San Lucas 3:3-19

³Ne Juany gudeedbɨ irate de guɨdx ni ná gax ruu gueeu Jordán ax raipbɨ de bniety dec ná par yialaazdeb pur de xtulddeb ne irubniszadeb te gún Dios perdón laadeb.

⁴Ziy xquel guc cumplir de diidx ni bcuaa profet Isaías, te pur laab bcuaab: Ríeny rsee tuby bniety ni rbɨxtia nez lo yiubiz rut quɨt tu rbezti ax rniib: “Gulganzaac nez xte Xtadnɨ. Gulxal tuby nezldí.

⁵Gulcha irate de barranc ne gulgaany tubylo irate rut ná de dany ne de lóm, ne gulgaany tibyldí de nez ni ná teeb. Chiy gulgaany tibyldíza lo de nez ni nadxab.

⁶Ne irate bɨnguɨchliu sniádeb ni ixiaald Dios par gacné dunnɨ.”

⁷Chi bdiia de bniety par itiubnis Juany laadeb, laab raipbɨ laadeb: —¡Xípalza zecpacza de béeld vivtɨ! ¿Tú gudixtee lot par ldát lo castiguroo ni abdzɨngax?

⁸Gulbány zacru par yíany dec guldípactɨ rialaaztɨ pur de xtuldtɨ. Ne quɨt gaiptit de saat: “Dunnɨ nan xfamily to Abraham”, te pur nare rniia laat axt de guiaré zelee gún Dios de xfamily to Abraham.

⁹Ne de bniety ni quɨt nabány xnez Dios zec ni riáld, laany zunnény laadeb zec ni runné de bniety tuby yag chi aquɨtru rca frut loni ax rtiuudebni par chaaicquini.

¹⁰Chiy de bniety gunabdiidxdeb Juany: —¿Xa xquel riáld idxannɨ?

¹¹Juany cuaibbɨ lodeb: —Ni nap tiop gamilly, ná par ideedbɨ tubyni elquɨ ni quɨt rápni. Ne ni ráp zieny comid, ná par ideedbɨ duudxni elquɨ ni runlieedxni.

¹²Néza duudx de bɨny ni run cobrɨ xte impuest bdzɨndeb par irubnisdeb, ax gunabdiidxdeb Juany: —Maistrɨ, ¿xa xquel ná par idxannɨ dunnɨ?

¹³Chiyru raipy Juany laadeb: —Quɨt gúntit cobrɨ mazru guyally que ni rnii de ni rnabee laat.

¹⁴Ne ziyza duudx de suldad gunabdiidxdeb Juany: —Chiy dunnɨ, ¿xa xquel ná par idxannɨ? Ax raipy Juany laadeb: —Quɨt idzɨcátit xixten bniety, quɨt icuaquiatit dixú bniety ni quɨt ráp duld. Ne gulyáan cunformɨ zecti ni runtɨ gan.

¹⁵Ne de bnietqui ójla laadeb yiub gacbeedeb la Juaniy ná Crist.

¹⁶Per Juany raipbɨ iratedeb: —Nare rtiubnisa laat cun nis. Per zeed tuby bniety ni itiubnis cun Spíritu Sant ne cun bal. Laany mazru napny guelrnabee que nare, ax niclɨ lo xcurachny quɨt riáldtia ixaicquia te pur mazru sacny que naa.

¹⁷Ne zec chi ría trigu ziy gúnny cun bniety. De bniety ni nabány xnez Dios siáldny laadeb lo guelrnabee xtenny. Chiy de bniety ni quɨt nabány xnez Dios ax siáldny laadeb lo bal ni quɨt chúuti dxi yiuu.

¹⁸Zeec xquel guniné Juany laadeb, ne cunru zieny de diidx xquel blɨdxbɨ laadeb par gudixteeb lodeb de didxzaac xte Dios.

¹⁹Ne ziyza gudildnéb rey Herodes, te pur Herodes rbeznéb Herodías chial betsbɨ Liby ne ziyza pur de cos malru ni abaany Herodesqui.