Luk 3:3-19

³Anutugö Buŋa möta anda Jordan o töwatŋaŋgö kösutŋe miri dop liliköba malök. Liliköba mala Buŋa keunöŋ uruŋini kuŋguba kewö jiba malök, “Iŋini mönö uruŋini meleŋgetka nöŋön o melun mem eŋgimam. Mewö aketka Anutunöŋ siŋgisöndokŋini saŋgoŋda mosötma.”

⁴Miaŋgö keuŋi mi kezapqetok azi Aisaianöŋ ohoi yaŋgö Buzup Kimbinöŋ kewö ahöza, “Kolek garata kunŋan gölme qararaŋkölkölŋe qeta maliga anda qetŋi kewö mötme, ‘Kembunöŋ kamawo! Miaŋgöra mönö jöjöröba könaŋi mesatket. Mönö uruŋini mindiŋgöba könaŋi qölöleiget.

⁵Köna örue pakpak mönö qem tigetka diŋdiŋi akŋa. Kunduŋi wanjaŋi pakpak mi mönö qeköba köl qölöleigetka köröŋi akŋa. Köna mösökqösökŋambuk mi mönö möhamgögetka diŋgime. Luhutnöŋ köna misiiga simbiŋsambaŋ tatzawi, mi mönö kutuba mesatketka solanima.

⁶Anutunöŋ oyaeŋkoyaeŋ Toŋi melaii kaiga gölmeŋi gölmeŋi pakpak yeŋön mi eka ek kutume.”

⁷Jonöŋ miaŋgö dop uruŋini kuŋguiga ambazip kambuŋi kambuŋi yeŋön o melun mem eŋgimapköra yaŋgöreŋ kagetka eŋgeka yeŋgöra kewö jiyök, “O qatö moröŋi, iŋini uruŋini qahö meleŋgetka Anutugö irimŋan seholiiga likepŋi meleŋ eŋgimamgö akza. Mi ölöŋ kölbingö goro keuŋi mi mönö daŋön jii möta sömbuŋini möta ki kaze?

⁸“Miaŋgöra mönö ölŋanök uruŋini meleŋme. Bölöŋamŋineyök liliŋgögetka ölŋi asuhui mi mönö ahakmemeŋinan aukŋe kondela malme. Uruŋine möndömöndö keu kewö kude mötmörime, ‘Neŋön mönö Abrahamgö gwölönarökŋa malinga Anutunöŋ qahö ayuhum neŋgima.’ Mewö töptöpŋine qemakzemö, ölŋi mi qahö ahakze. Nöŋön miaŋgöra kewö jibi mötket: Anutunöŋ köt ki ölöp jim kutum eŋgiiga letota Abrahamgö gwölönarökurupŋi aka Anutu möpöseimakŋemö, iŋini denöwö?

⁹“Uruŋini qahö meleŋme ewö, Anutunöŋ mönö iŋini ip ewö teŋgöri etpingö akze. Ip pakpak ölŋi ölöpŋi qahö kuŋgumakzei, mi mönö köli etket könöpnöŋ gili geme. Ip mewöŋi kölmamgö kesiŋi lök jitŋi saŋe ala ip könaŋe ali jöjöröba ahöza. Anutunöŋ mönö bölöŋamŋinaŋgö likepŋi meleŋ eŋgima.”

¹⁰Mewö jiiga ambazip kambuŋi kambuŋi yeŋön kewö qesiba jiget, “Mewögöra nini mönö denöwö ahinga dop kölma?”

¹¹Qesiba jigetka kewö meleŋnök, “Kunŋan maluku yahöt memba maljawi, yaŋön mönö mietköreŋök kun mi malukuŋi qahö i waŋgima aka denike yeŋön neneŋinambuk maljei, yeŋön mönö mewöyök neneŋini qahö yeŋgöra mendeŋ eŋgime.”

¹²Takis meme azi tosatŋan mewöyök o melun mem eŋgimapkö kaba qesim waŋgiget, “Böhi, neŋön mönö denöwö ahinga dop kölma?”

¹³Qesim waŋgigetka jii mötket, “Gawmanöŋ takisgö jim kutum eŋgii ahözawi, dop mi mönö qahö oŋgita meme.”

¹⁴Yarö azi tosatŋan mewöyök qesim waŋgiget, “Niniato? Neŋön denöwö ahinga dop kölma?” Qesim waŋgigetka kewö jii mötket, “Kungöreŋ moneŋgöra kuŋguba upetkupet aka kiom kude kölmemö, nanŋini töwaŋini memakzei, miambuk mönö urumohok aka ösöŋ malme.”

¹⁵Ambazip pakpak yeŋön “Jonöŋ Amötqeqe Toŋi Kraist akapuk,” jiba uruŋinan mewö mötmöriget. Miaŋgö könaŋi mötpingö kezapŋini köröpŋi aket.

¹⁶Mewö aketka Jonöŋ körek yeŋgöra kewö jiyök, “Nöŋön o töhönöŋ melun mem eŋgizalmö, azi kukösumŋi köhöikŋi kun kama. Yaŋgö kukösumŋi öŋgöŋgöŋan mönö nöŋgöreŋ oŋgitma. Yaŋön azi öŋgöŋgöŋi akŋawaŋgöra nöŋön yaŋgö köna esuŋaŋgö kösöŋi bauköba pösatmamgö qötötaŋgömam. Yaŋön mönö Uŋa Töröŋi uruŋine ali könöp bölamŋan köl könjörat eŋgiiga mewö miaŋön melun mem eŋgima.

¹⁷Yaŋön ölŋi aka kamböŋi mendeŋ etkimamgö sapakŋi memba kaŋgota uba qöröreŋgöba kewötma. Kewöta wit kötŋi tokoba köweŋe almapmö, kamböŋi aka gwaugulapŋi mi mönö usuŋniga könöpnöŋ geba teteköŋi qahö jema.”

¹⁸Keu mewöŋi mewöŋi gwötpuk toroqeba jiba uruŋini kuŋguba Ölöwak Buŋa ambazip kambu yeŋgöra jim asariba malök.

¹⁹Malökmö, gölme bahöŋaŋgö kiŋ Herod yaŋön datŋaŋgö anömŋi qetŋi Herodias mi ölöŋ meyök aka bölöŋi könaŋi könaŋi aka malöhi, miaŋgö sapŋi Jonöŋ qeba munjurariga jim waŋgiyök.