1Moses-ele yepe-yepe areye arntarnte-aretyarte arnteweye ikwerenheke. Itelareme, Jethro-arle kwertengerle tyatye-arenye apmere Midian ikwerele. Arlte anyentele, Moses-ele yepe-yepe uthene nanikute areye uthene ahelhe arrangkethele arrekwele-irretyame nhenge itne anteme apwerte ameke-ameke akngerreke itwe ulkere-anteme-irreke apwerte Sinai arritnye.
2Yanhe ikwerenge alkere-arenye YAHWEH-kenhe arrateke, arne akwekeke tnemele Moses-eke imernelhemele. Arne akweke yanhe arlpelhe akngerre-akerte ure alkngenthe-ante aneke. Moses apateke anthurre nhenge re renhe aremele ure alkngenthe-ante anerlenge, re akenhe ampetyakenhe aneke uyerremele, arrangkwe-arle.
3Moses re-arrpe angkeke, “Ayenge apatemele anthurre! Arne nhenhe re kwenhe akwete ampeme, atherrke-atherrke akenhe akwete anemele. The itwenge-ulkerenge aretyeke alheme nthakenhe-arle irrerlenge!”
4Nhenge arne mpwepele ampetyamele, mpwepe anthurre ikwerenge-ntyele Ngkartele Moses apetyerlenge areke. Re ikwere arlkeke, “Moses, Moses!” Moses ikwere angkirtnerlenge, “Nhenheyaye ayenge.”
5Kele Ngkarte anteme ikwere angkeke, “Itwe-werne awethe apetyetyalaye, yanhe ikwerele ane! Ingke-kenhe irlwaye unte-arle tneme yanhe anthurre kwenhe apmere ameke-ameke aneme.
6Ayenge kwenhe arrekwelenye ngkwinhe areyeke Ngkarte aneme, Ngkarte aneke Abraham-eke, Isaac-eke, Jacob utheneke, arrekwelenye ngkwinhe areye arrule anthurre-arle anerrirretyarteke.” Nhenge Moses-ele nhenhe renhe awemele re inngerre manterele artelheke rarle atere anthurre awelheke Ngkarte areme-ketye.
7YAHWEH anteme Moses-eke angkeke, “The kwenhe Egypt-arenye areye areme nhenge itne tyerrtye Atyinhe areye atwerlenge itnenhe arnterre anthurre warrke-irretyeke uterneme. The itnenhe aweme atyenge artnerlenge The itnenhe nhenge itetheke mpwaretyeke. The kwenhe itelareme itne-arle uyarne anthurre itirremenge.
8Alakenhe ikwerenge anteme Ayenge alkere akertne-ngentyele apetyeke. Ayenge apetyeke itnenhe ingkirreke anthurre itetheke mpwaretyeke itnenhe Egypt-arenye areye-ketyenge akngetyeke. The itnenhe Egypt-ngentyele arratelhe-iletyeke, itnekenge arrekwele-irremele apmere mwerre anthurre-werne akngetyeke merne arunthe anthurre-akerte-werne. The itnenhe apmere arrpenhe areye-arle anerlte-aneme-werne akngetyenhe: Canaanite areye, Hittite areye, Amorite areye, Perizzite areye, Hivite areye, Jebusite areye-arlke.
9Awerrirraye, The kwenhe Atyinhe areye artnerlenge aweke. The itelareme Egypt-arenye areyele itnenhe warrke-irretyeke uterneme ayernentye akngerre areye-arteke.
10Alakenhe ikwerenge anteme The ngenhe Pharaoh-werne yerneme unte nhenge tyerrtye Atyinhe areye apmere Egypt-ngentyele arratelhe-iletyenhenge apmere arrpenhe-werne akngemele. Iparrpe alhaye! Itnenhe inetyeke alhaye unte-arle itnekenge Egypt-ngentyele arrekwele-irretyenhenge!”
11Kenhe Moses Ngkarteke angkerlenge, “Ayenge akngerre anetyakenhe! Pharaoh-ele ayenge awetyakenhele anetyenhe! Nthakenhe-arle-ame the tyerrtye Israel-arenye areye Egypt-ngentyele arratelhe-iletyenhe? The alakenhe uyarne anthurre mpwareme!”
12Kenhe Ngkarte akenhe ikwere angkerlenge, “Ayenge ngkwengenge Egypt-werne alhetyenhe. Nhenge unte Atyinhe areye yanhe-ngentyele arratelhe-ilerlenge itnenhe apwerte akngerre nhenhe-werne akngetyaye nhenge itne Ayenge utyernemele tnaketyenhenge. Alakenhe ikwerenge tyerrtye areyele itelaretyenhenge Tharle ngenhe yerneke.”
13Kele Moses Ngkarteke angkirtneke, “Kweye? Ayenge apeke itneke-werne alheme alakenhe angkemele, ‘Ngkarte, akngeye anwerne-kenhe areyele-arle arrule anthurre apentetyarteke, Re ayenge nhenhe-werne yerneke,’ itne apeke ayenge arratye itelaretyakenhe. Itne ayenge alakenhe apayuthnemele, ‘Iwenhe-ame arritnye Ikwerenhe, iwenhe-arteke-ame Re?’ Alakenhe renhe itne atyenge angketyenhenge. Nthakenhe-ame ayenge itneke angketyenhe? Atyenge ilaye, iwenhe-ame arritnye Ngkwinhe?”
14Ngkarte anteme ikwere angkeke, “AYENGE AKWETE-ANTE ANEME. Arritnye atyinhe aneme YAHWEH. Tyerrtye yanhe ilaye YAHWEH-ele ngenhe yerneke.
15Itnenhe ilaye ayenge Ngkarte anyente re aneme arrekwelenye arrekantherrenhe areyele-arle apentetyarteke, Abraham, Isaac, Jacob uthenele. Itnenhe ilaye The ngenhe yerneme itnenhe Egypt-ngentyele arratelhe-iletyeke. YAHWEH arritnye Atyinhe akwete-ante anetyenhe. Lyete-ngentyele itne Ayenge YAHWEH aketyeke. Artwe ampwe akngerrepate Israel-arenye areye inetyeke alhaye. Itnenhe ilaye Ayenge-arle ngkwenge imernelheke, iwenhe Ayenge ngkwenge angkerne. Itneke ilaye The areke-arle Egypt-arenye areyele itnenhe arnterre warrke-irretyeke uternerlenge itnenhe atwemele-arlke.
17Ayenge-arrpe anteme angkeke, The Atyinhe areye Egypt-ngentyele arratelhe-ilemele akngetyetyenhe itne-arle itnenhe atwemenge itnenhe akurne anthurre ilemenge. Ayenge itnekenge arrekwele-irretyenhe apmere mwerre anthurre-werne akngetyenhele merne akngerre-arle aneme-werne. Lyete tyerrtye arrpenhe areye yanhe ikwerele apmereke-artweye aneme, Canaanite areye, Hittite areye, Amorite areye, Perizzite areye, Hivite areye Jebusite areye uthene. The apmere ahelhe itnekenhe raketyenhe tyerrtye Atyinhe areye anthetyenhenge!”
18Ngkarte anteme Moses-eke angkeke, “Unte apeke ayeye nhenhe tyerrtye Atyinhe areyeke ileme, itne anteme ngenhe aweme. Ikwere-ipenhele unte uthene artwe ampwe akngerrepate Israel-arenye uthene, Pharaoh-werne alherlte-iwaye, ikwere alakenhe angkaye, ‘Anwerne Hebrew areyele Ngkarte apenteme, YAHWEH arritnye Ikwerenhe aneme. Re anwerneke imernelheke. Anwerne apmere arrangkethe-werne alhetyeke arlte urrpetyeke, yanhe ikwerenge anteme anwerne YAHWEH-eke kere iteme. Anwerne Renhe yanhe ikwerele tnaketyenhe. Mwerre-ame anwerne yanhe ikwere-werne alhetyeke?’ Alakenhe unte artwe ampwe akngerrepate yanhe areye-arlke Pharaoh-eke angketyeke.
19Kenhe Pharaoh-ele ngenhe awetyakenhe anetyenhe. Re arrenhantherrenhe mwerntelhe-iletyenhe arrantherre ahelhe arrangkethe ikwere-werne alheme-ketye. Alakenhe irreketyenge anteme, The renhe uterneme ngenhe awetyeke.
20Utnenge Akngerre Atyinhele The renhe uternetyenhe arrenhantherrenhe ipmentye impetyeke. The Egypt-arenye yanhe areye rlkerte-iletyenhe atwemele anteye itne Atyenge-ketye atere anthurre irretyenhenge. Ikwere-ipenhele Pharaoh-ele anteme arrenhantherrenhe Egypt-ngentyele yernetyenhe.
21“Yewe, Egypt-arenye areye arrekantherre-ketyenge, Israel-arenye areye-ketyenge atere anthurre awelhetyenhe. Alakenhe ikwerenge anteme nhenge arrantherre Egypt impemele alhemele, arrantherre iltye-ante impemele alhetyakenhe anetyenhe. Itne arrenhantherrenhe arne atningke anthurre anthetyenhe itne-arle arrekantherrenge atere awelhemenge.
22Urreke arrantherre Egypt impemele alhetyenhenge, arelhe Israel-arenye areyele arelhe Egypt-arenye areye apayuthnetyenhe itneke-arle itwele anekeke apeke itneke-arle warrke-irretyarte apmere itnekenhenge. Itne itnenhe apayuthnetyenhe mantereke, ite-kenheke, iltye-kenheke, itne-arle silver uthene gold uthene-ngentyele mpwarekeke. Arelhe Egypt-arenye areyele arne yanhe areye ingkirreke arelhe Israel-arenye areye anthetyenhe, kele imerte arelhe Israel-arenye areye akenhe arne yanhe areye ampe itnekenhe areye anthetyenhenge. Alakenhe ikwerenge tyerrtye Israel-arenye areyele arne ingkirreke Egypt-arenye areye-ngentyele inetyenhe.” Alakenhe renhe Ngkarte Moses-eke angkeke.
