Lɩɩʋ 1

1

2

3

4

5

6

7

8

9

10

11

12

13

¹Yɑkɔpʋ wei pɑ cuɣusɑɑ sɩ Ɩsɛɣɛlɩ tɔ, ɩ́ nɑ ɩ pǝyɑlɑɑ mpɑ pɑ polɑ Icipiti kɛ cɑɣɑlʋtʋ tɔ, pɑ lʋlʋŋ loosi nɑ pɑ hǝlɑ ntɔ.

²Lupɛŋ, nɑ Simiyɔŋ, nɑ Lefii, nɑ Yutɑ, nɑ

³Ɩsɑkɑɑ, nɑ Sɑpulɔŋ, nɑ Pɛncɑmɛɛ,

⁴nɑ Tɑŋ, nɑ Nɛfǝtɑli, nɑ Kɑtɩ, nɑ Asɛɛ.

⁵Yɑkɔpʋ pǝyɑlɑɑ nɑ ɩ sɑɑlǝnɑɑ mpɛ pɑ tǝnɑ pɑɑ wɛ yʋlʋnyɔɔŋ nɩɩtoso nɑ nɑɑnʋwɑ (70) kɛ́. Ɩlɛ ɩ pǝyɑlʋ lɛlʋ Yosɛɛfʋ nɑ́ lɑɑlɑ-wɛɣɛ Icipiti kɛ pote.

⁶Pǝ wɑɑlɩ kɛ́ Yosɛɛfʋ nɑ ɩ tɑɑlʋnɑɑ mpɑ pɑɑ polɑ Icipiti tɔ pɑ sǝpɑ pɑ tǝnɑ.

⁷Pɑɑ nɑ mpʋ Ɩsɛɣɛlɩ nyǝ́mɑ mpɛ pɑ hukɑ teu tǝyomyom nɑ pɑ́ sú tɛtʋ nɑ pɑ toŋ fɛɩnɑ sɑɑlɑ.

⁸Ḿpʋ́ɣʋ́ wulɑʋ kʋfɑlʋ nɔɣɔlʋ nɑ́ tɔɣɔ kɑwulɑɣɑ. Amɑ ɩ́lɛ́ ɩ tɑ nyɩ Yosɛɛfʋ.

⁹Ntɛnɑ ɩ́ koti ɩ yǝlɑɑ nɑ ɩ́ tɔ-wɛ sɩ: Ɩ́ nyǝnɩ, Ɩsɛɣɛlɩ nyǝ́mɑ kǝlɑ-tʋɣʋ sɑmɑɑ nɑ toŋ, pɑ wɛ-tʋɣʋ ɑsolɑ kɛ́.

¹⁰Mpʋ tɔ, pǝ wɛɛ sɩ tǝ́ pɛɛkɩ yɑɑsi wei tɩɩ pɑsǝnɑ-wɛ tɔ. Pǝ́ tɑɑ kɔɔ nɑ pǝ́ yoosi tɑ́ nɑ tɑ́ kolontunɑɑ nɑ mpɛ pɑ́ sɛɛnɑ pɑ tɔɔ nɑ pɑ́ kǝlɩ-tʋ. Ɩlɛnɑ pɑ́ se nɑ pɑ́ tɛɛ.

¹¹Tǝnɑɣɑlɛ Icipiti nyǝ́mɑ tʋwɑ Ɩsɛɣɛlɩ nyǝ́mɑ kɛ yomle tǝmɑ wɑhɑlɑ nyǝnɑ. Nɑ pɑ́ kpɑ ɑ feŋlɑɑ nɑ pɛlɛ pɑ́ tʋɣʋ-wɛɣɛ-yɛ. Hɑlɩ Ɩsɛɣɛlɩ nyǝ́mɑ mpɛ pɑ ŋmɑnɑ ɑcɑlɛɛ wenɑ pɑ yɑɑ sɩ Pitom nɑ Lɑmsɛsɩ tɔ. Tǝnɑɣɑ Icipiti wulɑʋ sɩɩkɩ ɩ wontu.

¹²Pɑɑ nɑ pɑ tǝmɑ ɑnǝɣɩ mpʋ tɔ, pɑ tɔŋnɑ hukuɣu kɛ́ nɑ pɑ́ suɣi tɛtʋ. Ɩlɛnɑ Icipiti nyǝ́mɑ tɛɛ nɑ́ɑ́ sʋʋkǝnɑ-wɛɣɛ sɔsɔm.

¹³Ḿpʋ́ɣʋ́ pɑ tʋ-wɛɣɛ yomle tǝmɑ. Ɩlɛnɑ pɛlɛ pɑ́ lɩɩ pɑ tǝɣɩ luɣu. Mpi tɔ, cʋɣʋ kɛ pɑ cɑsɑɣɑ nɑ pɑ́ ŋmɑɑkɩ pilikinɑɑ, nɑ pɑ́ lɑkɩ tɑwɑ tǝmɑ tǝnɑ. Pɑ tʋkɑɣɑ-wɛɣɛ-yɛɣɛ ḿpʋ́ɣʋ́ nɑ mʋsʋŋ.

¹⁵Hepǝlɑ nyǝ́mɑ kɑ wɛnɑ ɑlɑɑ lʋlǝsǝlɑɑ kɛ nɑɑlɛɣɛ. Pɑ yɑɑ lɛlʋ sɩ Sifǝlɑ nɑ lɛlʋ sɩ Puwɑ. Mpʋɣʋlɛ Icipiti wulɑʋ yɑɑ-wɛ nɑ ɩ́ heeli-wɛ sɩ:

¹⁶Ɩ́ feŋiɣi Hepǝlɑ ɑlɑɑ tǝlʋllɛ nɑ ɩ́ kʋɣɩ ɑpɑlʋpiyɑ kɛ sɑɑʋ tɑɑ kɛ́ kpɑkpɑɑ. Amɑ ɩ́ yeki ɑlʋpiyɑ.

¹⁷Lʋlǝsǝlɑɑ mpɛ pɛlɛ pɑ nyɑŋɑɣɑnɑ Ɩsɔ. Ɩlɛnɑ pɑ́ kisi wulɑʋ tɔm ntɩ. Ɩlɛ pɑ tɑ kʋ ɑpɑlʋpiyɑ.

¹⁸Tǝnɑɣɑlɛ wulɑʋ yɑɑ-wɛ nɑ ɩ́ pɔɔsɩ-wɛ sɩ: Pepe tɔɔ kɛ́ ɩɩ kʋɣɩ ɑpɑlʋpiyɑ mpɛ?

¹⁹Ntɛnɑ lʋlǝsǝlɑɑ mpɛ sɩ: Hepǝlɑ ɑlɑɑ fɑɣɑnɑ Icipiti nyǝ́mɑ kɛ yoo. Pɑ ɑpɑlʋtʋ wɛ sɔɣɔntʋ. Pɑ lʋlǝɣɩ pɑ piyɑ kɛ́ nɑ pǝ́cɔ́ tɑ́ɑ́ tɑkɩ.

²⁰Ḿpʋ́ɣʋ́ Ɩsɔ koolɑ lʋlǝsǝlɑɑ mpɛɣɛ kʋpɑntʋ, nɑ ɩ́ lɑ́ nɑ pɑ piitim tɑɣɑlɩ. Mpi tɔ, pɑ nyɑŋɑɣɑnɑ-ɩ tɔ pǝ tɔɔ. Ɩlɛnɑ Ɩsɛɣɛlɩ nyǝ́mɑ nɑ́ɑ́ hukiɣi nɑ pɑ́ nyɔɔkɩ toŋ.

²²Ḿpʋ́ɣʋ́ Icipiti wulɑʋ tʋwɑ Icipiti nyǝ́mɑ tǝnɑ sɩ: Ye Hepǝlɑ ɑlʋ lʋlɑ ɑpɑlʋpǝyɑɣɑ ɩ́ tǝŋsɩ-kɛɣɛ Nili pɔɣɔ lʋm. Amɑ ɩ́ yeki ɑlʋpiyɑ.