Luk 3:3-19

³Godigo po Jonbolo ola mobaso, Jon aga te pabo ąį nogi Jordan sesege bulu dabeba pali. Agai te bulu we bidi dabebolo po pusuyu, tama te po wali, “Dagego dwai sę eboba tudi ilama, dage tigidali baptais sao, tama Godigo dagego dwai sę yali gegeda palomainu,” tama po pusudu geani.

⁴Jongo yali sę te Godigo po pusali profet bidi Aisaiago polobadu bukude asęani yaligia te ebao. Aisaiago te polobadu bukude asęyu, tama te po wai dao, “Te bidi me deligo bidi meni yai bulu tomode i udubao, ‘Genuai Bidi asobo tų geselao. Aga bilabo tų dolo mu nigao.

⁵Tigidali odogo dabe mu pągąnao. Tigidali bobiabi dabe du dabe kigila palao. Gagila bilai tų dabe me dolo ma dodolao.

⁶Tigidali we bidigo Godigo olo hobede elama, tau sabo kolesaga augwa gedugo sueibao,’” te Aisaiago te po polobadu asęai dao.

⁷Tama we bidi hauwa mu Jon agai augwali baptais momainu Jon aga pageba beasagasali. “Dage dwai hasamani dabe,” agai augwalibolo te po wali. “Godigo dage dali yabo sębęde dage sana pagameo po tego dagebolo waliwe?

⁸Dagego dwagi yai sę ebo sulama, dagego dwai sę dabe tudiba sąwai yabao po waibao, te gasa bidigo te po waibao. ‘Abraham da dago wąį mu da, dago dwai sę meni,’ te homu ebo gagali igimio. Eno dagebolo megi mu po tama obe dao. Godigo e elewi dabego Abrahamgo bulai wąį hani sibi nigilabo homu eyu da, te agai tegi dao.

⁹Ni gelabo bidigo te ni tigide sae ilama, te sae nide hwą munalubaso da, te ni tamadi tama gelaibao homu yaibao. Ni dabe du gesego walisiąwani ni dabe da, gelama, isiba sąwaibao. Dage te tobage sae ilali ni tiwai dao,” Jongo te po wai.

¹⁰Te bagego agabolo hanalu wali, “Dago megi magi sę egowe?”

¹¹Jon agai te poba wei ponoyu, te po wali, “Holobo ugwa si munalubo bidigo me deli te holobo ugwa meni yai bidibolo mao. Me tubo nai munalubo bidigo me te meni yai bidibolo dobayao,” Jongo te po wali.

¹²Takis sesa bilibo bidi dabe me badu Jon pageba te baptais sainu asama, hanalu wali, “Po ola mabo bidi, dago magi yagawe?” wali.

¹³“Te takis mone sa wali gilama dolo tama naga weli pelama siyu, te dagego homugo edelama obanu sigi pigimio,” Jongo te po wali.

¹⁴Enesigi bidi dabe me badu Jon pageba asama, hanalu wali, “Da da, magi yaliwe? Dago da magi egowe?” Jongo augwalibolo te po wali, “Dagego gasa bidigo mone bomo elama, sigimio, me tibo po tų elama, sigimio. Duga mabo mone deli naga sabo homu elasa siąo,” wali.

¹⁵Te we bidigo bugai homu mu hodolali. Augwaligo homugo Jon te Godigo we bidi tau somai hagede sa muani bidi Krais yaliwe homu yali.

¹⁶Tama tibaso, Jongo augwali tigidalibolo te po wali, “Eno dage da ąįgo naga baptais mobao. Tiali goli ena ela holai bidi deli nosali asobao. Eno agai sągą nadoba pedabo me usu me egobe. Tama te bidi agai te Godigo Tedali Mobo Bidi dage me badubolo mawaibao, te baptais mabo tiwai. Agai dage me badubolo sia mawaibao, te baptais mabo tiwai.

¹⁷Nai dagalobo bidi aga savol selama, tubo nai wit ge dali sabea dali si dagalaibao. Tilama, aga te nai ge naga aga beba muyu, sabea naga te siaba muaibao. Tama te nosali asobo bidi agai te we bidi dagalu me te hasi yaibao, augwali me badu agai te sula sisąbo siaba mawaibao,” Jongo te po wali.

¹⁸Te hauwa sogo haniani tųdu Jongo dwagi yai poba asiąo nama, te Godigo po pusubo sogo agai mobo maduali, te we bidibolo, dwai ebo kolesaga hasegelemai hagede Jongo tama odualio.

¹⁹Tiali goli, Jongo pogo gavman tobolu bidi Herot guni pagede mu ela paludali. Te magi baso menio. Aga amago we Herodias aga dagala selama, me hauwa sogo dwai dwai sę mu iduali.