Luku 3:3-19

³Kutu pieke handaata꞉ Dionima꞉ mo Diodani ikali tea꞉na꞉ wieke yu paeyao pa꞉ta꞉ Koda꞉na꞉ pi latiki pomuolo hata꞉ alota꞉ Wanda꞉halio. Iki paeyaoma꞉ ika꞉ amba꞉ pimi haumanu make ika꞉ honemanu make la꞉ka꞉la꞉ minaata꞉ bapitaisi peano lapa꞉peke. Koto haumanu ota꞉ pimika꞉na꞉ta꞉ kota꞉ Koda꞉ma꞉ ika꞉ pimi haumanu paeyaosiki paeyaaso hata꞉ paa na niminaalieke leekeme.

⁴Koto Dionima꞉ pieke ekita꞉ amba꞉ titina꞉ Koda꞉na꞉ pi la halo hayeke hali ma꞉nda꞉ bikita꞉ Aisaya ipikana꞉ma꞉ bukana꞉ wape pea ula꞉ ekita꞉ dupa la꞉la꞉me. Hali ma꞉nda꞉ma꞉ hapupapeke alena꞉ hata꞉ wi laa dupiki pi ala꞉me. Tekehalina꞉ pota꞉ tikitiki yao wia꞉pa꞉peke. Ipiki epeke tupa꞉ epena꞉ mo ipika꞉ pota꞉ wamo peao mea tikitiki yao epeapa꞉peke.

⁵Kutupata꞉ mo hawete manuta꞉ mea tumbapa꞉peke. Mo yu elimanu make mo potemanu make paeyao ao tumbaota꞉ mandake pina꞉ lapa꞉peke. Kutu pitolo hata꞉ mo pota꞉ hoihoi pa꞉la꞉ ekimanu make ota꞉ epeke tupa꞉ tikitikina꞉ mea epeaaso hata꞉ mo hana꞉manu pota꞉na꞉ wekila꞉la꞉ ekimanu make ota꞉ epeke tupa꞉ tikitiki yao epeapa꞉peke.

⁶Kutu pimikina꞉ta꞉ kota꞉ wanda꞉hali paeyaoma꞉ Koda꞉na꞉ kita꞉la꞉ da꞉ta꞉la꞉eki handilimikie laa la꞉la꞉me leekeme.

⁷Koto dina꞉ta꞉ wanda꞉hali wotuma꞉ Dionima꞉ iki bapitaisi peaena꞉yeke paeyao epemekeme. Kutu pimiki handaa Dionima꞉ koto wanda꞉hali pa꞉ta꞉ alota꞉ Ikita꞉ ketomanue. Ikita꞉ Koda꞉ma꞉ teke pa꞉ta꞉ epena꞉ lolo pa꞉la꞉ mineke panka꞉la꞉ ekita꞉ wonduluekema꞉ hamena꞉ laa ma꞉nda꞉ epita꞉ pindipa pelimiki pita꞉ epima꞉ kinki pa꞉la꞉pe.

⁸Ika꞉ pimi hoke haumanu paeyao amba꞉ hoki waleme ekina꞉ wanda꞉halima꞉ handena꞉ mo epeke kiliki a꞉ela꞉ tima꞉ pa꞉la꞉eki pina꞉ epeke haumanu pea꞉pa꞉peke. Koto ekina꞉ta꞉ ikana꞉ma꞉ Nika꞉ meita꞉ Eipoloha꞉ma꞉e laa kutupiki pimanu na lapa꞉peke laata꞉ Dionima꞉ iki pa꞉ta꞉ alota꞉ Opua꞉pe. Koda꞉ma꞉ do toopimanu meaata꞉ Eipoloha꞉ma꞉na꞉ mondu semba꞉lala꞉ wanda꞉hali ana꞉na꞉ wepia haena꞉ lapeke ya꞉la꞉me alome.

⁹Hande hapula꞉ ti manuna꞉ teke pa꞉ta꞉ pokuluekema꞉ manda꞉ meaowa꞉me leekeme. Epeke kiliki na a꞉eya꞉la꞉ timanu paeyao siki poko lopaota꞉ ti talo hala꞉ pa꞉ta꞉ paeyao siki mu yankilieke leekeme.

¹⁰Do pimanu opua mo wanda꞉halima꞉ Dioni pa꞉ta꞉ lota꞉ pitolo hata꞉ alota꞉ Kota꞉ nikana꞉ma꞉ta꞉ eki hau peomonope lemekeme.

¹¹Dionima꞉ ika꞉ pi hombo peaaso hata꞉ alota꞉ Hali ma꞉nda꞉ma꞉ ipika꞉ dau yaapo wia꞉ka꞉na꞉ta꞉ kota꞉ ma꞉nda꞉ta꞉ mo dau dia꞉ya꞉la꞉ natehali ma꞉nda꞉ pa꞉ta꞉ hala꞉peke. Kutupa make ne napekeeki wia꞉ka꞉na꞉ta꞉ kota꞉ ne dia꞉ya꞉la꞉ wanda꞉halimanu pa꞉ta꞉ telipea hala꞉pa꞉pekee leekeme.

¹²Koto natena꞉ta꞉ mo mandane dakisi mani mu haemeke haliwekima꞉ Dionima꞉ iki bapitaisi peaena꞉ ipiki a꞉pa lota꞉ pitolo alota꞉ Wala꞉la꞉ halio. Nikana꞉ma꞉ta꞉ eki hau piomonope laa lota꞉ pimikime.

¹³Koto lemeke Dionima꞉ hombo peaaso alota꞉ Ikana꞉ma꞉ mo wanda꞉halina꞉ dakisi mani mimika꞉na꞉ta꞉ kota꞉ haka꞉ta꞉pao na miki mo Kapomanina꞉ Lo pima꞉ tombo ula꞉ tupa꞉ mia꞉pa꞉peke leekeme.

¹⁴Mandane ami haliwekima꞉ make a꞉pa lota꞉ pitolo hata꞉ alota꞉ Nikana꞉ma꞉ make ekipiki haumanu peomonope lemekeme. Koto lemeke Dionima꞉ iki pa꞉ta꞉ alota꞉ Ma꞉nda꞉na꞉ mani pake muluekema꞉ paala꞉ tiao o yayapiki ekina꞉ pa hameke la꞉ tiaasa꞉eki ota꞉ na pea꞉pa꞉peke. Kutupa ika꞉ e pokaasemeke kita꞉la꞉ yenkita꞉ ana꞉na꞉ kita꞉la꞉me hone wia꞉pa꞉peke leekeme.

¹⁵Mo wanda꞉halima꞉ koto haumanu paeyao handaata꞉ ika꞉ puki pa꞉ta꞉ hayeke ale tialu baeyeke ekima꞉ta꞉ ikana꞉ma꞉ hone eleke eleke witolo hata꞉ta꞉ do Dionita꞉ hande Ketiso pateya꞉la꞉me laa hone wimikime.

¹⁶Koto ekina꞉ Dionima꞉ iki pa꞉ta꞉ alota꞉ I̱ma꞉ ikita꞉ ikalima꞉ bapitaisi peao halopate hali ma꞉nda꞉ wetepena꞉ ipilia꞉ halita꞉ ota꞉ honkopu wotu hala꞉me. I̱ta꞉ ipiki yaapo ana꞉ pea꞉peke na ya꞉la꞉me. Ipika꞉ anke dake holaapeke make I̱ta꞉ ana꞉ na pa꞉la꞉me leekeme. Ipikana꞉ma꞉ ikita꞉ Holi Sipitidi pita꞉ ti uleke yaapoma꞉ bapitaisi pealieke leekeme.

¹⁷Ipikana꞉ma꞉ mo hande widi kilikina꞉ ambuku napeke yaapo putupa alu puluekema꞉ pana꞉pulu pa꞉la꞉ sa꞉sata꞉ ipika꞉ kikina꞉ miniki hala꞉me. Ipika꞉ widi kiliki epekeeki paeyaota꞉ ipika꞉ widi napeke u hala꞉ da pa꞉ta꞉ momba꞉la wilieke. Pate mo ambuku paeyaota꞉ tina꞉ pana꞉pu yankilieke. Koto tita꞉ na paeyeke pa to halieke leekeme.

¹⁸Mo wanda꞉hali ika꞉ hoke haumanu hoki wala puki hone lekelena꞉yeke Dionima꞉ Koda꞉na꞉ Pi Seliapomanu ota꞉ epeke tupa꞉ la hala꞉tiki pominolo hata꞉ wanda꞉hali sutiatia pua꞉tiki pomiekeme.

¹⁹Koto pa꞉la꞉pate Dionima꞉ mo kapomani hali tieke Hetodi pa꞉ta꞉ la halolo hata꞉ alota꞉ Neketa꞉ hoke haumanu peleme laa la haleekeme. Ekipeke. Hetodi ipika꞉ hamekena꞉ weteke Hetodiasi pa ipika꞉ handa꞉mea make ipikana꞉ma꞉ ti teke wotu yoka꞉tiki pomieke handa leekeme.