1Musa tɛni a anzure Midiã bùsu sa'ori pↄ́kãdenↄ dã à vĩ̀ gbárannala ari à kà kpi kũ òdi pi Orɛbu kĩnaa.
2Akũ Dikiri Malaikaa bò à sùa tɛ́vuraa gũn tariankpãn. Musa tariankpã pìi gwà à è tɛ́ kúa, ama àtɛn tɛ́ kũro.
3Akũ à pì: Mani gɛ́ mà daboyã pì gwa de mà dↄ̃ pↄ́ kũ à tò tariankpã pì tɛn tɛ́ kũro.
4Kũ Dikiri è à sù gwa, akũ à lɛ́ zùi zaa tariankpã pìi gũn à pì: Musa! Musa! Akũ à wèa à pì: Makũ di!
5Luda pìnɛ: Ǹsun nairo. Ǹ n kyate bobo, zaakũ gu kũ ń zɛn kun adonamɛ.
6Akũ à pì: Makũmɛ n dizinↄ Ibrahĩ kũ Isaakuo kũ Yakubuo Luda ũ. Akũ Musa pↄ́ kù a wɛ́a, kũ à wɛ́ kɛna pla kũ Ludao vĩna vĩ yãi.
7Akũ Dikiri pì: Ma yã'ũmmana kũ ma gbɛ̃nↄ tɛn kɛ Misila è, ma wiki kũ ń wɛ́tãmmarinↄ tò òtɛn lɛ́ mà. Má ń wãwãkɛnaa dↄ̃̀.
8Ma kipa mà ń sí Misilanↄa mà ń bↄtɛ bùsuu pìn mà gɛ́ kũńwo bùsu mana yàasan, gu kũ vĩ kũ zↄ́'io din, bùsu kũ Kanaanↄn kun kũ Itinↄ kũ Amↄrinↄ kũ Pɛrizinↄ kũ Ivinↄ kũ Yebusinↄo.
9Isarailanↄ wikilɛna kà ma kĩnaa tera sà, ma wari kũ Misilanↄ tɛn dↄḿma è.
10Ǹ gɛ́ tera sà, ma n zĩ Firi'aunaamɛ de ǹ ma gbɛ̃ Isarailanↄ bↄtɛ Misila.
11Akũ Musa pì Ludanɛ: Dín ma ũ kũ mani gɛ́ Firi'auna kĩnaa mà Isarailanↄ bↄtɛ Misilai?
12Luda pìnɛ: Manigↄ̃ kú kũnwo. Zĩna kũ ma n zĩ sèedaan dí. Tó n ń bↄ́tɛ Misila, áni donyĩ kɛmɛnɛ kpi dí pↄtɛa.
13Akũ Musa pì Ludanɛ: Tó ma gɛ ma ò Isarailanↄnɛ ma pì, ń dizinↄ Luda mɛ́ à ma zĩḿma, tó ò ma la n tↄ́i sↄ̃ bi? Mani pińnɛ deramɛɛ?
14Luda wèa à pì: Makũmɛ gbɛ̃ kũ má de a ũ ũ. Ǹ ońnɛ makũ mɛ́ ma n zĩḿma.
15Luda pìnɛ dↄ: Ǹ o Isarailanↄnɛ makũ Dikiri ń dizinↄ Ibrahĩ kũ Isaakuo kũ Yakubuo Luda mɛ́ à n zĩḿma. Ma tↄ́n gwe gↄrↄ sĩnda pínki. Àgↄ̃ ma sísi lɛ ari á buria.
16Ǹ gɛ́ ǹ Isaraila gbɛ̃ zↄ̃kↄ̃nↄ kakara ǹ ońnɛ makũ Dikiri ń dizinↄ Ibrahĩ kũ Isaakuo kũ Yakubuo Luda mɛ́ à bò à sùmma. Ǹ ońnɛ matɛni ń e ma yã kũ òtɛn kɛńnɛ Misila è.
17Mani ń bↄtɛ Misila gu kũ òtɛn wɛ́ tãḿma pìn, mani gɛ́ kũńwo bùsu kũ Kanaanↄn kun kũ Itinↄ kũ Amↄrinↄ kũ Pɛrizinↄ kũ Ivinↄ kũ Yebusinↄo, gu kũ vĩ kũ zↄ́'io din.
18Oni n yã ma. Mↄkↄ̃n kũ Isaraila gbɛ̃ zↄ̃kↄ̃nↄ à gɛ́ à Misila kína le à onɛ makũ Dikiri Eberunↄ Luda ma bo ma suáwa, ma pì à á gba zɛ́ à gɛ́ gↄrↄ aakↄ̃ kɛ gbárannan de à sa o makũ Dikiri á Ludaa.
19Má dↄ̃ kũ Misila kína ni we à gɛ́ro, tó adi kɛ ma a dà tilasiro.
20Mani ↄ tↄ̃ Misilanↄa, mani daboyãnↄ kɛ mà wɛ́ tãoḿma, gbasa à á gbarɛ.
21Mani tó Misilanↄ á wɛ́ gwa, de tó átɛn tá, áni tá ↄkoriro.
22Á nↄgbɛ̃ sĩnda pínki andurufu ke wura nↄmanablebↄnↄ kũ pↄ́kasanↄ gbɛka a Misila nↄgbɛ̃ dakea kũ ń nↄgbɛ̃ kũ ò kú a bɛanↄ, à da á nɛ́gↄ̃gbɛ̃nↄnɛ kũ á nɛ́nↄgbɛ̃nↄ. Lɛn áni Misilanↄ pↄ́nↄ síḿma lɛ manamana.
