Luke 3:3-19

³Kel John-el angka Akngey-wenh awew, rap ilpay Jordan-el-antey alhenh, rap angka ilerl-apenh akngerr ingwer-rnemew alakenh: “Arrantherran amperrngerrenh-arey, apmwethey angkeperrenhey-alpenh-arey! Arrantherr iterrenh-arey, arraty-angkwarr Akngey-warl-athek anaynteyew! Akngey rap apmwa ingkerr arrewantherrenh irrarlkem. Atharl arrenhantherrenh baptise-emelem kwaty-warl, ingwer-rnemel areyew, arrantherr apmwewety angkeperrenty!” Alakenh-anyem John-el ingkerrenh ilenh.

⁴Nhenhan angka irrkaty-antey John-akert, Isaiah-el pip-warl ingkwernew awank-akerr. Ranap angkakert Akngey-wenh, rap alakenh ingkwernew: “Artwa anyent apmer arlpawel ament-areny arlkeyel-anem alakenh, ‘Arrantherr iwerr arratyelenh-arey, Ingkart anewantherrenh rarl apetyeyenhew!

⁵Alakenh-apeny wenh! Atwaty-atwaty ingkerrenh ahernel artem! Apwert arrpanenh akalthemel ilperr-ilperrelemel! Iwerr amper-amper-rnem-then arratyelemel! Iwerr ikert-ikert-rnem-then alyelkelemel!

⁶Ingkerrelan aley ingwer-ingwer areyenh-anem, rap apmwa akngerr-wety irrarlkeyenh.’” Alakenh-anyemarl Isaiah-elan pip-warl ingkwernew John-akert.

⁷Akngerr akarrerrenh John-warl apmer arrpanenh-they, ra renh-rnem kwaty-warl baptise-emel-aynteyew. John rap ikwer-rnem angkew, “Arrantherr irrtywerl-amperney-angker-rnem! Arrantherr apmwel-ayeth apmwel-ayeth apek alakenh iterreyel: ‘Anantherran Akngey-wenh-angkwarr alheyel. Anantherran kwaty-warl baptise-emelenty, Akngeyelanap anenhantherrenh apmwa antwey-angenh.’ Arrangkwaw! Apmwel-ayetharl aneyel-rnem, Akngeyel renh-rnem ikwer-wety arleng irrentem. Arrantherran apmwel-ayeth anenty, Akngeyelan arrenhantherrenh-anem arleng irrentem intem-antey.

⁸Apmwel-ayetharl alheyel-penh, arraty-angkwarr-anem alhaynteyew. Apmwewety angkeperrenhey-alpenh-arey, Akngeyel areyew, arrantherrarl aneyel arraty-angkwarr. Arrantherr alakenh angkeyel: ‘Anantherran Abraham-wenh-antey awank-akerr-penh. Akngeyel Abraham arntarnt-arenh, rap anenhantherrenh arleng ikwer-wety thweney-angenh, arrangkw.’ Arrantherr apmwel-ayeth iterreyel! Akngey ilkelhenty, ran Abraham-wenh-rnem apwert nhenh-rnem-they arnwarnewerr arrewantherr-wety. Rap arrenhantherrenh intem-antey irrentem. Nhan inngarl!

⁹Rlengkan Akngey mpwelheyel, apmwernem rwewarl iweyew. Rernem arwerl amern apmwakert-apeny. Arwerl nhelkwer anantherr arternemarl, rwewarl iwemel. Alakenh arrewantherr irrewerr, arraty-angkwarr Akngeyew alhemer!” Alakenh-anyem John ikwer-rnemew angkew.

¹⁰Rernemarl awewel, ayernew-anem, “Nthakenh irrem anantherr, arraty Akngeyew anaynteyew?”

¹¹John-el tyernew, “Arrantherr arnkwa atherr atnyeneyel, anyentan ingwerentyakew arnkwewenyew anthenh-arey. Arrantherr amernarl atnyeneyel, ingwerentyakew amern-wenyew antherreynemel.”

¹²Artwernem apwert akarreley-angker-rnem apetyew John-warl. Rernemap apwert kapmentew akarrelenh. Rernem apetyew ikwer-warl, ra renh-rnem kwaty-warl baptise-emeleyew. Rernemap ayernew, “Nthakenh irrem anantherr, arraty Akngeyew anaynteyew?”

¹³Ra tyernew, “Apwert akngerr akngey-angenh ingwer-rnem-wety. Apwert akngenherr-arey, kapmentelarl ilanthew-angkwarr.”

¹⁴Artwa ahawarr-rnem-anem apetyew John-warl, rernemap ayernew, “Nthakenh irrem anantherr, arraty Akngeyew anaynteyew?” John-el tyernew, “Pwerep-anthey-angenh ingwer-rnem, rernem apwert antheyew. Ingwer-rnem iley-angenh, ikwer-rnemew nga irrtyertel angkem apek, rerneman apwert antheyneyew. Apwert akngerr angwarey-angenh. Arrantherr apwert-akert inkwerelhemel anerl-anemer, arrewantherrew-arteyelarl warrk-penh anthew-akert.”

¹⁵Ingkerrel awew, John-arl angkenh, rernemap inkwerelhemel iterrenh-anem, “Artwa nhenh apek Akngeyelarl thwenew ahern nhenh-warl.”

¹⁶John-an ingkerrew angkew, “Arrangkw. Ayengan artwa ingwerarl. Atha arwa baptise-emeley-angker kwaty-warlant. Rlengk-penh-antey ranem apetyeyel, ayeng-apeny-wenyarlap ran. Ayengan warrkenh akelyarl, ranem atyetyart ilkwarl. Atharl kwaty-warl arrenhantherrenh baptise-emeley-angker. Ranap arrenhantherrenh irrarlkey-angker Inweng Mwerr-angkerelarl, rwelarl apmwamwam irrarlkemel ampem-apeny.

¹⁷Angka atha arrewantherr ileyew. Anantherran ingkerrenh ntang-apeny. Arrantherran iterl-areyel, arelhelarl ntang aympernem-apeny. Ra ntang mwerr-angker tyampet-warl arrerneynem, ingwer-ingwer arlkwaynteyew, irrnya ntang-penh rwewarlarl iweynemel. Alakenh-anyem artwa ran apetyeyenh, ranap mwerr-rnem-then apmwernem-then amentew-amenteleyenh. Ran mwerr-rnem aleth-antey atnyeneyenh, rap apmwerneman rwewarl iweyenh, aletharl ampeyel-warl.”

¹⁸Alakenh-anyem John-elan ingkerrenh ilenh. Rap aleth-antey angka mwerr-angker Akngey-wenh ilenh, rernem Akngey-warl-athek angkeperrenhey-alpeyew.

¹⁹John-elarl akalty-anthenheng-arey, artwa atyetyart Herod-an apmwel-ayeth anenh. Rap anentyikw ayteyikw-wenh rakew, itna Herodias. Ra ikwer amentew atnyeneyew. Ayteyikw ikwerenh itnan Philip. John-elan alakenh Herod iltew, “Ntwan apmwel-ayeth ayteyewengkw Philip-ew arnwarnew! Ilekewarl ntwa arelh ayteyengkw-wenhan rakew?” John-elan Herod iltenh, rarl aleth-antey apmwelhelenh.