San Lucas 3:3-19

³Rdëꞌ Juan ni yúguꞌtë latj nacuáꞌ raꞌ yegu Jordán, runëꞌ lban ca ral‑laꞌ laꞌdíl nis nup tuꞌbíꞌi ládxiꞌgac quië unít lahuëꞌ Dios dul‑laꞌ nabágaꞌquëꞌ.

⁴Guc cni ca naꞌ nayúj lu guich laꞌy yuguꞌ didzaꞌ bëꞌë Isaías, bönniꞌ bëꞌë didzaꞌ uláz queëꞌ Dios, rna: Ryön chiꞌë bönniꞌ rulidzëꞌ lu latj caꞌz, rnëꞌ: “Gul‑páꞌ nöz gdxin queëliꞌ Xanruꞌ. Gul‑bíj li yuguꞌ nöz las tödëꞌ.

⁵Gdzë́ꞌigac yúguꞌtë gap nac rögaꞌ. Luhuöác lachiꞌ yúguꞌtë guiꞌa sib len guíꞌadauꞌ. Lurúj li nöz nayéycj narö́ligac, Atiꞌ luhuöác dxiꞌa nöz guiöj.

⁶Laꞌleꞌi yúguꞌtë bunách Nu naꞌ gsölëꞌë Dios, Nu uslá bunách.”

⁷Catiꞌ gularúj bunách zian quië laꞌdíl nis lu nëꞌë Juan, lëꞌ gudxëꞌ lequëꞌ: ―Lbiꞌiliꞌ, diꞌa dza quecbaꞌ bël sniaꞌ. ¿Nuzxa buluíꞌi lbiꞌiliꞌ gzxundjliꞌ yöl‑laꞌ rusyúdx ziꞌa gac quegac bunách?

⁸Naꞌa, gul‑gún le lac bëꞌ chbubíꞌi ládxiꞌliꞌ len cutu saꞌ ládxiꞌliꞌ, cugnaliꞌ: “Nactuꞌ tsahuiꞌ le nactuꞌ zxiꞌn xsoëꞌ Abraham”, le rëpaꞌ lbiꞌiliꞌ, huac quel‑lëꞌë Dios yuguꞌ guiöj ni len gunëꞌ ga luhuöác zxiꞌn xsoëꞌ Abraham.

⁹Nacliꞌ ca yuguꞌ yag. Chzoa rböz guia huag gchugu yuguꞌ yag. Yúguꞌtë yag cutaꞌbía le nac dxiꞌa, laꞌchuguëꞌ yag naꞌ len laꞌguꞌë leygac lu guiꞌ.

¹⁰Niꞌr gulanabi lëꞌ bunách nacuáꞌ niꞌ, taꞌná: ―¿Nacx gúntsatuꞌ?

¹¹Bubiꞌë didzaꞌ Juan, rëꞌ lequëꞌ: ―Nu dë chop zxey ral‑laꞌ unö́dzj qui nu cudë́ qui, atiꞌ nu dë le gagu, lëzcaꞌ cni ral‑laꞌ quis quegac nup cudë́ le lagu.

¹²Guladxinëꞌ caꞌ niꞌ quië laꞌdilëꞌ nis laꞌquëꞌ bönniꞌ tuꞌquizxjëꞌ lazgac bunách uláz qui yödz ziꞌtuꞌ, atiꞌ gulanabnëꞌ lëꞌ, taꞌnë́ꞌ: ―Bönniꞌ usëdi, ¿nacx gúntsatuꞌ netuꞌ?

¹³Juan gudxëꞌ lequëꞌ: ―Cutu uquizxjrliꞌ tsca le chgna béꞌinëꞌ lbiꞌiliꞌ bönniꞌ uná bëꞌ.

¹⁴Gulanabnëꞌ caꞌ lëꞌ laꞌquëꞌ bönniꞌ rjaquëꞌ gdil‑l, taꞌnë́ꞌ: ―¿Nazx netuꞌ, nacx guntuꞌ? Juan gudxëꞌ lequëꞌ: ―Cutur gun gádxiliꞌ nitú bunách quië cúaliꞌ le dë qui. Cutur gnëliꞌ quegac bunách le cunácz quië gunliꞌ ga laꞌguízxj lbiꞌiliꞌ, san gul‑dzág ládxiꞌliꞌ tsca razxjliꞌ.

¹⁵Taꞌzáꞌ ládxiꞌgac bunách naꞌ taꞌbö́z Nu naꞌ ral‑laꞌ gsölëꞌë Dios, chquiꞌ naquëꞌ Juan naꞌ bönniꞌ lëꞌ Cristo.

¹⁶Bubiꞌë didzaꞌ Juan, gudxëꞌ yúguꞌtëꞌ, rnëꞌ: ―Le nactë nedaꞌ ruquilaꞌ lbiꞌiliꞌ nis, san zëꞌë bönniꞌ gunëꞌ le ruluíꞌz yöl‑laꞌ rdil nis ni, gchiziëꞌ lbiꞌiliꞌ Dios Böꞌ Laꞌy len le nac guiꞌ queëꞌ. Bönniꞌ ni naprëꞌ yöl‑laꞌ uná bëꞌ ca nedaꞌ, atiꞌ nedaꞌ cutu nacaꞌ lsacaꞌ gleycjaꞌ lölëꞌ nudë́ꞌë.

¹⁷Zönëꞌ lu nëꞌë bcöꞌ queëꞌ atiꞌ ulubëꞌ ga rlub zxoaꞌ xtil queëꞌ, lë ni ruluíꞌ le gac quegac bunách. Utubëꞌ zxoaꞌ xtil, len cuꞌë lei xlatji, san bëb qui uzéguiꞌë lu guiꞌ le gatga ul.

¹⁸Ca nacgac didzaꞌ ni len yelaꞌgac zian didzaꞌ le bchiziëꞌ icj naggac bunách, benëꞌ lban Juan lauquëꞌ qui didzaꞌ dxiꞌa.

¹⁹Juan naꞌ buquíëꞌ Herodes, bönniꞌ rna bëꞌë, le zóalenëꞌ‑nu Herodías, ngul queëꞌ Felipe, bönniꞌ böchëꞌë, lencaꞌ le runëꞌ zian le cunác.