Lɩɩʋ 3

1

2

3

4

5

6

7

8

9

10

11

12

13

¹Wɑɑtʋ ɩnɩ tɔ nɑ Moisi nɑ́ɑ́ tɔŋnɑ ɩ yǝtɩ Mɑtiyɑŋ kɔtʋlʋ Yetulo tɔlɑ tiikuɣu. Ḿpʋ́ɣʋ́ kʋyɑkʋ nɑkʋlɩ ɩ tiikɑɑ nɑ ɩ́ tɑlɑ Ɩsɔ pʋɣʋ ŋku pɑ yɑɑ sɩ Holɛpʋ tɔɣɔ wʋlɑɣɑ tɛtʋ wɑɑlɩ.

²Tǝnɑɣɑ Tɑcɑɑ tillu lɩɩ ɩ tɔɔ kɛ́ tiikɑ kʋlɔpɑɣɑ ŋkɑ kɑ mʋɣɩ kɔkɔ tɔ kɑ tɑɑ. Ɩ pɑɑsǝnɑ teu, ɩlɛnɑ ɩ́ nɑ́ sɩ kɔkɔ mʋɣɩ yɑ́ɑ́. Amɑ tiikɑ mɑɣɑmɑɣɑ ɩɩ nyɑkɩ.

³Ntɛnɑ ɩ́ tʋ́ ɩ tɑɑ sɩ ɩ kɑ́ kpǝtǝnɑ teu nɑ ɩ́ nɑ́ piti tɔm ntɩ sɩ ɩsǝnɑɣɑ pǝ lɑpɑ nɑ kɔkɔ mʋɣɩ tiikɑ nɑ kɑɑ nyɑkɩ.

⁴Ɩsɔ nɑwɑ sɩ ɩ cɑɑ kpǝtǝnɑʋ, ɩlɛnɑ ɩ́ yɑɑ kɔkɔ ŋkɛ kɑ tɑɑ sɩ: Moisi Moisi. Nɑ Moisi cɔ sɩ: Mɑ nɩɩwɑ.

⁵Mpʋɣʋlɛ Ɩsɔ tɔmɑ-ɩ sɩ: Tɑɑ kpǝtǝnɑ tiikɑ ŋkɛ yoo. Wɔɣɔsɩ nyɑ́ ntɑnkpɑlɑ. Mpi tɔ, Ɩsɔ tɛtʋ tɔɔ kɛ́ n sǝŋɑ mpʋ.

⁶Mɑɣɑlɛ nyɑ́ cɑɑnɑɑ cɑɑnɑɑ Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ. Sɔɣɔntʋ kpɑ Moisi, ɩlɛnɑ ɩ́ tɑkɩ ɩ ɩsɛntɔɔ sɩ ɩ́ tɑɑ nɑ Ɩsɔ.

⁷Ntɛnɑ Ɩsɔ tɔ sɩ: Mɑ nɑwɑ ɩsǝnɑ mɑ yǝlɑɑ tɔkɩ kʋnyɔŋ kɛ Icipiti tɔ. Pǝyǝle mɑ nɩɩwɑ wulɑ nnɑ pɑ ŋmɑkǝllɑɑ tʋɣʋ-wɛ tɔ. Mɑ nyǝmɑ́ pɑ wɑhɑlɑnɑɑ tɔɔ.

⁸Pǝ tɔɔ kɛ́ mɑ tiiwɑ sɩ mɑ cɛkɩ-wɛɣɛ Icipiti nyǝ́mɑ niŋ tɑɑ, nɑ mɑ́ ponɑ-wɛɣɛ tɛtʋ kʋpɑntʋ nti tǝ wɑlɑɑ nɑ tɔɣɔnɑɣɑ nɑ kʋpɑntʋ tǝnɑ tɔlɑ yem tǝhɔ tɔ tǝ tɑɑ. Kɑnɑɑŋ nyǝ́mɑ, nɑ Hiti nyǝ́mɑ, nɑ Amolii nyǝ́mɑ, nɑ Filiisi nyǝ́mɑ, nɑ Hifi nyǝ́mɑ, nɑ Yepusi nyǝ́mɑ, pɑ cɑɣɑnɑ tǝ tɑɑ.

⁹Mɑ nɩɩwɑ Ɩsɛɣɛlɩ nyǝmɑ wulɑ, pǝyele mɑ nɑwɑ yɑɑsi wei Icipiti nyǝ́mɑ ŋmɑkǝlǝɣǝnɑ-wɛ tɔ.

¹⁰Mpʋ tɔ, mɑ tiliɣi-ŋ Icipiti wulɑʋ tɛ́ sɩ ń polo nɑ ń lǝsɩ mɑ yǝlɑɑ Ɩsɛɣɛlɩ nyǝ́mɑ kɛ Icipiti tɑɑ.

¹¹Mpʋɣʋlɛ Moisi cɔwɑ Ɩsɔ sɩ: Mɑɣɑlɛ ɑwe nɑ hɑlɩ mɑ́ɑ́ puki Icipiti wulɑʋ kiŋ sɩ mɑ lǝsǝɣɩ Ɩsɛɣɛlɩ nyǝ́mɑ kɛ Icipiti tɑɑ?

¹²Kɛlɛnɑ Ɩsɔ sɩ: Mɑɑ wɛɛ nyɑ́ wɑɑlɩ. Nɑ mpi n kɑ́ nyǝnɑ sɩ mɑ́ tiliɣinɑ-ŋ tɔɣɔlɛ sɩ, n kɑ́ lǝsɩ Ɩsɛɣɛlɩ nyǝ́mɑ kɛ Icipiti nɑ nyɑnɑ-wɛ ɩ́ kɔɔ nɑ ɩ́ sɛɛ-m pʋɣʋ kʋnɛ kʋ tɔɔ cǝnɛ.

¹³Ntɛnɑ Moisi sɩ: Pǝ wɛ teu, ye mɑ polɑɑ nɑ mɑ́ mɑɣɑnɑ-wɛ, nɑ mɑ́ heeli-wɛ sɩ pɑ cɑɑnɑɑ Ɩsɔ tilinɑ-m pɑ wɑɑlɩ. Ɩlɛ pɑɑ pɔɔsɩ-m nyɑ́ hǝtɛ, ɩlɛnɑ mɑ́ cɔ-wɛ suwe?

¹⁴Mpʋɣʋlɛ Ɩsɔ cɔ-ɩ sɩ: Mɑ hǝtɛ ntɛ́ Mɑwɛtɑm. Mpʋ tɔ, ń polɑɑ ɩlɛ n heeli-wɛ sɩ: Tɑmwɛɛlʋ tilinɑ-m mǝ wɑɑlɩ.

¹⁵Nɑ ń cuɣusi sɩ: Mǝ cɑɑnɑɑ cɑɑnɑɑ Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ Tɑcɑɑ tilinɑ-m mǝ wɑɑlɩ. Mɑ hǝtɛ ntɛ́, hɑlǝnɑ ɑntulinyɑ polo nɑ ɩ́ kʋlɩ. Hǝtɛ ntɛɣɛ yǝlɑɑ kɑ́ yɑɑkɩ-m pɑɑ wɑɑtʋ wei.

¹⁶Tɔʋ, polo pǝnɛntɑɑ nɑ ń koti Ɩsɛɣɛlɩ sɔsɑɑ nɑ ń heeli-wɛ sɩ: Mǝ cɑɑnɑɑ cɑɑnɑɑ Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ Tɑcɑɑ lɩɩ mɑ tɔɔ nɑ ɩ́ heeli-m sɩ ɩ nɑ-mɛ nɑ ɩ nyǝ́mɑ ɩsǝnɑ pɑ ŋmɑkǝlǝɣɩ-mɛ tɔ.

¹⁷Nɑ ɩ tʋ́ ɩ tɑɑ sɩ ɩ lǝsǝɣɩ-mɛɣɛ wɑhɑlɑ tɛtʋ tɑɑ cǝnɛ nɑ ɩ́ ponɑ-mɛɣɛ Kɑnɑɑŋ nyǝ́mɑ, nɑ Hiti nyǝ́mɑ, nɑ Amolii nyǝ́mɑ, nɑ Filiisi nyǝ́mɑ, nɑ Hifi nyǝ́mɑ, nɑ Yepusi nyǝ́mɑ pɑ tɛtʋ tɑɑ, timpi tɔɣɔnɑɣɑ nɑ kʋpɑntʋ tǝnɑ tɔlɑ yem tǝhɔ tɔ.

¹⁸Ye pɑ nɩɩ mpʋ pɑɑ mʋ-tǝɣɩ. Ɩlɛnɑ ń kpɑɣɑ-wɛ nɑ ɩ́ polo ɩ́ mɑɣɑnɑ Icipiti wulɑʋ nɑ ɩ́ heeli-ɩ sɩ Hepǝlɑ nyǝ́mɑ tɑ́, tɑ́ Ɩsɔ Tɑcɑɑ lɩɩ tɑ́ tɔɔ. Mpʋ tɔ, hɑ-tʋɣʋ mpɑɑʋ nɑ tǝ́ polo wʋlɑɣɑ tɛtʋ tɑɑ nɑ tǝ́ lɑpɩ-ɩ kɔtɑsɩ. Pɩɩ mɑɣɑnɑ ɩsɩɩ kʋyɛɛŋ tooso tɔntɛ.

¹⁹Mɑ nyǝmɑ́ sɩ ye pǝ tɑ hɑŋ wulɑʋ ɩ kɑɑ yele-mɛ nɑ ɩ́ tɛɛ.

²⁰Pǝ tɔɔ kɛ́ mɑɑ hɔ Icipiti nyǝ́mɑ ŋkpɑŋŋ nɑ yɑɑsinɑɑ mpɑ too pɑ tɑ nɑtɑ tɔ nɑ hɑlɩ wulɑʋ tɔɣɔnɩ-mɛɣɛ kʋtɔɣɔnʋ nɑ ɩ́ tɛɛ.

²¹Hɑlɩ mɑ́ yele nɑ Icipiti nyǝ́mɑ lɑ-mɛɣɛ kʋpɑntʋ nɑ ɩ́ tɑɑ lɩɩ niŋ kɑkpɑsɩ.

²²Pɑɑ Ɩsɛɣɛlɩ ɑlʋ wei ɩ kɑ́ sǝlǝmɩ Icipiti ɑlɑɑ mpɑ pɑ kɛ́ ɩ ɑsǝmɑɑ nɑ ɩ cɔlɔ nyǝ́mɑ tɔɣɔ nyǝɣǝtʋ kʋpɑntʋ wontu, nɑ wʋlɑ nyǝntʋ, nɑ wontu kʋsusuutu, nɑ ɩ́ tʋ́ mǝ piyɑ tɔɔ. Ḿpʋ́ɣʋ́ ɩ́ kɑ́ sʋsǝnɑ Icipiti nyǝ́mɑ kɛ kʋnyɔŋ.