Lɩɩʋ 7

1

2

3

4

5

6

7

8

9

10

11

12

13

¹Ḿpʋ́ɣʋ́ Tɑcɑɑ heelɑ Moisi sɩ: Mɑɑ tʋ-ŋ toŋ sɔsɔɔŋ nɑ ń pǝsɩ ɩsɩɩ Ɩsɔ kɛ́ Icipiti wulɑʋ ɩsɛntɑɑ nɑ Alɔŋ nɑ́ɑ́ tɛlǝsǝɣɩ-ɩ nyɑ́ tɔm.

²N kɑ́ kɛɛsɩ Alɔŋ kɛ tǝ tǝnɑ nti mɑ́ɑ́ heeli-ŋ tɔ, nɑ ɩ́lɛ́ ɩ́ tɛlǝsɩ-tǝɣɩ Icipiti wulɑʋ sɩ ɩ́ yele Ɩsɛɣɛlɩ nyǝ́mɑ nɑ pɑ́ lɩɩ ɩ tɛtʋ tɑɑ.

³Pɑɑ nɑ mpʋ tɔ, mɑɑ lɑ Icipiti wulɑʋ kɛ lɑŋkpɩɩsǝŋ. Pɑɑ nɑ piti tǝmɑ nɑ kʋhʋlʋm mpi pǝ tǝnɑ mɑɑ lɑ Icipiti tɑɑ tɔ,

⁴ɩ kɑɑ nɩɩnɑ-mɛ. Hɑlɩ wɑɑtʋ ɩnǝɣɩ mɑɑ nyǝŋsɩ Icipiti nyǝ́mɑ ɩsɛ kɛ teu kɛ ɩsǝnɑ pǝ wɛɛ tɔ. Ɩlɛnɑ mɑ́ lǝsɩ mɑ yǝlɑɑ Ɩsɛɣɛlɩ nyǝ́mɑ kɛ nɔɣɔ kʋlʋmɑɣɑ kɛ tɛtʋ tǝnɛ tǝ tɑɑ.

⁵Sɑɑ ɩnǝɣɩ pɩɩ cɛ Icipiti nyǝ́mɑ ɩsɛntɔɔ nɑ pɑ́ nyɩ́ sɩ mɑ kɛ́ Tɑcɑɑ.

⁶Ḿpʋ́ɣʋ́ Moisi nɑ Alɔŋ pɑ lɑpɑ teitei ɩsɩɩ Tɑcɑɑ kɑ heeluɣu-wɛ tɔ.

⁷Wɑɑtʋ wei pɑ yɔɣɔtɑɣɑnɑ wulɑʋ kɛ mpʋ tɔ, Moisi pɩɩsɩ kɑ wɛ nɩɩnɑɑsɑ nɑ Alɔŋ nyǝnsɩ kɛ nɩɩnɑɑsɑ nɑ tooso.

⁸Ḿpʋ́ɣʋ́ Ɩsɔ Tɑcɑɑ heelɑ Moisi nɑ Alɔŋ sɩ:

⁹Ye Icipiti wulɑʋ tɔmɑ-mɛ sɩ ɩ́ lɑ piti tǝmlɛ nɑtǝlɩ, ɩlɛ Moisi heeli Alɔŋ sɩ ɩ́ pɛtɩ ɩ kpɑ́tʋ́ɣʋ́ kɛ ɑtɛɣɛ wulɑʋ ɩsɛntɑɑ, nɑ kɩɩ pǝsɩ tʋm.

¹⁰Tǝnɑɣɑ Moisi nɑ Alɔŋ pɑ tɛɛwɑ nɑ pɑ́ lɑ́ teitei ɩsɩɩ Ɩsɔ Tɑcɑɑ kɛɛsʋɣʋ-wɛ tɔ. Alɔŋ pɛtɑ ɩ kpɑ́tʋ́ɣʋ́ kɛ ɑtɛɣɛ Icipiti wulɑʋ nɑ ɩ wɑɑlɩ nyǝ́mɑ pɑ ɩsɛntɑɑ nɑ kʋ́ pǝsɩ tʋm.

¹¹Ḿpʋ́ɣʋ́ wulɑʋ kotɑ Icipiti tʋwɑɑ nɑ pǝ topotopo nyǝ́mɑ nɑ pɛlɛ pɑ́ lɑ́ mpʋ tɔtɔ, nɑ pɑ topotopotʋ tɑɑ.

¹²Pɑ tǝnɑ pɑ pɛtɑ pɑ kpɑtǝŋ kɛ ɑtɛ nɑ ɩ́ pǝsɩ tʋmɑɑ. Tǝnɑɣɑ Alɔŋ kpɑ́tʋ́ɣʋ́ tʋm kʋlɑɑ nɑ ɩ́ li pɑnɛ pɑ nyǝŋ tʋmɑɑ tǝnɑ.

¹³Pɑɑ nɑ mpʋ Icipiti wulɑʋ lɑpɑ lɑŋkpɩɩsǝŋ nɑ ɩ́ kisi nti Moisi nɑ Alɔŋ pɑ polɑ-ɩ sǝlǝmʋɣʋ tɔɣɔ teitei ɩsɩɩ Tɑcɑɑ kɑ yɔɣɔtʋɣʋ tɔ.

¹⁴Ḿpʋ́ɣʋ́ Ɩsɔ Tɑcɑɑ tɔmɑ Moisi sɩ: Ntɔŋ Icipiti wulɑʋ kɑmɑ nyʋɣʋ kɛ ɩ lɑŋkpɩɩsǝŋ tɑɑ nɑ ɩ́ kisi Ɩsɛɣɛlɩ nyǝ́mɑ kɛ yeluɣu sɩ pɑ́ tɛɛ yɛɛ?

¹⁵Tɔʋ, cele kʋ femɑ n lɩɩ lɔŋ nɑ ń kpɑɣɑ nyɑ́ kpɑ́tʋ́ɣʋ́ ŋku kɩɩ pǝsɑ tʋm tɔ, nɑ ń polo ɩ tɛɣɛ sɑɑ wei ɩ tiiki pɔɣɔ tɔ, nɑ ń tɑŋɩ-ɩ kʋteŋ tɔɔ.

¹⁶Ɩlɛnɑ ń heeli-ɩ sɩ: Hepǝlɑ nyǝ́mɑ tɑ́, tɑ́ Ɩsɔ Tɑcɑɑ tilinɑ-m sɩ mɑ́ heeli-ŋ sɩ ń yele ɩ yǝlɑɑ nɑ pɑ́ polo pooluŋ nɑ pɑ́ sɛɛ-ɩ, nɑ hɑlǝnɑ sɑŋɑ nyɑɑ sɑŋ.

¹⁷Pǝ tɔɔ kɛ́ Tɑcɑɑ sɩ mɑ́ tɛlǝsɩ-ŋ sɩ n tɔmɑ sɩ n tɑ nyǝmɩ-ɩ tɔ pǝnɛntɑɑ kɛ́ n kɑ́ nyǝmɩ-ɩ. Kpɑ́tʋ́ɣʋ́ kʋnɛɣɛ mɑɑ mɑ Nili pɔɣɔ lʋm tɔɔ, ɩlɛnɑ Ɩsɔ yele nɑ pǝ tǝnɑ pǝ́ pǝsɩ cɑlǝm,

¹⁸nɑ tiinɑ sɩ́ nɑ lʋm sɔŋ nɑ hɑlɩ Icipiti nyǝ́mɑ kpisi pǝ nyɔɔʋ.

¹⁹Ḿpʋ́ɣʋ́ Tɑcɑɑ tɑsɑ Moisi kɛ heeluɣu sɩ: Heeli Alɔŋ sɩ kpɑɣɑ nyɑ́ kpɑ́tʋ́ɣʋ́ nɑ ń hʋ́lɩ́-kʋɣʋ Icipiti nyǝ́mɑ lʋm tǝkpentenɑɑ nɑ pusi nɑ lɔɔŋ pǝ tɔɔ nɑ pǝ́ kpɛŋnɑ lʋcɑɣɑmnɑɑ nɑ tɩɩŋ nɑ kʋkpɑmǝŋ pǝ pɔɔŋ tɑɑ lʋmnɑɑ, nɑ pǝ́ pǝsɩ cɑlǝm. Wɑɑtʋ ɩnɩ cɑlǝm kɑ́ wɑɑsɩ tɛtʋ tǝnɑ tǝpɑɩ.

²⁰Ḿpʋ́ɣʋ́ Alɔŋ kʋsɑ kpɑ́tʋ́ɣʋ́ nɑ ɩ́ mɑ́ pɔɣɔ lʋm tɔɔ ɩsɩɩ Tɑcɑɑ kɑ kɛɛsʋɣʋ-wɛ tɔɣɔ Icipiti wulɑʋ nɑ ɩ wɑɑlɩ nyǝ́mɑ pɑ ɩsɛntɑɑ, nɑ lʋm tǝnɑ pǝsɩ cɑlǝm.

²¹Ɩlɛnɑ pɔɣɔ tǝnɑ tiinɑ sɩ́, nɑ kɑ lʋm sɔŋ hɑlǝnɑ Icipiti nyǝ́mɑ kpisi pǝ nyɔɔʋ. Nɑ pɑɑ timpiɣi n tɑlɑ tɛtʋ tǝnɑ tɑɑ cɑlǝm wɑɑsǝnɑ.

²²Ḿpʋ́ɣʋ́ Icipiti tʋwɑɑ lɑpɑ teitei ɩsɩɩ Moisi-wɛ nɑ pɑ topotopotʋ tɑɑ. Ɩlɛnɑ Icipiti wulɑʋ lɑ lɑŋkpɩɩsǝŋ ɩsɩɩ Tɑcɑɑ kɑ tɛm yɔɣɔtʋɣʋ tɔ, nɑ ɩ́ kisi nɔɣɔ ŋkɑ pɑɑ sǝlǝmɑ-ɩ tɔ.

²³Ɩ tɑ kpɑɣɑ-tɩ nɑ ɩ́ yɑɑ pʋlʋ. Ɩlɛnɑ ɩ́ hɑ lumɑɣɑ nɑ ɩ́ sʋʋ ɩ tǝyɑɣɑ.

²⁴Tǝnɑɣɑ Icipiti nyǝ́mɑ tǝnɑ sʋʋ hilɑ lɑɑsʋɣʋ nɑ pɑ́ mɑlǝɣɩ pɔɣɔ sɩ pɑ́ hiki lʋm kʋnyɔnyɔɔm. Mpi tɔ, pɔɣɔ nyǝm tɑɑ fɛɩ nyɔɔʋ.

²⁵Kʋyɛɛŋ nɑɑtosompɔɣɔlɑɣɑ tǝcu kɛ́ lʋm pǝsɑ cɑlǝm.

²⁶Pǝ wɑɑlɩ kɛ́ Tɑcɑɑ tɔmɑ Moisi sɩ: Polo Icipiti wulɑʋ kiŋ nɑ ń heeli-ɩ sɩ yele mɑ yǝlɑɑ nɑ pɑ́ polo pɑ́ lɑ-m tǝmlɛ.

²⁷Ye n kisɑ mpʋ mɑɑ yele nɑ sɑlɛɛ lɩɩ nyɑ́ tɛtʋ tǝnɑ tɑɑ.

²⁸A kɑ́ huki tǝyomyom kɛ pɔɣɔ tɑɑ. Ɩlɛnɑ ɑ́ kpɑ nɑ ɑ́ sʋʋ wulɑʋ nyɑ́ nyɑ́ kɑwulɑɣɑ tǝyɑɣɑ tɑɑ, nɑ nyɑ́ nɑŋ kʋhǝntʋɣʋ tɑɑ. A kɑ́ kpɑ nyɑ́ kɑto tɔɔ mɑɣɑmɑɣɑ. A kɑ́ sʋʋ tɔtɔɣɔ nyɑ́ wɑɑlɩ nyǝ́mɑ tɛɛsɩ tɑɑ nɑ sɑmɑɑ nyǝnsɩ tɑɑ nɑ tǝtǝsǝlɛ nɑ mʋtʋ tiisi tɑɑ tɔtɔ.

²⁹Hɑlɩ ɑ kɑ́ kpɑ Icipiti wulɑʋ nyɑ́ nyɑ́ mɑɣɑmɑɣɑ nyɑ́ tɔɔ, nɑ sɑmɑɑ tǝnɑ tɔɔ, nɑ pǝ kpɛŋnɑ tǝmlɛ nyǝ́mɑ tɔɔ tɔtɔ.