócɨy nɨɨ'aa tü'aa huɨdibɨ tɨjmin tɨjxɨjp huen tɨɨydäy. Yɨ tü'aa huɨdibɨ ca' quipxyjátyɨty huen quipxyjaty tɨɨydäy.

⁶Tüg'ócɨy yɨ jäy ajcxy ixɨpy ñejhuɨ̈hɨpy nej Dios yega'ñ je nihuambɨ cohuambɨ.

⁷Chi Juan ojy ajcxy je jäy pɨnjaty anajty miimb nɨɨbejtpɨ, ymɨnañ: ―¡Miich ajcxy tza'ñ ajcxy y'ajugy y'amɨgüg! ¿Pɨn miich ajcxy tɨ xynɨmäy quëg ma yɨ ayo'n huɨdibɨ Dios yquexaamy?

⁸Túngɨx oybɨ, jothuimbíjtcɨx, ca' ajcxy mɨnaangɨxy miñ xyipy: “Abraham ɨɨch ajcxy n'ap'ajtpy ndeedy'ajtpy”. Ɨɨch miich ajcxy nɨmaayb co Dios ixtɨ jëbɨ yɨ' yaj'ung'adyii yaj'anäg'adyii Abraham jada tzaa ca'ydɨ miich ajcxy.

⁹Dios ni'ixɨ̈ y'ity jaydëbɨ yajcödɨgoyɨpy jäy ajcxy y'alma huɨdibɨ jɨbɨc-huinma'ñ mɨɨd. Tɨm jadu'n nipaady nej jäy ni'ixɨ̈ y'ity mɨɨd jacha co pujxɨ̈ga'ñ tüg quipy huɨdi ca' oy ytɨɨm'aty, etz yajnögtähua'ñ.

¹⁰Chi je mayjäy ajcxy y'amɨdooy je Juan: ―¿Ti ɨɨch ajcxy jëbɨ nduñ?

¹¹Chi je Juan y'adzooy, ymɨnañ: ―Pɨnjaty yhuit mɨɨd metz, jaydëbɨ möy pɨn ca' mɨɨdɨty ni tüg. Etz pɨnjaty caagy mɨɨd nañ jadu'n möhuɨpy pɨnjaty ca' mɨɨdɨty.

¹²Chi miiñ jadyii yajcogüejtpɨ co anajty ñɨɨbedaangɨxy, ymɨnañ ajcxy: ―¿Ti huaad ɨɨch ajcxy nduñ (jɨgɨx Dios xymɨjotcujc'adɨpyɨch)?

¹³Chi Juan y'adzooy: ―Ca' nɨ̈gɨ anaxy myajcogüety jadu'n nej je cötújcɨn y'ane'my.

¹⁴Chi soldado ajcxy ymɨnañ: ―¿Ti ɨɨch ajcxy ndunɨpy (jɨgɨx Dios xymɨjotcujc'adɨpyɨch)? Chi Juan y'adzooy: ―Ni pɨn ajcxy ti mgapɨ́jcɨpy, ni mganïhuambedɨpy ajcxy. Nañ jadu'n mɨjotcujc'ájtcɨxy nej myajmujuuygɨxy.

¹⁵Je mayjäy yjɨjp'ijxyp anajty ajcxy ooy, etz ooy jɨhuɨɨy huinmaay nejhuɨ̈huaangɨxy pen yɨ Juan je' anajty Cristo.

¹⁶Chi Juan nɨmay ajcxy nidüg'ócɨy: ―Ɨɨch janch nyajnɨɨbéjtypɨch jäy mɨɨd nɨɨ. Miimb je' axaam huɨdibɨ jacmɨj ca'ydɨ ɨɨch, ca' huaad yɨ' ycɨ̈ghuin ngejɨch. Je' miich ajcxy xyajnɨɨbedɨpy mɨɨdɨ Dios yjɨhuɨ'ñ ymɨc'ajt etz mɨɨdɨ jɨɨn.

¹⁷Je Cristo ni'ixɨ' y'ity co oybɨ möhua'ñ je jäy huɨdibɨ ajcxy oyhuinma'ñ mɨɨd, etz ymöhuaamy tzaachypɨ je jäy ajcxy huɨdibɨ jɨbɨc-huinma'ñ mɨɨd, tzaachypɨ huɨdibɨ nicamɨna ycɨxɨpy. Tɨm jadu'n nipaady nej tüg jäy ni'ixɨ' y'ity co ymoc-huimboja'n, e chi je oybɨ mocpajc pɨdäga'ñ ma che'x, etz je mocjaam ninögɨ̈hua'ñ, e camɨnaxɨɨ ycapïdza'ñ je jɨɨn.

¹⁸Je Juan ooy jäy capxhuijy, etz canaagnax oybɨ ayuc capxhuäcxy.

¹⁹Chi yɨ' ojy je rey Herodes, co y'uch Felipe ytöxyɨjc Herodías mɨɨd tzɨnaayɨ, etz jacjaydiiybɨ jɨbɨc-huinma'ñ tɨɨbɨ Herodes anajty tuñ.