San Lucas 3:3-19

³Jayave Juan uguata ico opaete ɨãca Jordán iyɨpɨ rupi. Jare umɨmbeu opaete vae pe ueya vaerã iyemɨngueta icavi mbae vae ipɨa pe oĩ vae jare uyembɨbautizaca vaerã, Tumpa umbɨasa vaerã chupe reta imbaeyoa reta.

⁴Isaías co jae penti Tumpa iñee aracae umɨmbeu vae. Jae uicuatía cuarãi: “Jae iñeeãta reve jeita ñana rupi: ‘Piyapɨcatu yandeYa japerã. Pemɨsɨmi tape’ —jeita—.

⁵‘Opaete jugua reta uñemɨtɨneeta ɨvɨ pe. Jare opaete ɨvɨtu reta uyeyapota ñuu rami. Jare tape ipãri vae reta uñemɨsɨmicata. Jare tape quɨpe quɨpe vae reta ipecavita.

⁶Jare opaete vae uicuaata quirãi Tumpa ipuere upurumbɨasa.’ ” Jucuarãi uicuatía Isaías.

⁷Jare jeta vae yugüeru Juan oĩ vae pe uyembɨbautizaca vaerã. Jayave Juan jei chupe reta: —Pe reta co jae mboi reta rami. ¿Quía pa umɨmbeu peve piyerova vaerã Tumpa cotɨ agüɨye vaerã Tumpa uiporaraca peve? —jei—.

⁸Piyapo icavi vae, jucuarãi picuaaca vaerã añetete peeya co piyemɨngueta icavi mbae vae pepɨa pe oĩ vae. Agüɨye pere piyupe pepɨa pe: ‘Yandetenondegua co jae Abraham.’ Echa'ã che jae peve cua: Tumpa ipuere uyapo cua ita reta güi Abraham iñemoñaa retarã —jei Juan chupe reta—.

⁹Yamɨjaanga penti temitɨ. Temitɨ ía icavi'ã yave, iya uyasɨa japo reve jare uapɨ. Jae ramiño vi piyapo'ã yave icavi vae, Tumpa uiporaracata peve —jei.

¹⁰Jayave joco pe ñugüɨnoi vae reta upɨrandu Juan pe: —¿Mbae pa nduyapota?

¹¹Jayave Juan jei chupe reta: —Ime yave quía mocui temimonde güɨnoi vae, tumee penti mbaetɨ temimonde güɨnoi vae pe. Jare ime yave quía jeta tembíu güɨnoi vae, tumee mbaetɨ tembíu güɨnoi vae pe —jei.

¹²Yugüeru vi Juan oĩ vae pe mburuvicha peguarã ocovara vae reta uyembɨbautizaca vaerã. Jae reta upɨrandu Juan pe: —Oporomboe vae, ¿mbae pa nduyapota?

¹³Jayave Juan jei chupe reta: —Agüɨye ma pembɨasa pecovara mburuvicha reta peocui vae güi.

¹⁴Sundaro reta vi upɨrandu Juan pe: —¿Mbae pa nduyapota? Jayave Juan jei chupe reta: —Agüɨye pemumburu ĩru vae reta jare agüɨye peapu ĩru vae reta re. Jare agüɨye jecuaeño pipota jeta peruvicha reta umbɨepɨ peve vae güi.

¹⁵Opaete vae uãro ñugüɨnoi Cristo ou vaerã, jare ipɨa pe uyemɨngueta quirãi aramoi Juan co jae Cristo.

¹⁶Jáeramo Juan jei chupe reta: —Che pumbɨbautiza ɨ pe. Ẽrei outa ipuere ete chegüi vae. Jupi'ã co che ayora vaerã ipɨpasa ichã. Jae pembɨbautizata Espíritu Santo pe jare tata pe —jei—.

¹⁷Jae co trigo uipoo vae rami. Echa'ã trigo uipoo vae umbɨveve trigo uequi vaerã ɨtɨ. Jayave uñuvatu trigo jɨru pe. Ẽrei uapɨ ɨtɨ tata pe. Tata Cristo uiporuta vae opa mbae vae co —jei.

¹⁸Jare Juan jeta jei chupe reta umɨmbeu vaerã chupe reta ñee icavi vae.

¹⁹Jare mburuvicha guasu Herodes umenda tɨvɨ Felipe jembireco Herodías jee vae ndive jare uyapo jeta mbae icavi mbae vae. Jare Juan iñeengueta Herodes pe opaete icavi mbae vae uyapo vae re.